ប្រជាពលរដ្ឋរងគ្រោះជាច្រើនគ្រួសារបានផ្ដិតមេដៃប្ដឹងលោក ឌី សិទ្ធី ថៅកែក្រុមហ៊ុន សិទ្ធី សិទ្ធី ខនសឺវេសិន ឌីវេឡុបមិន ទៅលោកចៅហ្វាយខណ្ឌព្រែកព្នៅ
ប្រជាពលរដ្ឋរងគ្រោះជាច្រើនគ្រួសារដែលបានចុះកិច្ចសន្យាទិញលក់ដីឡូតិ៍ និងផ្ទះពីក្រុមហ៊ុនបូរី សិទ្ធី សិទ្ធី ខនសឺវេសិន ឌីវេឡុបមិន ដែលមានអាសយដ្ឋាននៅភូមិទួលពន្សាំង សង្កាត់ពន្សាំង ខណ្ឌព្រែកព្នៅ រាជធានីភ្នំពេញកាលពីថ្ងៃទី៨ ខែសីហា ឆ្នាំ២០២៣ បានផ្ដិតមេដៃលើពាក្យបណ្ដឹងដើម្បីប្ដឹងលោក ឌី សិទ្ធី អគ្គនាយកក្រុមហ៊ុន សិទ្ធី សិទ្ធី ខនសឺវេសិន ឌីវេឡុបមិន ទៅលោក ធឹម សំអាន ចៅហ្វាយខណ្ឌព្រែកព្នៅ ពីបទរំលោភលើសេចក្ដីទុកចិត្តដោយមិនបានអនុវត្តន៍កិច្ចសន្យាលក់ទិញដីឡូតិ៍និងផ្ទះ។ នេះបើយោងតាមពាក្យបណ្ដឹងដែលបណ្ដាញសារព័ត៌មាន The Mirror News ទទួលបាននៅថ្ងៃទី៣០ ខែសីហា ឆ្នាំ២០២៣។
តាមប្រភពបានឲ្យដឹងផងដែរថា កាលពីវេលាម៉ិង១០៖០០នាទីព្រឹក ថ្ងៃទី២៥ ខែសីហា ឆ្នាំ២០២៣ នៅសាលាខណ្ឌព្រែកព្នៅ មានប្រជាពលរដ្ឋចំនួនជា២០គ្រួសារ បានជិះរថយន្ត ជិះម៉ូតូកង់បី និងជិះម៉ូតូជាច្រើនគ្រឿងបាននាំគ្នាមកដាក់ពាក្យបណ្តឹង ប្ដឹងក្រុមហ៊ុន សិទ្ធី សិទ្ធី ខនសឺវេសិន ឌីវេឡុបមិន របស់លោក ឌី សិទ្ធី ជាអគ្គនាយកក្រុមហ៊ុន ការិយាល័យលក់នៅភូមិទួលពន្សាំង សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។
ប្រភពព័ត៌មានបានបន្តថា ខ ណៈនោះ អាជ្ញាធរខណ្ឌនិងសមត្ថកិច្ចបានទទួលពាក្យបណ្ដឹងនិងសន្យាជួយដោះស្រាយជូនប្រជាពលរដ្ឋ។ លុះដល់ម៉ោងជាង ១២រសៀលថ្ងៃទី២៥ ខែសីហាដដែល ទេីបប្រជាពលរដ្ឋរងគ្រោះត្រលប់ទៅផ្ទះវិញ។
ប្រភពព័ត៌មានបានលើកជាចម្ងល់ថា តេីមានប្រជាពលរដ្ឋប៉ុន្មាននាក់ទៀតដែលត្រូវរងគ្រោះនៅបញ្ហានេះ? ពលរដ្ឋរង់ចាំមេីលថា តេីលោក ឌី សិទ្ធី ដែលដែលជាម្ចាស់ក្រុមហ៊ុន ក្រុមហ៊ុន សិទ្ធី សិទ្ធី ខនសឺវេសិន ឌីវេឡុបមិន នឹងចេញមុខដោះស្រាយឬទេ?
ទាក់ទិនករណីខាងលើ ប្រជាពលរដ្ឋរងគ្រោះបានទទូចស្នើសុំទៅដល់លោក ធឹម សំអាន ចៅហ្វាយខណ្ឌព្រែកព្នៅមេត្តាជួយដោះស្រាយជូនពួកគាត់ដោយក្ដីអនុគ្រោះ ដោយពួកគាត់ទាំង២០គ្រួសារ មិនអាចទ្រាំនូវទង្វើភូតកុហករបស់លោក ឌី សិទ្ធី ម្ដងហើយម្ដងទៀត ដែលតែងតែធ្វើនូវលិខិតពន្យារពេលជាច្រើនលើក ច្រើនសារដែលមិនអាចទទួលយកបាន ហើយពួកយើងខ្ញុំ និងអាចប្រឈមមុខនិងការគេរឹបអូសយកផ្ទះសម្បែងដែលពួកយើងខ្ញុំទាំងអស់គ្នាបានទៅខ្ចីលុយចងការប្រាក់ដើម្បីទិញផ្ទះរបស់បុរីមួយនេះ។ ដូចច្នេះមានតែលោកអភិបាលខណ្ឌដែលជាអាណាព្យាបាលដើម្បីជួយផ្ដល់នៅភាពយុត្តិធម៌ដល់ពួកយើងខ្ញុំជាជនរងគ្រោះ៕
