ចាប់បានក្រួចបង្កកជាង២តោនអត់ច្បាប់យកទៅដុតកម្ទេចចោលនៅព្រៃវែង!

ព្រៃវែង៖ ដោយអនុវត្តតាមប្រកាសអន្តរក្រសួងលេខ៥៧៤ សហវ.ប្រក ស្តីពី កិច្ចសហការរវាងអគ្គនាយកដ្ឋានគយ និងរដ្ឋករកម្ពុជា និងអគ្គនាយកដ្ឋានកម្ពុជាត្រួតពិនិត្យទំនិញនីហរ័ណ អាហរ័ណ និងបង្រ្កាបការក្លែងបន្លំ នៅថ្ងៃទី២៩ ខែកក្កដា ឆ្នាំ២០២៣កន្លងទៅនេះ សាខា ក.ប.ប. ខេត្តព្រៃវែង ដោយទទួលបានការស្នើសុំកិច្ចសហការពីអគ្គនាយកដ្ឋានគយ និងរដ្ឋករបានចុះត្រួតពិនិត្យបឋមលើទំនិញសាច់ក្រួចបង្កក (Frozen Quail) ចំនួន ២,២០០គីឡូក្រាម ដែលអគ្គនាយកដ្ឋានគយ និងរដ្ឋករ (គយចល័ត) ឃាត់ស្ទាក់ចាប់បាននៅតំបន់២ តាមបណ្តោយផ្លូវជាតិលេខ១ ក្នុងភូមិសាស្ត្រខេត្តព្រៃវែង។ នេះបើតាមប្រភពដែលបណ្ដាញព័ត៌មាន The Mirror News ទទួលបាននៅ​ថ្ងៃទី០១ ខែសីហា ឆ្នាំ២០២៣។

ប្រភពព័ត៌មានបន្ដថា តាមលទ្ធផលនៃការត្រួតពិនិត្យ មន្ត្រីជំនាញ ក.ប.ប. បានធ្វើការត្រួតពិនិត្យយ៉ាងយកចិត្តទុកដាក់ ទទួលបានលទ្ធផល៖ ១.បានរកឃើញថា ទំនិញសាច់ក្រួចបង្កកទាំងនោះ ពុំមានប្រភពច្បាស់លាស់ គ្មានវិញ្ញាបនបត្របញ្ជាក់គុណភាពនៃប្រទេសនាំចេញ, ២.ការវេចខ្ចប់និងដឹកជញ្ជូនពុំបានត្រឹមត្រូវ, ៣.ការរក្សាទុកពុំត្រឹមត្រូវតាមស្តង់ដារបច្ចេកទេស (កម្រិតសីតុណ្ហភាពពុំត្រឹមត្រូវ) នាំឱ្យសាច់ប្រែប្រួលបាត់បង់គុណភាព, និង៤.សាច់បង្កកទាំងនោះពុំមានសារធាតុគីមីហាមឃាត់នោះទេ។

ប្រភពព័ត៌មានបានបញ្ជាក់ថា យោងតាមលទ្ធផលនៃការត្រួតពិនិត្យនេះ និងដោយមានការចង្អុលបង្ហាញពីព្រះរាជអាជ្ញាអមសាលាដំបូងខេត្តព្រៃវែង មន្ត្រីជំនាញទាំង២ស្ថាប័នបានសម្រេចជាឯកឆន្ទ ដុតកម្ទេចចោលនូវសាច់ក្រួចបង្កកទាំង២,២០០គ.កនោះ ដើម្បីកុំឱ្យមានការចរាចរចូលទីផ្សារ ដែលអាចបណ្តាលឱ្យប៉ះពាល់ដល់សុខភាពរបស់អ្នកប្រើប្រាស់ជាយថាហេតុ៕