Breaking News: មានករណីបាញ់ប្រហារលើជនរងគ្រោះប្តីនិងប្រពន្ធនៅក្រុងតាខ្មៅ ខណៈជនសង្ស័យត្រូវបានសមត្ថកិច្ចឃាត់ខ្លួន

កណ្ដាល៖ នៅមុននេះបន្តិចមានករណីបាញ់ប្រហារលើជនរងគ្រោះប្តីនិងប្រពន្ធនៅចំណុចផ្លូវចូលស្រាបៀអង្គរ ភូមិព្រែកឬស្សីលិច សង្កាត់ព្រែកឬស្សី ក្រុងតាខ្មៅ ខេត្តកណ្ដាល។ នេះបើតាមប្រភពដែលបណ្ដាញសារព័ត៌មាន The Mirror News ទើបទទួលបាននៅយប់ថ្ងៃទី១៧ ខែវិច្ឆិកា ឆ្នាំ២០២៤នេះ។

បើតាមប្រភពព័ត៌មានបឋមពីក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាលបានឲ្យដឹងថា ចំពោះជនសង្ស័យត្រូវបានសមត្ថកិច្ចបានឃាត់ខ្លួន រីឯជនរងគ្រោះកំពុងតែសង្គ្រោះនៅមន្ទីរពេទ្យបង្អែកជ័យជំនះ។

្តបើតាមប្រភពព័ត៌មានពីមន្ត្រីជំនាញបានឲ្យដឹងដែរថា ករណីមានគេបាញ់ប្ដីប្រពន្ធខាងលើនេះ ដោយសារបន្ទប់ជួលនៅជាប់គ្នា ហើយមានភាគីម្ខាងផឹកស្រវឹង ឡូឡារ និយាយលឺៗរំខានដល់ដំណេកភាគីម្ខាងទៀត និងមានទំនាស់ជាមួយគ្នាពីរបីថ្ងៃមកហើយ ទើបបង្កឲ្យមានអំពើហិង្សាផ្ទុះអាវុធនេះកើតឡើង។

ទាក់ទិនហេតុការណ៍ខាងលើនេះ ក្រោយកើតហេតុភ្លាម ឯកឧត្ដម គួច ចំរើន អភិបាលខេត្តកណ្ថាលអមដំណើរដោយលោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាលបានដឹកនាំបញ្ជាកម្លាំងជំនាញចុះទៅដល់ទីតាំងកើតហេតុដើម្បីពិនិត្យនិងអន្តរាគមន៍ភ្លាមៗផងដែរ។

ចំពោះព័ត៌មានលម្អិតបន្ថែមទៀតបណ្ដាញសារព័ត៌មាន The Mirror Newsនឹងធ្វើការផ្សព្វផ្សាយជូននាពេលក្រោយ៕