កីឡាការិនីកម្ពុជា ស្រួង ភាវី ប្រកាសយកថវិកាទាំងអស់ដែលទទួលបានពីការប្រកួតស៊ីហ្គេម២០២៣ ចូលមូលនិធិសប្បុរសធម៌ទាំងអស់
ភ្នំពេញ៖ កីឡាការិនី ស្រួង ភាវី បន្ទាប់ពីយកបានមេដាយមាស លើវិញ្ញាសាប៊ីយ៉ាការ៉ុម ៣បាំង ជូនជាតិមាតុភូមិនៃព្រឹត្តិការណ៍កីឡាស៊ីហ្គេម២០២៣ កាលពីពេលថ្មីៗនេះ ប្រកាសយកថវិកាទាំងអស់ដែលទទួលបានពីការប្រកួតស៊ីហ្គេម២០២៣ចូលមូលនិធិសប្បុរសធម៌ទាំងអស់។ នេះបើតាមប្រភពដែលបណ្ដាញសារព័ត៌មាន The Mirror News ទទួលបានពីទំព័រហ្វេសប៊ុកកីឡាការិនី ស្រួង ភាវី នៅព្រឹកថ្ងៃទី១៤ ខែឧសភា ឆ្នាំ២០២៣។
បើតាមកីឡាការិនី ស្រួង ភាវី បានលើកឡើងនៅលើទំព័រហ្វេសប៊ុកថា រាល់ថវិកាដែលគាត់ប្រកួតបានជ័យជម្នះបានទាំងប៉ុន្មាន ក្នុងការប្រកួតឈ្នះ ឬចាញ់ ទោះតិចក្ដី ច្រើនក្ដី គឺគាត់ប្រមូលដាក់ទៅក្នុងមូលនិធិសប្បុរសធម៌ទាំងអស់។
កីឡាការិនី ស្រួង ភាវី បានបន្តទៀតថា ហើយតាមពិតទៅ គាត់មិនមែនជាមានទ្រព្យធនច្រើនអីទេ តែគាត់ធ្វើនេះគឺព្រោះចង់បង្ហាញឱ្យឃើញថា រាល់សកម្មភាពពីមុន និងឥឡូវ ហើយទៅអនាគតគឺនៅដដែល ក្នុងការជួយដល់ប្អូនៗនៅក្នុងប្រទេសខ្មែរដែលត្រូវការជំនួយជាចាំបាច់ក្នុងការស្វែងរកការរៀនសូត្រក្រេបយកចំណេះដឹងទៅអនាគត។
កីឡាការិនី ស្រួង ភាវី បានគូសបញ្ជាក់ថា គាត់ផ្ទាល់ទាំងបេះដូងនិងអាយុជីវិតគឺ គាត់លះបង់ដេីម្បីកម្ពុជា…អរគុណពុកម៉ែបងប្អូនណាស់៕
