សារមន្ទីរព្រះនរោត្តមសីហនុ-អង្គរ បានទទួលវត្ថុបុរាណចំនួន៧៧ ពីប្រជាពលរដ្ឋរស់នៅក្នុងខេត្តសៀមរាប

ភ្នំពេញ៖ សារមន្ទីរព្រះនរោត្តមសីហនុ-អង្គរ នៅថ្ងៃទី០៣ ខែកក្កដា ឆ្នាំ២០២៣នេះ បានទទួលវត្ថុបុរាណចំនួន៧៧បន្ថែមទៀតដែលប្រជាពលរដ្ឋរស់នៅក្នុងខេត្តសៀមរាបបានស្ម័គ្រចិត្តប្រគល់ជូនមកកាន់សារមន្ទីរ ដើម្បីធ្វើការថែរក្សា និងអភិរក្សបន្ត។ ដោយវត្ថុបុរាណទាំង៧៧នោះ ខ្លះនៅរក្សាបានរូបរាងពេញ និងខ្លះទៀតបានបែកបាក់ជាបំណែក មានដូចជា៖ ឧបករណ៍ប្រើប្រាស់ប្រចាំថ្ងៃរបស់ប្រជាជននាសម័យបុរាណ មានកុលាលភាជន៍ ឧបករណ៍សម្រាប់ដាក់ទឹក និងម្ហូបអាហារផ្សេងៗ គ្រឿងអលង្ការដូចជា៖ កងដៃ និងឧបករណ៍ប្រើប្រាស់ផ្សេងៗទៀតដូចជា៖ កាំបិត ពូថៅ និងចានជាដើម។ នេះបើតាមប្រភពដែលបណ្ដាញសារព័ត៌មាន The Mirror News ទើបទទួលបាននៅព្រឹកថ្ងៃទី០៤ ខែកក្កដា ឆ្នាំ២០២៣។

បើតាមលោក ណក់ បូរុន ជាអ្នកប្រកបរបររកស៊ីមួយរូប រស់នៅក្នុងខេត្តសៀមរាប បានឱ្យដឹងថា វត្ថុបុរាណមានចំនួន៧៧នេះ វត្ថុខ្លះលោកបានទិញបន្តពីប្រជាពលរដ្ឋ និងខ្លះទៀតប្រជាពលរដ្ឋបានប្រគល់ជូនលោកយកមករក្សាទុកបន្ត ដែលមានប្រភពនៅក្នុងខេត្តសៀមរាបខ្លះ និងមកពីខេត្តបន្ទាយមានជ័យខ្លះ។ ប៉ុន្តែលោកមិនបានដឹងអំពីអាយុកាលនៃវត្ថុនីមួយៗឡើយ ការរក្សាទុកនេះដោយយល់ថា វត្ថុទាំងនោះ ជារបស់មានតម្លៃពីបុរាណគួរបន្តថែរក្សា។

លោកបន្តថា ក្រោយទទួលបានព័ត៌មានពីមិត្តភ័ក្ត្ររបស់លោកថា សារមន្ទីរព្រះនរោត្តមសីហនុ-អង្គរ ទទួលថែរក្សា និងអភិរក្សវត្ថុសិល្បៈពីបុរាណ មិនឱ្យបាត់បង់នោះ លោកក៏ស្ម័គ្រចិត្តប្រគល់ជូនមកកាន់សារមន្ទីរ ដើម្បីយកមកថែរក្សាបន្ត ទុកជាមរកតសម្រាប់កូនចៅជំនាន់ក្រោយបានស្គាល់។ លោក ណក់ បូរុន បញ្ជាក់ទៀតថា ក្រោយពេលមកដល់សារមន្ទីរ បានឃើញការតាំងបង្ហាញវត្ថុពីបុរាណជាច្រើនរាប់រយប្រភេទ ត្រូវបានថែរក្សាយ៉ាងល្អប្រសើរបែបនេះ លោកពិតជាសប្បាយរីករាយ និងមានភាពកក់ក្តៅយ៉ាងខ្លាំង ថែមទាំងជឿជាក់ថា ការប្រគល់ជូនវត្ថុទាំងនោះ មកសារមន្ទីរដើម្បីថែរក្សាបន្ត ពិតជាមានសុវត្ថិភាពបំផុត។

បើតាមលោក ភួយ សាវឿត នាយកស្តីទីនៃសារមន្ទីរព្រះនរោត្តមសីហនុ-អង្គរ បានឱ្យដឹងថា វត្ថុសិល្បៈដែលប្រជាពលរដ្ឋបានប្រគល់មកកាន់សារមន្ទីរ ភាគច្រើនជាកុលាលភាជន៍ ប្រហែលជាឧបករណ៍ដីដុតនៅក្នុងសម័យបុរេប្រវត្តិសាស្ត្រ និងសម័យអង្គរ និងឧបករណ៍ ជាប្រភេទលោហៈ ភាគច្រើនជាឧបករណ៍ប្រើប្រាស់។ ដោយភាគច្រើននៃវត្ថុសិល្បៈដែលបានប្រគល់ជូនមានច្រើនជាងគេ គឺកងដៃ ចំនួន២៤បំណែក និងពូថៅចំនួន១៨បំណែក ប៉ុន្តែក្រុមអ្នកជំនាញពុំទាន់អាចកំណត់អាយុកាល នៃវត្តុបុរាណទាំងនោះច្បាស់លាស់នៅឡើយ។

លោកបន្តថា ក្រោយពេលទទួលបានវត្ថុសិល្បៈទាំងនោះ ក្រុមអ្នកជំនាញនៃសារមន្ទីរ កំពុងធ្វើការចុះបញ្ជី វាស់ប្រវែង ថ្លឹងទំងន់ ទៅតាមបែបបទក្នុងសារមន្ទីរ ទើបឈានទៅរក្សាទុកក្នុងសីតុណ្ហភាពថេរ ដើម្បីការពារវត្ថុទាំងនោះ ទើបចាប់ផ្តើមធ្វើការសម្អាត ដកកំណក់ដី និងលាបដើម្បីការពារស្រទាប់ខាងក្រៅនៃលោហៈទាំងនោះពីបរិយាកាសខាងក្រៅ រួចតភ្ជាប់បំណែកលោហៈណាដែលពុកផុយ តាមរូបរាងដើមឡើងវិញ តាមដែលអាចធ្វើទៅបាន។

គួរជម្រាបជូនថា នាពេលអនាគតសារមន្ទីរ គ្រោងធ្វើការតាំងបង្ហាញវត្ថុបុរាណទាំងនោះជូនសាធារណជនបានទស្សនា និងសិក្សាស្វែងយល់ ក្រោយពេលអ្នកជំនាញធ្វើការសិក្សាស្រាវជ្រាវអំពីប្រវត្តិនៃវត្ថុបុរាណទាំង៧៧នេះរួចរាល់។

សារមន្ទីរព្រះនរោត្តមសីហនុ-អង្គរ រីករាយស្វាគមន៍ ការប្រគល់ជូនវត្ថុបុរាណផ្សេងៗ ដែលប្រជាពលរដ្ឋបានរកឃើញឬរក្សាទុកនៅផ្ទះ បានស្ម័គ្រចិត្តប្រគល់វត្ថុបុរាណឬវត្ថុសិល្បៈនានាមកកាន់សារមន្ទីរ ដើម្បីយកមកថែទាំ និងអភិរក្សបន្ត សម្រាប់កូនចៅជំនាន់ក្រោយបានស្គាល់ និងសិក្សាស្រាវជ្រាវ ព្រោះថាសារមន្ទីរជាកន្លែងដែលអាចរក្សាវត្ថុទាំងនោះប្រកបដោយសុវត្ថិភាព៕

អត្ថបទ៖ នាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ
រូបភាព៖ លោក ហ៊ុំ រិទ្ធី