«គោលនយោបាយ ភូមិ-ឃុំ-សង្កាត់មានសុវត្ថិភាពពិតជាបានរួមចំណែកយ៉ាងសំខាន់ក្នុងការដោះស្រាយទុក្ខលំបាក ប្រកបដោយភាពវិជ្ជមាន…»

កណ្ដាល៖ «គោលនយោបាយ ភូមិ-ឃុំ-សង្កាត់មានសុវត្ថិភាពពិតជាបានរួមចំណែកយ៉ាងសំខាន់ ក្នុងការដោះស្រាយទុក្ខលំបាក ប្រកបដោយភាពវិជ្ជមាន និងក្តីកង្វល់ផ្សេងៗ របស់ប្រជាពលរដ្ឋក្នុងមូលដ្ឋាន និងលើកកម្ពស់បន្ថែមទៀតនូវការងាររក្សាសន្តិសុខ សណ្តាប់ធ្នាប់សាធារណៈ ដើម្បីធានារក្សាបាននូវសន្តិសុខសង្គម ស្ថិរភាពនយោបាយ និងនិរន្តរភាព ឱ្យបានល្អប្រសើរ និងជម្រុញ ដល់មន្ត្រីទាំងអស់ បន្តសហការ និងកិច្ចសហប្រតិបត្តិការឱ្យបានល្អប្រើសើរ ដើម្បីធានាដល់សុខសុវត្ថិភាពដល់បងប្អូនប្រជាពលរដ្ឋក្នុងមូលដ្ឋាន»។ នេះជាការលើកឡើងរបស់លោក ណុប ដារ៉ា អភិបាលរងខេត្តកណ្តាលនារសៀលថ្ងៃទី ០៥ ខែមេសា ឆ្នាំ២០២៣ក្នុងកិច្ចប្រជុំជំរុញការអនុវត្តគោលនយោបាយ ភូមិ ឃុំ មានសុវត្តិភាព នៅស្រុកល្វាឯម។

នាឱកាសនោះ លោក ណុប ដារ៉ា បាន «ជំរុញដល់គណ:បញ្ជាការឯកភាពរដ្ឋបាលស្រុកល្វាឯម បន្តយកចិត្តទុកដាក់បន្ថែមទៀតក្នុងកិច្ចការងារអនុវត្តគោលនយោបាយ ភូមិ ឃុំ មានសុវត្ថិភាពបន្ថែមទៀត លើបញ្ហាគ្រឿងញៀនហាមដាច់ខាតកុំអោយមានការជក់គ្រឿងញៀន ចរាចរណ៍គ្រឿងញៀន ព្រោះបញ្ហាគ្រឿងញៀននេះវាធ្វើឲ្យសង្គមមួយមានភាពអសន្តិសុខ បង្កឲ្យមានចោរលួច ចោរប្លន់ និងក្មេងទំនើង ពិសេសក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខនេះ ប្រកបដោយសុខសុវត្ថិភាព របៀបរៀបរយ ពិសេសបង្កនូវភាពសប្បាយរីករាយជូនបងប្អូនប្រជាពលរដ្ឋឱ្យបានគ្រប់ៗគ្នា ក្នុងមូលដ្ឋានរបស់ខ្លួនបន្តទៀត»។

ជាមួយគ្នានោះ លោកអភិបាលរងខេត្តបានផ្ដាំផ្ញើដល់កងកម្លាំងគ្រប់លំដាប់ថ្នាក់ អាជ្ញាធរមូលដ្ឋាន ត្រូវជៀសឱ្យបានដាច់ខាតក្នុងការនៅពីក្រោយល្បែងស៊ីសង កុំនៅពីក្រោយបទល្មើសនានាក្នុងមូលដ្ឋាន ពិសេសកុំអន្តរាគមន៍រាល់បទល្មើស និងល្បែងស៊ីសងទាំងអស់នៅក្នុងមូលដ្ឋានរបស់ខ្លួន។

ទន្ទឹមគ្នានោះលោក ណុប ដារ៉ា បានគូសបញ្ជាក់ថា ក្នុងករណីដែលគណៈបញ្ជាការឯកភាពខេត្តរកឃើញមានមន្ត្រីណាម្នាក់នៅពីក្រោយល្បែងស៊ីសង ឬបទល្មើសនានា មន្ត្រីម្នាក់នោះនឹងត្រូវប្រឈម និងការដាក់ពិន័យតាមច្បាប់ជាធរមាន៕ ដោយ៖ ការីនិពន្ធ