កណ្ដាប់ដៃដែក លោកស្នងការ ឈឿន សុចិត្ត ដឹកនាំបញ្ជាបង្រ្កាបឈានដល់ការឃាត់ខ្លួនជនសង្ស័យ១នាក់ ករណីអំពើចាប់និងបង្ខាំងដោយខុសច្បាប់

(កណ្ដាល)៖ ដោយអនុវត្តតាមបញ្ជាយ៉ាងដាច់ណាត់របស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ក្រោយទទួលបានព័ត៌មានពីបណ្តាញសង្គមហ្វេសប៊ុក ថតបានសកម្មភាពជនជាតិចិនលោតចេញពីរថយន្តម៉ាក Prius នៅតាមបណ្តោយផ្លូវក្រវ៉ាត់ក្រុងទី៣ ស្ថិតក្នុងភូមិក្រាំងទ្រា ឃុំព្រះពុទ្ធ ស្រុកកណ្តាលស្ទឹង ខេត្តកណ្តាល លោកឧត្ដមសេនីយ៍ត្រី ឡាក់ ម៉េងធី ស្នងការរងទទួលផែនការងារព្រហ្មទណ្ឌបានដឹកនាំកម្លាំងជំនាញស្នងការដ្ឋាននគរបាលខេត្តកណ្ដាល ដោយមានកិច្ចសហការជាមួយកម្លាំងនាយកដ្ឋាននគរបាលព្រហ្មទណ្ឌ និងកម្លាំងជំនាញស្នងការដ្ឋាននគរបាលខេត្តតាកែវ ចុះកិច្ចប្រតិបត្តិការស្រាវជ្រាវ និងបង្រ្កាបឃាត់ខ្លួនជនសង្ស័យចំនួន១នាក់ ករណី៖ អំពើចាប់ និងបង្ខាំងដោយខុសច្បាប់មានស្ថានទម្ងន់ទោស កាលពីវេលាម៉ោង១៥៖១០នាទី ថ្ងៃទី០៣ ខែមីនា ឆ្នាំ២០២៥ នៅចំណុចផ្លូវក្រវ៉ាត់ក្រុងទី៣ ស្ថិតក្នុងភូមិក្រាំងទ្រា ឃុំព្រះពុទ្ធ ស្រុកកណ្តាលស្ទឹង ខេត្តកណ្ដាល។ នេះបើតាមប្រភពដែលអង្គភាព The Mirror News ទទួលបាននៅថ្ងៃទី៨ ខែមីនា ឆ្នាំ២០២៥នេះ។

ជនរងគ្រោះឈ្មោះ LIU SEN ភេទប្រុស អាយុ៣៨ឆ្នាំ ជនជាតិចិន កាន់លិខិតឆ្លងដែនលេខEN6418573 មានសុពលភាពលិខិតឆ្លងដែន ២៣.០១.២០៣៥ សុពលភាពទិដ្ឋាការ ០២.០៤.២០២៥។ រីឯជនសង្ស័យចំនួន០៥នាក់ជាជនជាតិខ្មែរ និងបក្ខពួក៖ ១.ឈ្មោះ ជា វុទ្ធី ភេទប្រុស អាយុ៣៧ឆ្នាំ ជនជាតិខ្មែរ សញ្ជាតិខ្មែរ មុខរបររត់តាក់ស៊ី មានទីលំនៅភូមិព្រៃឈើទាល ឃុំពពេល ស្រុកត្រាំកក់ ខេត្តតាកែវ ត្រូវបានឃាត់ខ្លួន។ និង២.ជនជាតិខ្មែរចំនួន៤នាក់ទៀតគឺមិនស្គាល់អត្តសញ្ញាណ ភេទប្រុស និងបក្ខពួក។

វត្ថុតាងចាប់យករួមមាន៖ រថយន្ត ០១គ្រឿងម៉ាក TOYOTA PRIUS ពណ៌ក្រហម ផលិតឆ្នាំ២០០៥ ពាក់ផ្លាកលេខ ភ្នំពេញ 2BJ-5042,វ៉ាលី ពណ៌ប្រផេះ ០១ (របស់ជនរងគ្រោះ),អាវយឺតដៃខ្លី ពណ៌ខ្មៅ ០១,អាវយឺតរងាដៃវែងមានមួក ពណ៌ខ្មៅ ០១,ខោខ្លី ពណ៌ខ្មៅ ០១,ទូរសព្ទ ០១គ្រឿង ម៉ាក OPPO ពណ៌ផ្ទៃមេឃ (មានបែកផ្ទៃខាងក្រោយ), ទូរសព្ទ ០១គ្រឿង ម៉ាក HUAWEI ពណ៌ខ្មៅ។

បើតាមប្រភពពីស្នងការដ្ឋាននគរបាលខេត្តកណ្ដាលបានឲ្យដឹងថា កាលពីថ្ងៃទី០៣ ខែមីនា ឆ្នាំ២០២៥ វេលាម៉ោង១១៖០៥នាទី ឈ្មោះ ជា វុទ្ធី បានទៅដឹកជនរងគ្រោះឈ្មោះ LIU SEN ភេទប្រុស អាយុ៣៨ឆ្នាំ ជនជាតិចិន ចេញពីព្រលានយន្ត ហោះអន្តរជាតិភ្នំពេញ ហើយបានបន្តដំណើរទៅយកបក្ខពួកចំនួន០៣នាក់ទៀត ភេទប្រុស ជាជនជាតិខ្មែរ នៅម្តុំផ្លូវក្រវ៉ាត់ក្រុងទី៣។ ពេលមកដល់ផ្លូវក្រវាត់ក្រុងទី៣ ខ្លួនបានឃើញបក្ខពួករបស់ខ្លួន ពាក់អាវ ពណ៌ខ្មៅ ឈរនៅចិញ្ចើមផ្លូវ ហើយខ្លួនបានអែបរថយន្ត ហើយបក្ខពួកក៏បានឡើងលើរថយន្តដោយម្នាក់បានមកជិះខាងមុខស្តាំដៃខ្លួន រីឯបក្ខពួកចំនួន០២នាក់ទៀត បើកទ្វារក្រោយចូលក្នុងរថយន្ត រួចខ្លួនក៏បានធ្វើដំណើរបន្តទៅមុខ ទិសដៅទៅបាវិត។ លុះបានបន្តិច បក្ខពួក០២នាក់ ដែលជិះខាងក្រោយនោះបានប្រតាយប្រតប់ជាមួយជនរងគ្រោះ នឹងបានដកហូតយកទូរស័ព្ទ ហើយម្នាក់ដែលជិះនៅខាងមុខ ក៏បានស្ទុះមកជួយ ហើយស្រែកថា ជួយចាប់គ្នាៗទៅ ពេលនោះ ជនរងគ្រោះបាននិយាយជាភាសាចិនវិញ ហើយក៏ប្រតាយប្រតប់គ្នាប្រហែល១០នាទី ដោយរូបខ្លួនមានការភ័យខ្លាចក្រឡាប់រថយន្ត ព្រោះជនរងគ្រោះបានស្ទុះបើកទ្វារឆ្វេងខាងក្រោយ និងប៉ះដៃចង្កូតរថយន្ត  ក្រោយមកទៀតជនរងគ្រោះក៏បានរើបម្រាសខ្លួន រួចចុចកញ្ចក់ទម្លាក់ ហើយស្ទុះលោតចេញតាមកញ្ចក់ទ្វារឡាន តែត្រូវបក្ខពួកខ្លួនទាំង០៣នាក់ ខ្លះចាប់ដៃ ខ្លះចាប់ជើង ហើយខ្លួនបានស្រែកឱ្យបក្ខពួកប្រលែងជនរងគ្រោះ រួចខ្លួនក៏បានបន្ថយល្បឿនរថយន្ត ហើយជនរងគ្រោះបានលោតចេញពីរថយន្តតែម្តង។

ប្រភពបន្តថា ភ្លាមៗនោះ ឈ្មោះ ជា វុទ្ធី ជាអ្នកបើករថយន្ដ បានទាក់ទងទៅឈ្មោះ ឧត្តម ដែលជាអ្នកចាត់ចែងនឹងបានប្រាប់ថា «បងៗ វារត់រួចហើយ បន្ទាប់មកឈ្មោះ ឧត្តម នោះ ក៏ឱ្យខ្លួនទម្លាក់បក្ខពួក០៣នាក់នោះចុះ រួចឲ្យខ្លួនគេចទៅណាទៅៗ ផុតពីកន្លែងហ្នឹង»។

ពាក់ព័ន្ធករណីអំពើចាប់ និងបង្ខាំងដោយខុសច្បាប់មានស្ថានទម្ងន់ទោសខាងលើ កម្លាំងជំនាញពាក់ព័ន្ធបានកំពុងតែបន្តស្រាវជ្រាវកំណត់អត្តសញ្ញាណជនសង្ស័យពាក់ព័ន្ធដែលរត់គេចខ្លួនយកមកចាត់ការតាមផ្លូវច្បាប់ឱ្យខានតែបាន៕