ក្មេងរើសអេតចាយបួនប្រាំនាក់វ៉ៃបែកកញ្ចក់ឡាននិងបណ្ដាលឲ្យអ្នករត់តាក់ស៊ីម្នាក់រងរបួសដោយសារជនរងគ្រោះបើករថយន្តស៊ីផ្លេច្រើនដងដាក់ពួកគេ

(ភ្នំពេញ)៖ ក្រោយមានការផ្សព្វផ្សាយព័ត៌មានតាមផេកហ្វេសប៊ុកឈ្មោះ «កឹម សុភេន កូនអ្នកស្វាយរៀង» ដែលមានខ្លឹមសារថាមានក្មេងស្ទាវចូលកាប់មនុស្សដល់ក្នុងផ្ទះហើយតេទូរស័ព្ទលេខ ហតឡាញ សមត្ថកិច្ចដើម្បីជួយអន្តរាគមន៍ប៉ុន្តែមិនលើក។

ចំពោះករណីនេះ ក្រោយកើតហេតុភ្លាម សមត្ថកិច្ចប៉ុស្តិ៍នគរបាលរដ្ឋបាលកាកាប១ នៃអធិការដ្ឋាននគរបាលខណ្ឌពោធិ៍សែនជ័យ និងអាជ្ញាធរមូលដ្ឋានបានចុះទៅដល់កន្លែងកើតហេតុភ្លាមៗផងដែរ។ ដោយករណីនេះជាការបំផ្លិចបំផ្លាញទ្រព្យសម្បត្តិអ្នកដទៃ គឺវ៉ៃបែកកញ្ចក់រថយន្តបណ្តាលឱ្យអ្នកបើករថយន្ត០១នាក់បែកកញ្ចក់ត្រូវរងរបួសស្រាល ដោយមូលហេតុជនរងគ្រោះបានបើករថយន្តស៊ីផ្លេជាច្រើនដងដាក់ក្មេងរើសអេតចាយមានគ្នាប្រមាណ៤ទៅ៥នាក់អង្គុយ និងឈរលើផ្លូវខាងមុខស្តង់ទិញអេតចាយនាំឱ្យក្រុមក្មេងរើសអេតចាយខឹងក៏តាមវ៉ៃកញ្ចក់រថយន្តជនរងគ្រោះបណ្តាលបែកកញ្ចក់ និងបានបណ្តាលឱ្យរងរបួសស្រាល។

ហេតុការណ៍នេះកើតឡើងនៅថ្ងៃទី០៨ ខែមីនា ឆ្នាំ២០២៥ វេលាម៉ោងប្រហែល០៦:២០នាទីព្រឹក នៅចំណុចភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ។ ក្រុមជនសង្ស័យក្រោយបង្កហេតុបានរត់គេចខ្លួនភ្លាមៗ មុនពេលដែលសមត្ថកិច្ចទៅដល់។

បន្ទាប់មកសមត្ថកិច្ចបានទទួលពាក្យបណ្តឹងពីជនរងគ្រោះ ឈ្មោះ ភី គង់នីត ភេទប្រុស អាយុ៣៥ឆ្នាំមុខរបរ បើកបររថយន្តតាក់ស៊ី ទីលំនៅបន្ទប់ជួល ភូមិតាងួន២ សង្កាត់កាកាបទី១។ សម្ភារខូចខាតកញ្ចក់រថយន្តចំហៀង១ផ្ទាំង និងរបួសស្នាមឆូតចង្កេះខាងស្តាំ។

បច្ចុប្បន្ន សមត្ថកិច្ចកំពុងស្រាវជ្រាវស៊ើបអង្កេតដើម្បីចាប់ជនបង្កយកមកចាត់ការតាមផ្លូវច្បាប់៕