លោកចៅហ្វាយក្រុងដូនកែវគួរកាន់អំបោសដឹកនាំចៅសង្កាត់រកាក្នុងបោសសម្អាតបរិស្ថាននិងរៀបចំសណ្ដាប់ធ្នាប់ក្នុងសង្កាត់គាត់ឲ្យបានស្អាតផង ដើម្បីក្រុងកាន់តែមានសោភ័ណភាពល្អប្រសើរ

(តាកែវ)៖ ក្រុងដូនកែវត្រូវបានគេមើលឃើញថា មានសភាពស្ងាត់ជ្រងំហាក់ដូចជាមិនមានការអភិវឌ្ឍន៍អ្វីគួរឲ្យកត់សម្គាល់។ ច្រើនជំនាន់ថ្នាក់ដឹកនាំខេត្ត,រដ្ឋបាលក្រុងហាក់ដូចជាព្រងើយកន្តើយចំពោះការរៀបចំសោភ័ណភាពក៏ដូចជាសណ្ដាប់ធ្នាប់ និងបរិស្ថាន។ ករណីនេះឆ្លុះបញ្ចាំងអំពីរបៀបរបបដឹកនាំការងាររបស់រដ្ឋបាលក្រុង ក៏ដូចជាអាជ្ញាធរពាក់ព័ន្ធមួយចំនួនទៀត។ បែបនេះគឺជារបៀបរបបនៃការរស់នៅតាមដំណើរនៃធម្មជាតិ។ បើមិនដូច្នោះទេលោក កង អាណាន់ អភិបាលក្រុងដូនកែវគួរតែកាន់អំបោសដឹកនាំចៅសង្កាត់រកាក្នុងចុះបោសសម្អាតបរិស្ថាននិងរៀបចំសណ្ដាប់ធ្នាប់ក្នុងសង្កាត់គាត់ឲ្យបានស្អាត ដើម្បីក្រុងកាន់តែមានសោភ័ណភាពល្អប្រសើរ និងអាចធ្វើឲ្យលោកចៅសង្កាត់រូបនេះកាន់តែសកម្មជាងនេះ។

ម្យ៉ាងទៀតគេក៏ប្រទះឃើញមានសំណង់មិនរៀបរយបានសាងសង់នៅលើចិញ្ចើមផ្លូវនៅខាងក្រោយសាលាដំបូងខេត្តតាកែវ និងមុខរតនាគារខេត្ត។ ទិដ្ឋភាពបែបនេះមើលទៅហាក់ដូច ជាទើសភ្នែកសម្រាប់ភ្ញៀវទេសចរណ៍ មិនថា អន្តរជាតិឬក្នុងស្រុកនោះទេ។ នៅតាមដងផ្លូវក្បែរៗនោះ គេឃើញមានដើមឈើដុះនៅលើចិញ្ចើមផ្លូវ ដោយគ្មានការសម្អាតអ្វីសោះឡើយ។ នៅតាមផ្លូវជាច្រើនខ្សែ ក្នុងក្រុងដូនកែវក្រៅពីមានសំរាមនៅរាយប៉ាយ ក៏នៅមានបញ្ហាបរិស្ថានផ្សេងទៀតដែលកំពុងហ៊ុំព័ទ្ធទីក្រុងមួយនេះ។

ប្រជាពលរដ្ឋនៅក្នុងក្រុងដូនកែវរង់ចាំមើលចំណាត់ការរបស់រដ្ឋបាលក្រុងជុំវិញបញ្ហាបរិស្ថាន,សំណង់មិនរៀប រយ…ក៏ប៉ុន្តែរដ្ឋបាលក្រុងហាក់ដូចជាធ្វើមិនដឹងមិនឮ ឬ បណ្តែតបណ្ដោយឲ្យបញ្ហានេះនៅតែកើតឡើងដដែល។ នៅពេលបញ្ហានេះទុកយូរដដែលៗទៅវាក្លាយទៅជារឿងធម្មតាសាមញ្ញរបស់ប្រជាពលរដ្ឋ ដោយមិនគិតថា វាជាចំណុចអវិជ្ជមានសម្រាប់ទីក្រុងនោះឡើយ។ ក្នុងន័យនេះមិនមែនមានន័យថា ប្រជាពលរដ្ឋគ្មានសេចក្តីភ្ញាក់រលឹកចំពោះបញ្ហាសោភ័ណភាពឬបរិស្ថាននោះទេ។ ប៉ុន្តែអ្វីៗត្រូវផ្ដើមគំនិតពីថ្នាក់ដឹកនាំ។

នៅតាមចិញ្ចើមផ្លូវក្រៅពីចំណោទ នៃបញ្ហាបរិស្ថានដូចជាសំបកដប,កំប៉ុងជាដើមនោះ គេឃើញមានដើម ឈើដុះស៊ុបទ្រុប..ដែលមិនសមជាទីក្រុងនោះឡើយ។ បញ្ហាទាំងនេះមិនចាំបាច់ត្រូវមានផែនការ ឬយុទ្ធសាស្ត្រវែងឆ្ងាយអ្វីដើម្បីសំអាតនោះឡើយដោយគ្រាន់តែអំពាវ នាវឲ្យមានការចូលរួមពីប្រជាពលរដ្ឋ ដែលមានលំនៅ ឋានតាមដងផ្លូវ ឬផ្លូវដែលគ្មានផ្ទះប្រជាពលរដ្ឋនៅអាចចលនាជាមួយប្រជាការពារភូមិឬសមាជិកក្រុមប្រឹក្សាសង្កាត់ចូលរួមកាប់សម្អាតតែមួយព្រឹកគឺស្អាតបាតរួច រាល់ហើយ។ ប៉ុន្តែតាមមើលទៅរដ្ឋបាលក្រុងដូនកែវចាត់ទុករឿងនេះជាបញ្ហាធម្មតា៕