កម្ពុជាបានអនុម័តស្នើសុំឥណទានពីចិនដើម្បីសាងសង់ស្ពានតភ្ជាប់ពីខេត្តកំពង់ធំ ទៅខេត្តកំពង់ឆ្នាំង
ភ្នំពេញ៖ នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានអះអាងថាកម្ពុជាបានអនុម័តស្នើសុំឥណទានពីចិនដើម្បីសាងសង់ស្ពានតភ្ជាប់ពីខេត្តកំពង់ធំ ទៅខេត្តកំពង់ឆ្នាំង។
នាឱកាសបើកកម្មពិធីបុណ្យទន្លេលើកទី៧ ក្រោមប្រធានបទ «ទន្លេរបស់យើងដើម្បីបច្ចុប្បន្ន និងអនាគត» នាល្ងាចថ្ងៃទី០៩ ខែមីនា ឆ្នាំ២០២៣ នៅក្រុងស្ទឹងសែន ខេត្តកំពង់ធំ សម្តេចតេជោបានថ្លែងថា៖«អ្វីដែលយើងត្រូវការគឺកសាងស្ពានដែលតភ្ជាប់ពីទីរួមខេត្តកំពង់ឆ្នាំងមកកាន់ខេត្តកំពង់ធំ។ យើងបានអនុម័តស្នើសុំឥណទានរបស់សាធារណរដ្ឋប្រជាមានិតចិនដើម្បីអនុវត្តគម្រោងការនេះសម្រាប់ឆ្នាំ២០២៤»។
សម្តេចបន្តថា បច្ចុប្បន្ននេះកម្ពុជាក៏កំពុងតែកសាងស្ពានទន្លេមេគង្គឆ្លងកាត់ពីខេត្តក្រចេះ មកខេត្តកំពង់ធំនេះផងដែរ ពោលខេត្តកំពង់ធំនឹងមានស្ពាន និងផ្លូវចំនួន២ថ្មីបន្ថែមទៀតនៅថ្ងៃខាងមុខ។
រដ្ឋមន្រ្តីក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្រ្តី ស៊ុន ចាន់ថុល បានបញ្ជាក់នៅក្នុងពិធីចុះត្រួតពិនិត្យទីតាំងសាងសង់កំពង់ផែពហុបំណង និងមណ្ឌលភស្តុភារកម្មកំពង់ឆ្នាំងកាលពីព្រឹកថ្ងៃទី០៩ ខែមីនាថា រាជរដ្ឋាភិបាលនឹងរកថវិកាសម្រាប់សាងសង់ស្ពានប្រវែងជាង ៣គីឡូម៉ែត្រ និងសាងសង់ផ្លូវ៥០C តភ្ជាប់ពីខេត្តកំពង់ធំទៅខេត្តកំពង់ឆ្នាំង។
ឯកឧត្តមទេសរដ្ឋមន្រ្តី ស៊ុន ចាន់ថុល បានគូសបញ្ជាក់ឱ្យដឹងថា កាលពីឆ្នាំ២០១៩ រដ្ឋាភិបាលបានជំរុញឱ្យក្រសួងសាធារណការ និងដឹកជញ្ជូនសិក្សាឡើងវិញអំពីផលប៉ះពាល់ផ្នែកបរិស្ថាននៃគម្រោងសាងសង់ស្ពានប្រវែងជាង៣ពាន់ម៉ែត្រ និងផ្លូវ៥០C តភ្ជាប់ពីខេត្តកំពង់ធំទៅខេត្តកំពង់ឆ្នាំង។ ក្រោយពីបានសិក្សារួចមក គម្រោងនេះគឺពុំមានផលប៉ះពាល់ដល់បរិស្ថានឡើយ។
ឯកឧត្តមទេសរដ្ឋមន្រ្តីបានអះអាងថា នៅឆ្នាំ២០២៤ ខាងមុខនេះក្រសួងសាធារណការនឹងបើកការដ្ឋានសាងសង់ស្ពានដែលវែងជាងគេនៅកម្ពុជា និងសាងសង់ផ្លូវ៥០C ដែលគ្រោងចំណាយថវិកាសាងសង់ចំនួន ២៥០លានដុល្លារ ដោយ ១៥០លានដុល្លារសម្រាប់សាងសង់ផ្លូវ និង ១០០លានដុល្លារសម្រាប់សាងសង់ស្ពាន៕