កម្លាំងប៉ូលិសស្រុកថ្មគោលឃាត់ខ្លួនបុរសម្នាក់ប្រើប្រាស់កូនកន្រ្តៃចាក់ទៅលើបុរស២នាក់បណ្តាលឲ្យរងរបួលធ្ងន់

បាត់ដំបង៖ នៅថ្ងៃទី០១ ខែវិច្ឆិកា ឆ្នាំ២០២៤ វេលាម៉ោង២០៖៣០នាទី នៅចំណុចក្រុមទី១២ ភូមិជ្រោយស្ដៅ ឃុំជ្រោយស្ដៅ ស្រុកថ្មគោល ខេត្តបាត់ដំបង មានករណីប្រើអំពើហិង្សា ដោយចេតនាមានស្ថានទម្ងន់ទោស (ប្រើប្រាស់កូនកន្រ្តៃចាក់) មួយកើតឡើង ដែលបង្កដោយជនង្ស័យម្នាក់ ឈ្មោះ ទូច ចេក ភេទប្រុស អាយុ៤៥ឆ្នាំ មានទីលំនៅភូមិជ្រោយស្ដៅ ឃុំជ្រោយស្ដៅ ស្រុកថ្មគោល បានធ្វេីសកម្មភាពយកកូនកន្រ្តៃចាក់ទៅលើជនរងគ្រោះចំនួន ០២នាក់៖ ១-ឈ្មោះ ផុន សុភ័ក្រ ហៅតាក់ ភេទប្រុស អាយុ២២ឆ្នាំ មានទីលំនៅភូមិជ្រោយស្តៅ ឃុំជ្រោយស្តៅ ស្រុកថ្មគោល ខេត្តបាត់ដំបង (រងរបួសមុតលេីខ្នងដៃខាងឆ្វេងដាច់សរសៃ) និង២-ឈ្មោះ ផុន សាងឿន ភេទប្រុស អាយុ៤៤ឆ្នាំ មានទីលំនៅភូមិជ្រោយស្តៅ ឃុំជ្រោយស្តៅ ស្រុកថ្មគោល ខេត្តបាត់ដំបង (រងរបួសមុតចំដេីមទ្រូងចំនួន០២កន្លែង)។

ក្រោយពីបានទទួលបណ្តឹងពីជនរងគ្រោះ កម្លាំងជំនាញនគរបាលព្រហ្មទណ្ឌ រួមជាមួយកម្លាំងប៉ុស្តិ៍នគរបាលរដ្ឋបាល នៃអធិការដ្ឋានគរបាលស្រុកថ្មគោល ដឹកនាំដោយលោកវរសេនីយ៍ទោ សេង លុច អធិការនគរបាលស្រុកថ្មគោល បានចុះធ្វើការស្រាវជ្រាវឃាត់ខ្លួនជនសង្ស័យម្នាក់ ឈ្មោះ ទូច ចេក ភេទប្រុស អាយុ៤៥ឆ្នាំ មកកាន់អធិការដ្ឋាននគរបាលស្រុកថ្មគោលដើម្បីធ្វើការសាកសួរ ។

ក្រោយពីសាកសួរជនសង្ស័យបានសារភាពថា ខ្លួនស្រវឹងស្រាខឹង និងជនរងគ្រោះឈ្មោះ ផុន សាងឿន និយាយថា ស្រវឹង ហេីយកុំអោយប៉ះពាល់ម្ដាយក្មេកខ្លួន។ វត្ថុតាងដកហូតបាន៖ កូនកន្រ្តៃចំនួន០១។

បច្ចុប្បន្នជនសង្ស័យខាងលេី ត្រូវសមត្ថកិច្ចជំនាញកំពុងកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី៕