ចោរញីឈ្មោលប្ដីប្រពន្ធអស់លក្ខណ៍ក្រោយលួចបានមាស១០តម្លឹង!
កំពង់ស្ពឺ៖ ចោរញីឈ្មោលប្រពន្ធប្ដីជាមុខសញ្ញាលួចមាស ត្រូវបានសមត្ថកិច្ចឃាត់ខ្លួននិងបានកសាងសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការតាមនីតិវិធី។
តាមប្រភពបានឱ្យដឹងថា ជនសង្ស័យខាងលើត្រូវបានឃាត់ខ្លួន ក្នុងករណីលួចមាស កាលពីថ្ងៃទី១៨ ខែកុម្ភៈ ឆ្នាំ២០២៣ ក្រោយពេលធ្វើសកម្មភាពលួចបានមាសជាង១០តម្លឹង ត្រង់ចំណុចផ្សារក្រាំងចេក ស្ថិតនៅភូមិគោកសណ្ដែក ឃុំក្រាំងចេក ស្រុកឧត្តុង ខេត្តកំពង់ស្ពឺ។
ប្រភពបន្តថា ក្នុងចំណោមជនសង្ស័យខាងលើ ម្នាក់ឈ្មោះ ស៊ឹម ឡេង ភេទស្រី អាយុ៥៥ឆ្នាំ រស់នៅភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្ដាល និងម្នាក់ទៀតឈ្មោះ ឡោ ថុល ភេទប្រុស អាយុ៥៦ឆ្នាំ រស់នៅភូមិមាន ឃុំមាន ស្រុកព្រៃឈរ ខេត្តកំពង់ចាមបានធ្វើសកម្មភាពចូលលួចមាសនៅផ្ទះរបស់ជនរងគ្រោះឈ្មោះ ចុន ចម្រើន ភេទប្រុស អាយុ៤៣ឆ្នាំ មុខរបរលក់មាសនៅផ្សារក្រាំងចេក បច្ចុប្បន្នរស់នៅភូមិទួលស្តៅ ឃុំក្រាំងចេកស្រុកឧត្តុង ខេត្តកំពង់ស្ពឺ។
បើតាមការបំភ្លឺរបស់ម្ចាស់ផ្ទះបានឲ្យដឹងថា ដំបូងឡើយគឺជនសង្ស័យបានធ្វើជាចូលទៅទិញរបស់របរនៅក្នុងផ្ទះរបស់គាត់ឆ្លៀតពេលដែលគាត់កំពុងតែរើសរបស់របរ ស្រាប់តែជនសង្ស័យជាស្ត្រីរូបនោះបានឆ្លៀតឱកាសលួចយកមាសដែលគាត់យកពីផ្ទះបំរុងដាក់តាំងក្នុងទូលក់មួយកញ្ចប់តែម្ដង ក្នុងនោះរួមមានខ្សែក១០ខ្សែ ក្រវិល៣០គូ បន្តោងខ្សែក ២០បន្តោង ។
ប្រភពបន្តទៀតថា ក្រោយពីជនសង្ស័យជាស្ត្រីរូបនោះចាកចេញពីផ្ទះរបស់គាត់ ប្រពន្ធរបស់លោកចុន ចម្រើន ហាក់មានការសង្ស័យក៏បើកមើលទូមាសរបស់ខ្លួនបាត់ ពេលនោះក៏រត់ដេញតាមស្រែកឆោឡោ និងចាប់បានជនសង្ស័យភ្លាមៗប្រគល់ឲ្យសមត្ថកិច្ចតែម្ដង។
ក្រោយទទួលយកជនសង្ស័យពីប្រជាពលរដ្ឋមក ក្នុងនោះសមត្ថកិច្ចដកហូតបានទូរសព្ទដៃ ៤គ្រឿងនាឡិកាដៃមួយគ្រឿង រថយន្តកាមរីហើម ពណ៌ស ស៊េរីឆ្នាំ ៩៣ របស់ជនសង្ស័យដែលជិះធ្វើសកម្មភាពនិងមាសចំនួន១០តម្លឹង ។
បន្ទាប់ពីសមត្ថកិច្ចឃាត់ខ្លួន និងធ្វើការសួរនាំ ជនសង្ស័យសារភាពថា ឃើញម្ចាស់ទុកចោលក៏លួចតែម្តងទៅ។
ជនសង្ស័យខាងលើ ត្រូវកម្លាំងសមត្ថកិច្ចបានបញ្ជូនទៅកាន់ស្នងការដ្ឋាននគរបាលខេត្ត ដើម្បីចាត់ការតាមនីតិវិធីក្រោយពីកសាងសំណុំរឿងរួចរាល់។ចំណែកវត្ថុតាងមាស១០តម្លឹងដែលសមត្ថកិច្ចដកហូតពីជនសង្ស័យសមត្ថកិច្ចបានប្រគល់ជូនទៅម្ចាស់ដើមវិញហើយ។
តាមប្រភពបានឲ្យដឹងបន្ថែមថា មុខសញ្ញាទាំង២នាក់នេះធ្លាប់ជាប់ពន្ធនាគារតាមបណ្ដាខេត្តនានាជាច្រើនមកហើយ ក្នុងសកម្មភាពចូលទិញអីវ៉ាន់ហើយបន្លំលួចមាសរបស់គេបែបនេះ មុខសញ្ញាទាំង២នាក់នេះគឺជាមុខសញ្ញាចាស់ និងជាមុខសញ្ញាមិនរាងចាល៕
