ទីបំផុត, សាលាដំបូងខេត្តតាកែវចេញដីកាបង្គាប់ឲ្យឃុំខ្លួនប៉ូលីសសេដ្ឋកិច្ចប្រចាំការនៅច្រកទ្វារអន្តរជាតិភ្នំដឹនហើយ

តាកែវ៖ នៅទីបំផុត, សាលាដំបូងខេត្តតាកែវកាលពីថ្ងៃទី០៥ ខែកក្កដា ឆ្នាំ២០២៣នេះ បានសម្រេចចេញដីកាបង្គាប់ឲ្យឃុំខ្លួនមន្ត្រីនគរបាលម្នាក់ដែលបានផ្ទុះអាវុធនៅច្រកទ្វាអន្តរជាតិភ្នំដិនកាលពីប៉ុន្មានថ្ងៃមុន និងបានបង្កឲ្យមានការភ្ញាក់ផ្អើលទាំងយប់ដល់ប្រជាពលរដ្ឋហើយ។ នេះបើតាមប្រភពដែលបណ្ដាញសារព័ត៌មាន The Mirror News ទទួលបាននៅរសៀលថ្ងៃទី០៦ ខែកក្កដា ឆ្នាំ២០២៣។

ប្រភពព័ត៌មានបានឲ្យដឹងថា នៅក្នុងដីកាបង្គាប់ឲ្យឃុំខ្លួនចេញដោយ លោក គុជ តារ៉ា ចៅក្រមស៊ើបសួរសាលាដំបូងខេត្តតាកែវ បង្ហាញថា ឈ្មោះ ណុប សំបូរ ភេទប្រុស អាយុ៣១ឆ្នាំ ជនជាតិខ្មែរ មុខរបរជាមន្ត្រីនគរបាលជាតិនៃស្នងការដ្ឋាននគរបាលខេត្តតាកែវ ទីលំនៅបច្ចុប្បន្នភូមិកំពង់អំពិល ឃុំបូរីជលសារ ស្រុកបូរីជលសារ ខេត្តតាកែវ ត្រូវបានដាក់ឲ្យស្ថិតនៅក្រោមការពិនិត្យពីបទ៖ ចាត់វិធានការសំដៅរារាំងការអនុវត្តច្បាប់និងស្ថានទម្ងន់ទោស, បទប្រឆាំងនឹងអ្នករាជការសាធារណៈមានស្ថានទម្ងន់ទោស, បទកាន់កាប់ប្រើប្រាស់អាវុធដោយគ្មានការអនុញ្ញាតនិងបទបង្កឧបសគ្គឬធ្វើឲ្យរាំងស្ទះដល់ការអនុវត្តច្បាប់របស់មន្ត្រីគយ ប្រព្រឹត្តនៅចំណុចភូមិបន្ទាយ ឃុំជីខ្មា ស្រុកទ្រាំង ខេត្តតាកែវ កាលពីយប់ថ្ងៃទី០១ ខែកក្កដា ឆ្នាំ២០២៣។ ក្នុងដីកាគឺបានសម្រេច ឃុំខ្លួនជាបណ្តោះអាសន្នលេខ ៥១២ / ២០២៣ ចុះថ្ងៃទី០៥ ខែកក្កដា ឆ្នាំ២០២៣ នៅពន្ធនាគារខេត្តតាកែវ។

គួររំលឹកថា កាលពីយប់ថ្ងៃទី០១ ខែកក្កដា ឆ្នាំ២០២៣ ឈ្មោះ ណុប សំបូរ ជាមន្ត្រីប៉ូលីសសេដ្ឋកិច្ចប្រចាំការនៅច្រកទ្វារអន្តរជាតិភ្នំដឹន ស្រុកគីរីវង់ បានបង្ករឲ្យមានការផ្ទុះអាវុធ ចំពេលមន្ត្រីគយចល័តដែលបានកំពុងបំពេញការងារ ដែលមហាជនមើលឃើញថា ជាករណីកាងរថយន្តដឹកទំនិញ ហើយមិនព្រមបង់ពន្ធទៅគយចល័ត ទើបកើតមានជម្លោះនិងគ្នា រហូតមានការផ្ទុះអាវុធបែបនេះ៕