ស្នងការដ្ឋានខេត្តកណ្ដាលបញ្ជាក់ថា សហគ្រាសធុនតូច SORIYA មានវិញ្ញាបនបត្រចុះបញ្ជីម៉ាកពីក្រសួងពាណិជ្ជកម្ម និងវិញ្ញាបនបត្រអនុញ្ញាតពីមន្ទីរឧស្សាហកម្មខេត្តកណ្ដាល

បន្ទាប់ពីមានការចុះផ្សាយថា «មានរោងចក្រផលិតបារីគ្មានអាជ្ញាប័ណ្ណដ៏ធំមួយកំពុងបើកអាជីវកម្មយ៉ាងរំភើយ ដែលមានទីតាំងភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្ដាល» លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តនៅព្រឹកថ្ងៃចន្ទ ទី១៩ ខែកុម្ភៈ ឆ្នាំ២០២៤បានបញ្ជាឲ្យកម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្ដាល ដឹកនាំដោយលោកឧត្តមសេនីយ៍ត្រី លី សុជាតិ ស្នងការរងទទួលផែនការងារនគរបាលប្រឆាំងបទល្មើសសេដ្ឋកិច្ច បានសហការជាមួយកម្លាំងរដ្ឋបាលស្រុកមុខកំពូល ដឹកនាំដោយលោក ហុង គីរី អភិបាលរងស្រុកមុខកំពូល កម្លាំងអធិការដ្ឋាននគរបាលស្រុកមុខកំពូល និងកម្លាំងប៉ុស្តិ៍នគរបាលរដ្ឋបាលស្វាយអំពារចុះស្រាវជ្រាវដល់ទីតាំងជាក់ស្ដែងភ្លាមៗ។ នេះបើតាមប្រភពពីមន្ត្រីប្រតិកម្មរហ័សនៃស្នងការដ្ឋាននគរបាលខេត្តកណ្ដាល ដែលបណ្ដាញសារព័ត៌មាន The Mirror News ទទួលបាននៅថ្ងៃទី១៩ ខែកុម្ភៈ ឆ្នាំ២០២៤នេះ។

ប្រភពបានបន្តថា ជាលទ្ធផល ម្ចាស់សហគ្រាស SORIYA មានឈ្មោះ សេង ចរិយា បានឲ្យអ្នកតំណាងសហគ្រាសដើម្បីចូលរួមឈ្មោះ ត្រេន សាឡី ភេទស្រី អាយុ៣១ឆ្នាំ មានទីលំនៅ ភូមិត្រពាំងដំរី ឃុំសែនដី ស្រុកសំរោងទង ខេត្តកំពង់ស្ពឺ។

ប្រភពព័ត៌មានសមត្ថកិច្ចបានឲ្យដឹងទៀតថា តាមការពិនិត្យជាក់ស្ដែងទីតាំងសហគ្រាសធុនតូចផលិតបារី SORIYA បានផលិតបារីម៉ាក TOURO និងស្តុកថ្នាំជក់ ស្ថិតនៅភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្ដាល ដែលមានឯកសារពាក់ព័ន្ធរួមមាន៖

*ទី១-វិញ្ញាបនបត្រចុះបញ្ជីម៉ាក TOURO របស់ក្រសួងពាណិជ្ជកម្ម ឯកសារចុះថ្ងៃទី៣០ ខែមីនា ឆ្នាំ២០២១ មានសុពលភាពដល់ថ្ងៃទី៣០ ខែមីនា ឆ្នាំ២០៣១។

*ទី២-ឯកសារវិញ្ញាបនបត្រអនុញ្ញាតឲ្យដំណើរការសហគ្រាស-សិប្បកម្មរបស់មន្ទីរឧស្សាហកម្មខេត្តកណ្ដាល ចុះថ្ងៃទី១៥ ខែវិច្ឆិកា ឆ្នាំ២០២៣ មានសុពលភាព ដល់ថ្ងៃទី១៥ ខែវិច្ឆិកា ឆ្នាំ២០២៦។

*ទី៣-ឯកសាររបស់មន្ទីរបរិស្ថានខេត្តកណ្ដាល ចុះថ្ងៃទី១១ ខែមករា ឆ្នាំ២០២៤។

គួរជម្រាបថា កាលពីថ្ងៃទី១៨ ខែកុម្ភៈ ឆ្នាំ២០២៤ម្សិលតំណាងម្ចាស់សហគ្រាស SORIYA បានធ្វើសេចក្ដីរួចម្ដងមកហើយ ជុំការផ្សព្វផ្សាយព័ត៌មានមិនពិតរបស់អ្នកសារព័ត៌មាននិងអ្នកប្រើប្រាស់បណ្ដាញសង្គមមួយចំនួនតូច ដោយការបំភ្លឺបានឲ្យដឹងថា «សហគ្រាស SORIYA សូមបំភ្លឺជូនថា សហគ្រាសមានច្បាប់អនុញ្ញាតត្រឹមត្រូវ មិនដូចការចុះផ្សាយដោយគ្មានក្រមសីលធម៌ វិជ្ជាជីវៈរបស់សារព័ត៌មានមួយចំនួនតូចនោះទេ។

សហគ្រាស SORIYA ដែលបានវិនិយោគទៅលើគម្រោងអាជីវកម្មផលិតបាវី ដែលមានទីតាំងស្ថិតនៅភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្តាល សូមបំភ្លឺជូនអ្នកសារព័ត៌មាន អ្នកប្រើប្រាស់បណ្ដាញសង្គម និងសាធារណៈជនឲ្យបានជ្រាបថា ក្រោយពីសហគ្រាសបានឃើញពីការចុះផ្សាយដោយគ្មានមូលដ្ឋាន គ្មានក្រមសីលធម៌ វិជ្ជាជីវៈរបស់អ្នកសារព័ត៌មានមួយចំនួនតូច ក៏ដូចជាអ្នកប្រើប្រាស់បណ្ដាញសង្គមមួយចំនួនដោយមានខ្លឹមសារថា «ចប់ហើយបងប្អូន ចប់ហើយបា រោងចក្រលួចផលិតបារីក្លែងក្លាយបងប្អូនបាដែលគ្មានអាជ្ញាបណ្ណដ៏ធំមួយកន្លែងបងប្អូនបាកំពុងតែបើកដំណើរការអាជីវកម្មជាយូរមកហើយបា តែមិនទាន់មានមន្ត្រីឬអាជ្ញាធរពាក់ព័ន្ធ អស់លោកចុះទៅបង្ក្រាបនៅឡើយទេបាបងប្អូនបា ហើយទីតាំងនោះដែរគឺស្ថិតនៅបងប្អូនបាខេត្តកណ្ដាលបា រោងចក្រលួចផលិតបារីក្លែងក្លាយដ៏ធំមួយកន្លែងបាកំពុងតែបើកដំណើរអាជីវកម្មជាយូរមកហើយ ដែលមិនទាន់មានអាជ្ញាធរពាក់ព័ន្ធចុះទៅបង្ក្រាបនៅឡើយទេ ហើយទីតាំងនោះស្ថិតនៅភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្តាលបា…»។

សហគ្រាស SORIYA ពិតជាមានការសោកស្ដាយយ៉ាងខ្លាំងជាទីបំផុតក្រោយឃើញអ្នកសារព័ត៌មានមួយចំនួនតូចនិងអ្នកប្រើប្រាស់បណ្ដាញសង្គមធ្វើការអត្ថាធិប្បាយទាំងគ្មានប្រភពច្បាស់លាស់ត្រឹមត្រូវ គ្មានការពិត និងមិនបានឆ្លុះបញ្ចាំងពីក្រមសីលធម៌ និងវិជ្ជាជីវៈជាសារព័ត៌មានទាល់តែសោះ ហើយទង្វើទាំងអស់នេះ វាពិតបានធ្វើឱ្យប៉ះពាល់យ៉ាងធ្ងន់ធ្ងរមកលើកិត្តិយស និងមុខមាត់តបស់សហគ្រាស SORIYA ដែលមានច្បាប់អនុញ្ញាតត្រឹមត្រូវ។

គួរជម្រាបថា សហគ្រាស SORIYA មានបទពិសោធន៍ជាច្រើនឆ្នាំក្នុងការវិនិយោគទៅលើគម្រោងអាជីវកម្ម ផលិតបារី ដែលមានគុណភាពខ្ពស់ និងការផលិតពីវត្ថុធាតុដើមផ្សេងៗជាច្រើនទៀតដែលជាមូលហេតុធ្វើឱ្យ ផលិតផលសម្រេចរបស់ខ្លួនជាតម្រូវការដ៏ច្រើន។ ក្នុងការដំណើរការគម្រោងមួយនេះ គឺសហគ្រាសបានជួលអគារដែលបានសាងសង់រួចរាល់សម្រាប់ ផលិតកម្មដែលនាពេលបច្ចុប្បន្ននេះ រោងចក្រកំពុងតែដំណើរការផលិតកម្មផងដែរ ដោយនៅក្នុងទីតាំង និងជាប់ ទីតាំងរោងចក្រនេះ មិនមានប្រភពទឹកសំខាន់ៗ ដូចជាអូរ បឹង ស្ទឹងនោះទេ។ ជាក់ស្តែងហេតុដែល ប៉ះពាល់ អវិជ្ជមានសំខាន់ៗរបស់រោងចក្រដូចជា ការរំខានដោយសំឡេង ការបំពុលខ្យល់ សំណល់រឹង-រាវ ជីវៈចម្រុះ ក្នុងទឹក-លើដី ការបំពុលទឹក ការបំពុលដី ចរាចរណ៍ សុខភាពសាធារណៈ គឺមិនមានឥទ្ធិពលដែលគួរឱ្យព្រួយ បារម្ភនោះទេ ដោយសារតែនៅក្នុងខ្សែសង្វាក់ផលិតកម្ម គឺគ្រាន់តែយកវត្ថុធាតុដើម ជាសន្លឹកថ្នាំជក់ រួចហាន់ ជាចំណិតតូចៗ និងសម្ងួតតែប៉ុណ្ណោះ។

ទោះបីជាយ៉ាងណា ក្រុមហ៊ុនក៏បានយកចិត្តទុកដាក់យ៉ាងខ្លាំងទៅលើការថែទាំបរិស្ថាន ដោយសហគ្រាស ក៏មានវិធានការកាត់បន្ថយនូវហេតុប៉ះពាល់ជាអវិជ្ជមានទាំងឡាយដែលអាចកើតមាន ដែលសហគ្រាសបានលើកឡើងនៅក្នុងជំពូកទី៣ និងការអនុវត្តផែនការការពារបរិស្ថានឱ្យបានហ្មត់ចត់បំផុត។

ចំពោះការសិក្សាអំពីធនធានសេដ្ឋកិច្ច-សង្គម បានបង្ហាញឱ្យឃើញថា សកម្មភាពគម្រោងគឺមិនបាន បង្កការប៉ះពាល់ដល់ការប្រើប្រាស់ដី និងលំនៅឋានប្រជាពលរដ្ឋដែលរស់នៅក្បែរោងចក្រនោះទេ ប៉ុន្តែបើសកម្មភាពនៃគម្រោងបានធ្វើឱ្យមានផលប៉ះពាល់ដល់ប្រជាជន រោងចក្រនឹងធ្វើការដោះស្រាយ រីឯផ្នែកសុខភាពសាធារណៈដែលទាក់ទងនឹងការប្រើប្រាស់ទឹក ការបង្កសំឡេងពីរោងចក្រដំណើរការដែលមានឥទ្ធិពលដល់លំនៅឋានរបស់ពួកគាត់ក៏មិនមានអ្វីគួរឱ្យកត់សម្គាល់នោះដែរ។

ទោះជាយ៉ាងណាក៏ដោយការសិក្សាបានបង្ហាញឱ្យឃើញថា ការប៉ះពាល់របស់សហគ្រាសដែលអាច កើតមានឡើងនោះ ក៏រោងចក្រអាចគ្រប់គ្រង និងកាត់បន្ថយបានតាមរយៈការអនុវត្តឱ្យបានត្រឹមត្រូវនូវវិធាន ការកាត់បន្ថយនានាដែលសហគ្រាសបានអះអាងខាងលើ។

ជាមួយគ្នានេះ ផែនការគ្រប់គ្រងបរិស្ថានបានរៀបចំឡើងដោយមានបញ្ជាក់ច្បាស់អំពីគោលបំណងនៃការកាត់បន្ថយការប៉ះពាល់សកម្មភាពនិង ភារកិច្ចអ្នកទទួលខុសត្រូវ ព្រមទាំងពេលវេលាភាពញឹកញាប់នៃការអនុវត្តផែនការនេះ ក្នុងដំណាក់កាលសាងសង់ ប្រតិបត្តិ និងបញ្ចប់គម្រោង។ ហើយជាពិសេសគម្រោងនេះនឹងនាំមកនូវផលប្រយោជន៍ជាច្រើនដូចជា៖ *ផ្តល់នូវជំនាញដល់កម្មករជាច្រើនផ្នែកផលិតថ្នាំជក់។ *បង្កើតឱ្យមានការងារធ្វើដល់ប្រជាជនខ្មែរយើង ព្រមទាំងបង្កើនការងារលក់ដូររបស់ប្រជាពលរដ្ឋ នៅក្បែរតំបន់គម្រោង។ *ចូលរួមចំណែកដល់ការលើកទឹកចិត្តរបស់អ្នកវិនិយោគិនមកបណ្តាក់ទុននៅក្នុងប្រក ឱ្យកាន់តែច្រើនថែមទៀត តាមរយៈការផ្ដល់ការលើកលែងពន្ធ និងតម្លៃកម្លាំងពលកម្មសមរម្យ។*ចូលរួមកាត់បន្ថយចំណាកស្រុក និងភាពក្រីក្រ។ និង*រួមចំណែកកំណើនសេដ្ឋកិច្ច។

គួរជម្រាបជូនបន្ថែមថា សហគ្រាស SORIYA មានផលវិជ្ជមានជាច្រើនចំពោះ ព្រះរាជាណាចក្រកម្ពុជា ហើយចំពោះផលអវិជ្ជមានដែលអាចកើតមានវិញនោះ សហគ្រាសនឹងរកនូវវិធានការ ដោះស្រាយដោយមិនឱ្យមានហេតុប៉ះពាល់ដល់បរិស្ថាននោះទេ។

ជាមួយគ្នានេះ សហគ្រាសសូមឲ្យអ្នកសារព័ត៌មាន អ្នកប្រើប្រាស់បណ្ដាញសង្គម និងសាធារណៈមេត្តាជ្រាប ជៀសវាងមានការភាន់ច្រឡំដោយប្រការណាមួយដូចការចុះផ្សាយរបស់អ្នកសារព័ត៌មាន និងអ្នកប្រើប្រាស់បណ្ដាញសង្គមដែលគ្មានក្រមសីលធម៌ វិជ្ជាជីវៈដូចខាងលើ»៕