ចាប់ទៅ មិនចាំបាច់សុំយោបល់ទេ យើងត្រូវព្យាយាមរួមគ្នាលុបបំបាត់ទង្វើខ្វះភាពសុចរិតបែបនេះ!

ភ្នំពេញ៖ ឯកឧត្តមបណ្ឌិត ហ៊ុន ម៉ាណែត ជំរុញឲ្យអាជ្ញាធរមានសមត្ថកិច្ចចាប់ខ្លួនជនទាំងឡាយណា ដែលយកឈ្មោះលោកទៅប្រើប្រាស់ ធ្វើរឿងខុសច្បាប់។

ឯកឧត្តមបណ្ឌិត ហ៊ុន ម៉ាណែត នៅលើ Facebook នាព្រឹកថ្ងៃទី២៧ ខែមីនា ឆ្នាំ២០២៣នេះ បានបញ្ជាក់យ៉ាងច្បាស់ៗថា ទោះបីជាជំនួយការដែលដើរជាមួយលោករាល់ថ្ងៃក្តី បើធ្វើខុសច្បាប់ សូមអាជ្ញាធរចាប់ចុះ ហើយបើអ្នកយកឈ្មោះលោកប្រើខុសច្បាប់ លោកនឹងប្តឹងបន្ថែមទៀត។

ឯកឧត្តមបណ្ឌិតបានលើកឡើងពីករណីមួយ ដែលមានគេយកឈ្មោះថាជាជំនួយការពិសេសរបស់លោក ហើយទៅចាប់ដីខុសច្បាប់នៅខេត្តព្រះសីហនុ កាលពីពេលកន្លងទៅ ទាំងលោកមិនស្គាល់ជនខិលខូចរូបនោះឡើយ។

ឯកឧត្តមបណ្ឌិតបន្តថា​ «អ្នកណាដែលយកឈ្មោះខ្ញុំ ជាជំនួយការស្អីក៏ដោយ ឲ្យតែធ្វើខុសច្បាប់ចាប់ទៅមិនបាច់ទទួលយោបល់ទេ ហើយប្រាប់មកខ្ញុំ ខ្ញុំប្តឹងថែមទៀត ព្រោះទី១អ្នកឯងធ្វើខុសច្បាប់ អាជ្ញាធរប្តឹង តែខ្ញុំនឹងប្តឹងរឿងយកឈ្មោះខ្ញុំទៅប្រើ។ អ្នកបានរូបថតមួយប៉ុស្តិ៍មកជាមួយខ្ញុំ ដើរទៅធ្វើបាបគេ ខ្ញុំថតសែលហ្វី ជាមួយរាប់រយរាប់ពាន់នាក់ អ្នកខ្លះអីចឹង។ ថ្ងៃមុនគេមកសួរខ្ញុំថា បងមានម្នាក់ថតរូបជាមួយបងឯង ទៅគៀបគេនៅកំពង់សោមថាជាជំនួយការផ្ទាល់បងឯង ហើយបងឯងឲ្យជាបេសកជនពិសេសចុះទៅចាប់ដី ចាប់ទៅ ចាប់មិនបាច់សួរទេ ជំនួយការខ្ញុំក៏ដោយ ដើរជាមួយខ្ញុំរាល់ថ្ងៃក៏ដោយឲ្យតែធ្វើខុសចាប់ទៅ និយាយឲ្យច្បាស់»។

ឯកឧត្តមបន្តទៀតថា «អ្នកខ្លះសុទ្ធថាជំនួយការគៀក ជំនួយការស្អិត ជំនួយការផ្ទាល់ ជំនួយការពិសេស អ្នកដែលគេថាឲ្យខ្ញុំថាជាជំនួយការពិសេស បេសកកម្មពិសេសចុះទៅយកដីខ្ញុំអត់ទាំងចាំថាថតពេលណាផង បេសកជនចាប់ដី ខ្ញុំថាមិនបាច់សួរទេឲ្យតែអ្នកខុសចាប់ទៅ ធ្វើតាមច្បាប់ទៅ ហើយប្រាប់ខ្ញុំស្រួលទៀត ខ្ញុំនឹងប្តឹងបន្តទៀត អីចឹងបើថ្ងៃក្រោយអាជ្ញាធរគេដកពាក្យបណ្តឹងក៏នៅជាប់ពាក្យបណ្តឹងរបស់ខ្ញុំដែរ ព្រោះធ្វើឲ្យខូចឈ្មោះ ខំចង់ងាប់រកតែពេលជួបប្រពន្ធកូនពុំបាន មកសន្សំបុណ្យបានតិចៗ ស្រាប់តែគេយកមកកំពប់ចោលទាំងអស់»។

ឯកឧត្តមបណ្ឌិតបញ្ជាក់ថា ការឆ្លៀតឱកាសប្រើប្រាស់ឈ្មោះរបស់ឥស្សរជនសំខាន់ៗ រួមទាំងរូបលោក ពីសំណាក់បុគ្គលមួយចំនួន ដើម្បីប្រព្រឹត្តិនូវអំពើមិនល្អ ធ្វើឲ្យប៉ះពាល់យ៉ាងធ្ងន់ធ្ងរទៅលើសិទ្ធិ និងផលប្រយោជន៍របស់ប្រជាពលរដ្ឋដទៃទៀត ដែលទាមទារត្រូវព្យាយាមរួមគ្នាលុបបំបាត់ទង្វើខ្វះភាពសុចរិតបែបនេះ៕