រថយន្តបុកក្មេងប្រុសស្លាប់នឹងកន្លែង ខណៈរត់ឆ្លងថ្នល់តាមឪពុកពីក្រោយ

ពោធិ៍សាត់៖ រថយន្តបុកក្មេងប្រុសរត់ឆ្លងថ្នល់តាមឪពុកពីក្រោយ បណ្ដាលឲ្យស្លាប់នៅនឹងកន្លែងកើតហេតុ នៅលើផ្លូវជាតិលេខ៥ ចន្លោះគីឡូម៉ែត្រ១៦០-១៦១ ស្ថិតនៅភូមិអូរអាចម៍កុក ឃុំអូរសណ្ដាន់ ស្រុកក្រគរ ខេត្តពោធិ៍សាត់ នៅថ្ងៃព្រហស្បតិ៍ ទី២ ខែឧសភា ឆ្នាំ២០២៤ វេលាម៉ោង១៧៖៣០នាទីល្ងាច បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះទៅដល់កន្លែងកើតហេតុ។

ប្រភពព័ត៌មាននៅកន្លែងកើតហេតុបានឲ្យដឹងថា៖ មុនពេលកើតហេតុ គេឃើញមានរថយន្ត១គ្រឿង ម៉ាក LEXUS.RX300 ពណ៌ទឹកប្រាក់ ពាក់ស្លាកលេខ ភ្នំពេញ 2BJ-6486 បើកបរដោយឈ្មោះ សុន សើរ ភេទប្រុស អាយុ ៣៦ឆ្នាំ ជនជាតិខ្មែរ រស់នៅភូមិប៉ោយស្វាយ ឃុំដាត្រាម ស្រុកបាណន់ ខេត្តបាត់ដំបង តែមិនរងរបួសដោយមានលេខប័ណ្ណបើកបរ៖ B.KCHH.0028156 មុខរបរកសិករ បានបើករថយន្តពីលិចទៅកើត លុះមកដល់ចំណុចកើតហេតុខាងលើបានបុកក្មេងប្រុសរត់ឆ្លងថ្នល់តាមឪពុកពីក្រោយពីត្បូងទៅជើង បណ្ដាលឲ្យស្លាប់នៅកន្លែងកើតហេតុ ជនរងគ្រោះឈ្មោះ អៀ សុងហេង ភេទប្រុស អាយុ៤ឆ្នាំ ជនជាតិខ្មែរ រស់នៅភូមិអណ្តូងស្នាយ ឃុំអណ្ដូងស្នាយ ស្រុករលាប្អៀរ ខេត្តកំពង់ឆ្នាំង។ យោងតាមនិទ្ទេសរបស់លោក គ្រី សីហា ព្រះរាជអាជ្ញារងខេត្តពោធិ៍សាត់ ចុះថ្ងៃទី២ ខែឧសភា ឆ្នាំ២០២៤ វេលាម៉ោង១៨៖២៨នាទីល្ងាច បានបញ្ជាតាមទូរសព្ទឲ្យធ្វើកំណត់ហេតុប្រគល់ទទួលសពឲ្យទៅក្រុមគ្រួសារដើម្បីយកទៅធ្វើបុណ្យតាមប្រពៃណី។

លោកវរសេនីយ៍ឯក មោក ភារម្យ អធិការនគរបាលស្រុកក្រគរ បានឲ្យដឹងទៀតថា បន្ទាប់ពីកម្លាំងនគរបាលចរាចរណ៍បានចុះទៅពិនិត្យ និងធ្វើការវាស់វែងរួចហើយបានសន្និដ្ឋានថា ករណីគ្រោះថ្នាក់ចរាចរណ៍នេះបណ្ដាលមកពីមូលហេតុ អាណាព្យាបាលក្មេងខ្វះការប្រុងប្រយ័ត្ន និងរថយន្តប្រើប្រាស់ល្បឿនលឿន។ ចំពោះវត្ថុតាងរថយន្ដ១គ្រឿង រួមទាំងអ្នកបើកបររថយន្តសមត្ថកិច្ចបានប្រគល់ឲ្យទៅជំនាញការិយាល័យនគរបាលចរាចរណ៍ផ្លូវគោកខេត្តពោធិ៍សាត់ដើម្បីដោះស្រាយតាមនីតិវិធី៕