Breaking News: ការឃាត់ខ្លួនបណ្ឌិតចាងហ្វាងឈ្មោះ ដួង អក្ខរា និងចាងហ្វាងម្នាក់ទៀតឈ្មោះ ឡាយ សុជាតិ សមត្ថកិច្ចអនុវត្តទៅតាមអង្គហេតុ និងអង្គច្បាប់នៃការប្រព្រឹត្តបទល្មើសព្រហ្មទណ្ឌ

(ភ្នំពេញ)៖ អ្នកនាំពាក្យនៃស្នងការដ្ឋាននគរបាលរាជធានីភ្នំពេញ សូមបញ្ជាក់ថា «ការឃាត់ខ្លួនអ្នកសារព័ត៌មាន០២នាក់៖ ឈ្មោះ ដួង អក្ខរា និងឈ្មោះ ឡាយ សុជាតិ សមត្ថកិច្ចអនុវត្តទៅតាមអង្គហេតុ និងអង្គច្បាប់នៃការប្រព្រឹត្តបទល្មើសព្រហ្មទណ្ឌដែលមានចែងក្នុងច្បាប់ក្រមព្រហ្មទណ្ឌ និងក្រមនីតិវិធីព្រហ្មទណ្ឌ ដោយមិនជាប់ពាក់ព័ន្ធនិងការគាបសង្កត់ ឬបំភិតបំភ័យដល់អ្នកសារព័ត៌មានលើសិទ្ធិបញ្ចេញយោបល់នោះទេ»។ នេះបើតាមសេចក្ដីប្រកាសព័ត៌មានរបស់អ្នកនាំពាក្យនៃស្នងការដ្ឋាននគរបាលរាជធានីភ្នំពេញដែលអង្គភាព The Mirror News ទទួលបាននៅថ្ងៃទី២២ ខែមករា ឆ្នាំ២០២៥នេះ។

អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានបញ្ជាក់ទៀតថា «យើងក៏សូមគាំទ្រ និងលើកទឹកចិត្តដល់អ្នកសារព័ត៌មានដែលមានក្រមសីលធម៌វិជ្ជាជីវៈសារព័ត៌មានលើការងារផ្សព្វផ្សាយ ព័ត៌មានត្រឹមត្រូវដែលមានការទទួលខុសត្រូវខ្ពស់ ដោយដកស្រង់ប្រភពព័ត៌មានឱ្យបានច្បាស់លាស់ និងគ្រប់ជ្រុងជ្រោយមុននឹង ធ្វើការផ្សព្វផ្សាយដើម្បីឱ្យមហាជនទូទៅទទួលបានព័ត៌មានពិតប្រាកដសម្រាប់បម្រើលើផលប្រយោជន៍សង្គមនិងប្រទេសជាតិ»។

អ្នកនាំពាក្យបានបន្តថាថា នៅព្រឹកថ្ងៃទី២១ ខែមករា ឆ្នាំ២០២៥ សមត្ថកិច្ចនៃស្នងការដ្ឋាននគរបាលរាជធានីភ្នំពេញ បានអញ្ជើញចាងហ្វាងសារព័ត៌មាន០២នាក់ មកបំភ្លឺជុំវិញផ្សព្វផ្សាយព័ត៌មានករណី «ញុះញង់បង្កភាពវឹកវរដល់សន្តិសុខសង្គម ប្រឌិតផ្សព្វផ្សាយព័ត៌មានមិនពិតដែលធ្វើឱ្យចលាចលសង្គម និងប៉ះពាល់ដល់សន្តិសុខជាតិ ប្រព្រឹត្តកាលពីថ្ងៃទី២០ ខែមករា ឆ្នាំ២០២៥»។ក្រោយពីការសាកសួរអ្នកទាំង០២នាក់នោះហើយ នៅរសៀលថ្ងៃទី២១ ខែមករា ឆ្នាំ២០២៥ សមត្ថកិច្ចនៃស្នងការដ្ឋាននគរបាលរាជធានីភ្នំពេញអនុវត្តតាមបទបញ្ជាលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាល រាជធានីភ្នំពេញ និងដោយបានការសម្របសម្រួលនីតិវិធីពីលោក សេង ហៀង ព្រះរាជអាជ្ញារងអមសាលាដំបូងរាជធានីភ្នំពេញបានធ្វើការឃាត់ខ្លួនចាងហ្វាងសារព័ត៌មាន០២នាក់ ដែលបានបង្ហោះវីដេអូព័ត៌មាន ខ្លឹមសាររូបភាពបែបញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម បំភ្លៃព័ត៌មានខុសពីការពិត និងបានកាត់តរូបភាពថ្នាក់ដឹកនាំ ជាមួយវីដេអូប្រើ អំពើហិង្សាមិនដឹងប្រភពច្បាស់លាស់ ដែលជាវីដេអូនៅបរទេស ហើយត្រូវបានសារព័ត៌មានគណនីហ្វេសប៊ុកផេកឈ្មោះ S.A TVHD Live 24h និងគណនីហ្វេសប៊ុកផេកឈ្មោះ គេហទំព័រ ខេមបូឌាស្តាដេលីញយ៍ 24/24h យកមកផ្សព្វផ្សាយ សរសេរចំណងជើង «ពិតជាសាហាវព្រៃផ្សៃណាស់ទីតាំងមួយកន្លែងមានក្រុមឧក្រិដ្ឋជនធ្វើទារុណកម្មមនុស្ស និងបើកល្បែង អនឡាញនៅកណ្តាលក្រុងភ្នំពេញក្នុងភូមិកន្ទុយទឹក សង្កាត់ទៀន ក្រុងភ្នំពេញ តើឱ្យសង្ឃឹមអាជ្ញាធរខណ្ឌដង្កោ គឺដូចសង្ឃឹម ផ្កាយលើមេឃអ៊ីចឹង!» និងបានដាក់រូបភាពថ្នាក់ដឹកនាំមួយចំនួនផ្សារភ្ជាប់ជាមួយខ្លឹមសារព័ត៌មាន ដែលផ្ទុយនិងធម្មនុញ្ញ វិជ្ជាជីវៈសារព័ត៌មាន នាំឱ្យមហាជនទូទៅយល់ច្រឡំ និងបង្កប៉ះពាល់កិត្តិយសសេចក្តីថ្លៃថ្នូរថ្នាក់ដឹកនាំ ប៉ះពាល់សន្តិសុខជាតិក៏ ដូចមុខមាត់ប្រទេសជាតិផងដែរ។

គួរជម្រាបជូនថា ចាងហ្វាងសារព័ត៌មានដែលត្រូវឃាត់ខ្លួន៖ *១-ឈ្មោះ ដួង អក្ខរា អាយុ៤៣ឆ្នាំ ជនជាតិខ្មែរ មុខរបរចាងហ្វាងអង្គភាពសារព័ត៌ រាងអង្គភាពសារព័ត៌មាន www.satvkh.com ទីលំនៅ ផ្ទះ១៨ ផ្លូវលេខ២ ភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ជាអ្នកគ្រប់គ្រងគណនីហ្វេសប៊ុក ផេកឈ្មោះ៖ S.A TVHD Live 24h។និង*២-ឈ្មោះ ឡាយ សុជាតិ ភេទប្រុស អាយុ៥០ឆ្នាំ ជនជាតិខ្មែរ មុខរបរចាងហ្វាងអង្គភាពសារព័ត៌មាន ខេមបូឌាស្តាដេ លីញយ៍ 24/24h ទីលំនៅភូមិក្បាលស្ពាន១ សង្កាត់អូជ្រៅ ក្រុងប៉ោយប៉ែត ខេត្តបន្ទាយមានជ័យ ជាអ្នក គ្រប់គ្រង់គណនីហ្វេសប៊ុកផេកឈ្មោះ គេហទំព័រ ខេមបូឌាស្តាដេលីញយ៍ 24/24៕