ចោរសម័យទំនើបជិះម៉ូតូកង់បីលួចកាច់ពោតក្នុងចំការអ្នកដទៃនៅស្រុកភ្នំព្រឹក ត្រូវប៉ូលិសចាប់ឃាត់ខ្លួន
ជនសង្ស័យចំនួន០២នាក់ ត្រូវបានកម្លាំងនគរបាលស្រុកភ្នំព្រឹកចាប់ឃាត់ខ្លួនកាលពីវេលាម៉ោង១២៖៣០នាទី ថ្ងៃទី១៦ ខែសីហា ឆ្នាំ២០២៣ នៅចំណុចភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ពាក់ព័ន្ធករណីលួចកាច់ពោតប្រមាណជាចំនួន២រ៉ៃដី ខណៈជនរងគ្រោះឈ្មោះ ម៉ូវ សុផាត ភេទប្រុស អាយុ២៩ឆ្នាំ រស់នៅភូមិឃុំខាងលើបានដាក់ពាក្យប្តឹងទៅសមត្ថកិច្ចនគរបាលស្រុក។
ក្រោយទទួលបានពាក្យបណ្ដឹង លោកវរសេនីយ៍ទោ ហេង បារាំង អធិការនគរបាលស្រុកបានដឹកនាំកម្លាំងក្នុងអង្គភាពធ្វេីការស្រាវជ្រាវ ស្វែងរកអ្នកលួចខាងលើនេះរហូតដល់វេលាថ្ងៃដដែលបានរកឃើញម៉ូតូកង់បីម៉ាកវេវពណ៌ខៀវចំនួន ១គ្រឿង ពាក់ស្លាកលេខ បាត់ដំបង1E-9177 មានដឹកផ្លែពោតចំនួន២កំណាត់ការ៉ុង ស្មើនឹង៤៤០ផ្លែ នៅក្នុងដីចំការរបស់ជនរងគ្រោះ សមត្ថកិច្ចបានយកមករក្សាទុក នៅកន្លែងអធិការដ្ឋានជាបណ្តោះអាសន្ន។ លុះដល់ថ្ងៃទី១៧ ខែសីហា ឆ្នាំ២០២៣ នៅវេលាម៉ោង១៣៖៣០នាទី ទើបសមត្ថកិច្ចបានស្វែងរកម្ចាស់ម៉ូតូខាងលើនេះឃេីញ និងបាននាំខ្លួនយកមកធ្វេីការសាកសួរ។
ប្រភពព័ត៌មានបានឲ្យដឹងថា ជនសង្ស័យឈ្មោះ ឡុង កុម្ភះ ហៅខែ ភេទប្រុស អាយុ២៥ឆ្នាំ មុខរបរ កម្មករ និងឈ្មោះ ជឿន ឌឿន ភេទប្រុស អាយុ ២៧ឆ្នាំ មុខរបរកម្មករទាំង២នាក់ មានទីលំនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង។
ប្រភពព័ត៌មានបានបន្តថា ពេលធ្វើការសាកសួរពួកគេបានឆ្លេីយសារភាពថា ពិតជាបានប្រេីប្រាស់ម៉ូតូកង់បីនេះទៅលួចបេះផ្លែពោតគេនៅក្នុងចំការ ប៉ុន្តែពេលកំពុងបេះ បានមួយចំនួនហេីយនោះ ម្ចាស់គេដឹងក៏នាំគ្នារត់ចោលម៉ូតូតែម្តង។
បច្ចុប្បន្ននគរបាលស្រុកបានរៀបចំសំណុំរឿងបញ្ជូនជនសង័្សយទាំងពីរនាក់មកកាន់ការិយាល័យជំនាញអនុវត្តតាមផ្លូវច្បាប់៕
