ប្រធានាធិបតីរុស្ស៊ី លោក ពូទីន បានទៅដល់ទីក្រុងប៉េកាំងហើយ

នៅថ្ងៃអង្គារ ទី១៧ ខែតុលា ឆ្នំ២០២៣នេះ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានធ្វើដំណើរទៅដល់ទីក្រុងប៉េកាំងហើយ ដើម្បីជួបប្រធានាធិបតីចិន លោក ស៊ី ជិនពីង ក្នុងគោលបំណងពង្រឹងទំនុកចិត្តគ្នាទៅវិញទៅមក និងភាពជាដៃគូគ្មានព្រំដែន ​ឱ្យកាន់តែស៊ីជម្រៅ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters។

លោក ពូទីន និងក្រុមមន្ត្រីប្រតិភូរុស្ស៊ី បានធ្វើដំណើរទៅដល់អាកាសយានដ្ឋាន Beijing Capital International Airport នៅព្រឹកថ្ងៃអង្គារនេះ ហើយនេះគឺ ជាដំណើរទស្សនកិច្ចដំបូងបំផុតរបស់លោក ពូទីន នៅក្រៅដែនដីដែលធ្លាប់ជាអតីតសហភាពសូវៀតក្នុងឆ្នាំ២០២៣។ លោក ពូទីន បានធ្វើដំណើរចេញក្រៅ ប្រទេសតិចតួចប៉ុណ្ណោះ ចាប់តាំងពីតុលាការព្រហ្មទណ្ឌអន្តរជាតិ ICC ចេញដីកាចាប់ខ្លួនរូបលោក ជុំវិញការចោទប្រកាន់ពីឧក្រិដ្ឋកម្មសង្រ្គាមនៅក្នុងប្រទេស អ៊ុយក្រែនកាលពីខែមីនាមក។ លោកក៏ទើបតែបំពេញទស្សនកិច្ចនៅកៀហ្ស៊ីស៊ីស្ថានផងដែរកាលពីដើមខែតុលានេះ។ ICC បានតម្រូវឱ្យប្រទេសជាសមាជិក ទាំង១២៣ ចាប់ខ្លួនលោក ពូទីន បញ្ជូនទៅកាន់ទីក្រុងឡាអេ ដើម្បីកាត់ទោស ប្រសិនបើមេដឹកនាំរុស្ស៊ីរូបនេះជាន់ដីរបស់ពួកគេ។ ប៉ុន្តែទាំងចិន និងកៀហ្ស៊ីស៊ីស្ថាន មិនមែនជាសមាជិក ICC ឡើយ។

គួរបញ្ជាក់ថា លោក ពូទីន បានធ្វើទស្សនកិច្ចទៅកាន់ប្រទេសចិន លើកចុងក្រោយបំផុត ដើម្បីចូលរួមព្រឹត្តិការណ៍សម្ពោធកីឡាអូឡាំពិករដូវរងារទីក្រុងប៉េកាំង កាលពីខែកុម្ភៈ ឆ្នាំ២០២២ ជាពេលដែលចិន និងរុស្ស៊ី ប្រកាសពីភាពជាដៃគូគ្មានព្រំដែន តែប៉ុន្មានថ្ងៃប៉ុណ្ណោះ មុននឹងលោកប្រធានាធិបតីរុស្ស៊ីបញ្ជាឱ្យកងទ័ពរបស់លោកវាយសម្រុកចូលអ៊ុយក្រែន ក្រោមប្រតិបត្តិការយោធាពិសេស ដែលលោកខាងលិច និងទីក្រុងកៀវ ចាត់ទុកថាជាសង្រ្គាមឈ្លានពាន។

លោក ពូទីន មានវត្តមានក្នុងប្រទេសចិន គឺដើម្បីចូលរួមវេទិកាខ្សែក្រវាត់ និងផ្លូវ (Belt and Road Forum) ដែលនឹងប្រព្រឹត្តទៅដល់ថ្ងៃពុធសប្ដាហ៍នេះ ហើយនេះក៏នឹងក្លាយជាលើកទី៣ ផងដែរដែលលោក ពូទីន ចូលរួមក្នុងវេទិកានេះ ក្រោយលោកបានចូលរួមចំនួន២លើក ក្នុងឆ្នាំ២០១៧ និងឆ្នាំ២០១៩៕