ធនាគារ Maybank ប្រកាសចូលរួមជួយជនមានពិការភាពនៅកម្ពុជា

ក្នុងពិធីអបអរសាទរខួបលើកទី៣០ឆ្នាំ នៃការបង្កើតធនាគារ Maybank នៅកម្ពុជា ធនាគារនេះ បានចុះអនុស្សារណៈនៃកិច្ចសហប្រតិបត្តិការជាមួយក្រសួងសង្គមកិច្ច អតីតយុទ្ធជន និងយុវនីតិសម្បទាដើម្បីដាក់ដំណើរការកម្មវិធីជំនួយសង្គមថ្មីមួយឈ្មោះថា REACH INDEPENDENCE AND SUTAINABLE ENTREPRENEURSHIP (R.I.S.E) នៅយប់ថ្ងៃសុក្រ ទី២៤ ខែវិច្ឆិកានេះ។

ពិធីចុះអនុស្សារណៈនៃកិច្ចសហប្រតិបត្តិការនេះ ធ្វើឡើងរវាងនាយកប្រតិបត្តិនៃមូលនិធិនៃធនាគារ មេយប៊ែងលោកស្រី Izlyn Ramli ជាមួយតំណាងរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម ឯម ច័ន្ទមករា រដ្ឋលេខាធិការ និងជាអគ្គលេខាធិការក្រុមប្រឹក្សាសកម្មភាពជនពិការ។

ទេសាភិបាលរងធនាគារជាតិនៃកម្ពុជាលោកស្រី អ៊ុក ម៉ាលី បានចាត់ទុកការចុះអនុស្សារណៈនេះជាការជួយដល់កម្ពុជាបន្ថែមទៀតលើគម្រោងដែលធនាគារនេះធ្លាប់បានជួយស្រាប់នៅកម្ពុជា។ លោកស្រីថា៖ «ចំពោះការចុះអនុស្សរណៈនៃ ការយោគយល់នេះ គឺជាកម្មវិធីសង្គមមួយថ្មីទៀត ក្នុងការជួយ បង្កើនចំណូលសម្រាប់សហគមន៍ងាយរងគ្រោះ ដោយផ្តោតសំខាន់ទៅ លើបុគ្គលដែលមានពិការភាពតាមរយៈវគ្គបណ្តុះបណ្តាលសហគ្រិន- ភាព។ ក្នុងនាមធនាគារជាតិនៃកម្ពុជា និងរូបខ្ញុំផ្ទាល់ សូម ថ្លែងអំណរ គុណ និងសូមលើកទឹកចិត្តដល់ភាគទុនិកៈ និងគណៈគ្រប់គ្រងរបស់ ធនាគារ បន្តជួយដល់សហគមន៍បន្តទៀត»។

R.I.S.E គឺជាកម្មវិធីដែលត្រូវបានផ្តួចផ្តើមក្នុង ឆ្នាំ២០១៤ ដោយមូលនិធិមេយប៊ែងក្នុងគោលបំណងពង្រឹង និងបង្កើនចំណូលសម្រាប់សហគមន៍ងាយរងគ្រោះ ដែលផ្តោតសំខាន់ទៅលើបុគ្គលដែលមានពិការភាព (PWD/ People with Disability) តាមរយៈវគ្គបណ្តុះបណ្តាលសហគ្រិនភាព។

បន្ទាប់ពីត្រូវបានផ្តួចផ្តើមឡើងកម្មវិធីនេះបាន បណ្តុះបណ្តាលអ្នកចូលរួមសរុបប្រមាណ ៣០៤៥៧នាក់ ដែលក្នុងនោះ ២៥ ០៤១ គឺជាជនមានពិការភាព។ បន្ទាប់ពីបានចូលរួមកម្មវិធីនេះ ជាមធ្យមអ្នកចូលរួមទទួលបាន កំណើនប្រាក់ចំណូលប្រមាណ ២៨០,៧៩% បើធៀបនឹងមុនពេលពួកគេបានចូលរួមក្នុងកម្មវិធីនេះ។

កម្មវិធីនេះត្រូវបានដំណើរការ តាមបណ្តា ប្រទេសចំនួន៥ ដែលធនាគារ មេយប៊ែង រួមមានប្រទេសម៉ាឡេស៉ី ប្រទេសឥណ្ឌូនេស៊ី ប្រទេសហ្វីលីពីន ប្រទេស R.I.S.E program begin ឡាវ និងប្រទេសកម្ពុជាដែលកម្មវិធីនេះបាន ចាប់អនុវត្តសាកល្បង ថ្មីៗនេះនៅកម្ពុជា កាលពីដើមខែ វិច្ឆិកា ឆ្នាំ២០២៣។

ស្ថិតក្នុងគម្រោងនៃការចាប់ផ្តើមប្រតិបត្តិការ នៃកម្មវិធីនេះ ធនាគារមេយប៊ែងគ្រោងនឹង ចាប់ដៃគូជាមួយនឹងស្ថាប័ន និងក្រសួងពាក់ ព័ន្ធនានា ដែលមានទិសដៅដូចគ្នា ដើម្បីពង្រឹងការអនុវត្តកម្មវិធីនេះអោយកាន់តែមានភាពប្រសិទ្ធិភាព។ ក្នុងចំណោមស្ថាប័នទាំងនោះផងដែរគឺមាន ក្រសួងសង្គមកិច្ច អតីតយុទ្ធជន និងយុវនិតិសម្បទាផងដែរ៕