សម្តេចមហាបវរធិបតីនាយករដ្ឋមន្ត្រីកម្ពុជាអញ្ជើញបិទកិច្ចប្រជុំគណៈកម្មាធិការកណ្តាល ស.ស.យ.ក
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងជាប្រធានកិត្តិយសសហភាពសហព័ន្ធយុវជនកម្ពុជា (ស.ស.យ.ក) នៅព្រឹកថ្ងៃព្រហស្បតិ៍ ទី១៤ ខែមីនា ឆ្នាំ២០២៤នេះ បានអញ្ជើញជាអធិបតីបិទកិច្ចប្រជុំគណៈកម្មាធិការកណ្តាល ស.ស.យ.ក។
ស.ស.យ.ក ដែលជាគណៈចលនាមហាជនដ៏ធំមួយនៅកម្ពុជា បានបើកកិច្ចប្រជុំគណៈកម្មាធិការកណ្តាលរបស់ខ្លួនកាលពីថ្ងៃទី១៣ ខែមីនា ឆ្នាំ២០២៤ ក្រោមអធិបតីភាពរបស់លោក ហ៊ុន ម៉ានី ប្រធាន ស.ស.យ.ក.។
តាមរយៈកិច្ចប្រជុំនេះ អង្គប្រជុំបានធ្វើរបាយការណ៍សង្ខេបនៃសកម្មភាព ស.ស.យ.ក. ដែលសម្រេចបាននាពេលកន្លងមក និងមានបទអន្តរាគមន៍យ៉ាងផុសផុលពីសំណាក់សមាជិក សមាជិកានៃអង្គប្រជុំ រួមទាំងភាពជោគជ័យនៃដំណើរការបោះឆ្នោតជ្រើសតាំងសមាសភាពបំពេញបន្ថែមសមាជិកសមាជិកគណៈកម្មាធិការកណ្តាល គណៈអចិន្ត្រៃយ៍ និងអនុប្រធាន ស.ស.យ.ក. ផងដែរ។
ក្នុងកិច្ចប្រជុំនោះ ឯកឧត្ដមឧបនាយករដ្ឋមន្ត្រី ហ៊ុន ម៉ានី បានផ្ដាំផ្ញើដល់ឯកឧត្ដម លោកជំទាវដែលត្រូវបានតែងតាំងថ្មី ក៏ដូចជាថ្នាក់ដឹកនាំ ស.ស.យ.ក. គ្រប់ជាន់ថ្នាក់ឱ្យយកចិត្តទុកដាក់អនុវត្តការងារស្របតាមបេសកកម្មរបស់ ស.ស.យ.ក. និងស្របតាមការវិវត្តថ្មីៗ ដើម្បីបម្រើជាឧត្តមប្រយោជន៍ដល់សង្គម។
គួរបញ្ជាក់ថា ក្នុងកិច្ចប្រជុំនេះឯកឧត្ដមឧបនាយករដ្ឋមន្ត្រី កើត រិទ្ធ សមាជិកគណៈអចិន្ត្រៃយ៍ ស.ស.យ.ក. ត្រូវបានគណៈកម្មាធិការកណ្តាល ស.ស.យ.ក. បោះឆ្នោតជ្រើសតាំងជាអនុប្រធានសហភាពសហព័ន្ធយុវជនកម្ពុជា៕
