សម្តេចធិបតី ហ៊ុន ម៉ាណែត បានចំណាយពេលជាងមួយម៉ោងពិសារអាហារពេលព្រឹកពិភាក្សាលេីវិស័យផលិតជីសរីរាង្គនិងពង្រីកវិស័យទេសចរណ៍ធម្មជាតិជាមួយឯកឧត្ដម ម៉ុង ឬទ្ធី
ភ្នំពេញ៖ នាវេលាម៉ោង៨ព្រឹក ថ្ងៃសុក្រ ១កើត ខែកត្តិក ឆ្នាំរោង ឆស័ក ពុទ្ធសករាជ ២៥៦៨ត្រូវនឹងថ្ងៃទី១ ខែវិច្ឆិកា ឆ្នាំ២០២៤ សម្តេចមហាបវរធិបតី បានផ្តល់កិត្តិយសដ៏មហាខ្ពង់ខ្ពស់បំផុត ពិសារអាហារពេលព្រឹកពិភាក្សាលេីវិស័យផលិតជីសរីរាង្គ (ជីធម្មជាតិ) ដេីម្បីលក់ចែកជូនប្រជាកសិករយេីងក្នុងតម្លៃទាបជាងជីនាំចូលមកពីបរទេស និងជួយជំរុញពង្រីកវិស័យទេសចរណ៍ធម្មជាតិអោយកាន់តែច្រើនបន្ថែមទៀត។ នេះបើតាមការលើកឡើងរបស់ឯកឧត្ដមបណ្ឌិត ម៉ុង ឬទ្ធី សមាជិកព្រឹទ្ធសភារបស់គណបក្សប្រជាជនកម្ពុជា និងជាស្ថាបនិកនៃក្រុមហ៊ុន Mong Rithy Group Ltd នៅលើបណ្ដាញសង្គមហ្វេសប៊ុកផ្ទាល់ខ្លួនរបស់ដែលបណ្ដាញសារព័ត៌មាន The Mirror News ទទួលបាននៅថ្ងៃទី០១ ខែវិច្ឆិកា ឆ្នាំ២០២៤នេះ។
ឯកឧត្ដមបណ្ឌិត ម៉ុង ឬទ្ធី បានបញ្ជាក់ឲ្យដឹងថា ក្រោយពីបានជួបពិភាក្សារយៈពេលមួយម៉ោងដប់ប្រាំនាទីរួចមក ឯកឧត្ដមសូមកោតសរសើរនិងវាយតម្លៃខ្ពស់បំផុត ចំពោះសម្តេចធិបតីឈ្លាសវៃដ៏ខ្ពង់ខ្ពស់បំផុត ស្ទើរតែគ្រប់ពាក្យទាំងអស់សម្តេចគិតគូរតែពីផលប្រយោជន៍ជាតិ និងប្រជាជន។
ឯកឧត្ដមបណ្ឌិតសូមថ្លែងអំណរគុណយ៉ាងជ្រាលជ្រៅបំផុត ដែលសម្តេចបានផ្តល់កិត្តិយសដល់រូបលោកនាឱកាសនេះ។
ឯកឧត្ដមស្ថាបនិកនៃក្រុមហ៊ុន Mong Rithy Group Ltd បានបញ្ជាក់ទៀតថា ឯកឧត្ដមនឹងខិតខំប្រឹងប្រែងរកគ្រប់មធ្យោបាយ ដេីម្បីអនុវត្តអោយបានតាមអនុសាសន៍របស់សម្តេច ដេីម្បីបានចូលរួមចំណែកបម្រេីជាតិប្រជាជន លេីវិស័យកសិកម្ម កសិ-ឧស្សាហកម្ម និងទេសចរណ៍ធម្មជាតិនេះ។
នៅលើទំព័រហ្វេសប៊ុក សម្តេចមហាបវរធិបតី ហ៊ុន ម៉ាណែត បានអរគុណឯកឧត្ដមបណ្ឌិត ម៉ុង ឬទ្ធី សមាជិកព្រឹទ្ធសភារបស់គណបក្សប្រជាជនកម្ពុជា និងជាស្ថាបនិកនៃក្រុមហ៊ុន Mong Rithy Group Ltd ដែលបានចែករំលែកបទពិសោធន៍ និងស្ម័គ្រចិត្តចូលរួមរកដំណោះស្រាយជាយុទ្ធសាស្ត្រសំខាន់មួយសម្រាប់វិស័យកសិកម្ម និងកសិករយើង៕
