លោក ចេង ឌីណា បញ្ជាឲ្យអាជ្ញាធរក្រោមឱវាទចាត់វិធានការផ្លូវច្បាប់ចំពោះអ្នកមិនគោរព និងបង្កឱ្យប៉ះពាល់ដល់ប្រពៃណី សេចក្តីថ្លៃថ្នូរបស់សង្គម

កណ្តាល៖ ប្រធានគណៈបញ្ជាការឯកភាពស្រុកខ្សាច់កណ្តាល លោក ចេង ឌីណា នៅព្រឹកថ្ងៃទី០៣ ខែមេសា ឆ្នាំ២០២៣នេះ បានចេញសេចក្តីជូនដំណឹងស្តីពីការរក្សាសន្តិសុខ សុវត្ថិភាព និងសណ្តាប់ធ្នាប់ របៀបរៀបរយសាធារណៈ នាឱកាសបុណ្យចូលឆ្នាំថ្មីប្រពៃណីជាតិខ្មែរ ដល់សាធារណៈជនទាំងអស់ នៅក្នុងស្រុកខ្សាច់កណ្តាលដើម្បីរក្សាបាននូវសុខសុវត្ថិភាព សណ្ដាប់ធ្នាប់ របៀបរៀបរយសាធារណៈ សោភ័ណ្ឌភាព អនាម័យបរិស្ថាន និងការកកស្ទះចរាចរណ៍ ក៏ដូចជារក្សាបាននូវប្រពៃណីជាតិ និងសេចក្ដីថ្លៃថ្នូរដ៏ផូរផង់របស់ជាតិយើង។ បើតាមសេចក្តីជូនដំណឹងរបស់រដ្ឋបាលស្រុកខ្សាច់កណ្ដាលដែលបណ្ដាញសារព័ត៌មាន The Mirror News ទើបទទួលបាននៅថ្ងៃនេះ។

ក្នុងសេចក្តីជូនដំណឹង លោក ចេង ឌីណា បានបញ្ជាក់ថា ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំថោះ បញ្ចស័ក ពុទ្ធសករាជ ២៥៦៧ នាថ្ងៃសុក្រ ទី១៤ ដល់ ថ្ងៃអាទិត្យ ទី១៦ ខែមេសា ឆ្នាំ២០២៣ ខាងមុខនេះ រដ្ឋបាលស្រុកខ្សាច់កណ្តាល សូមជូនដំណឹងដល់សាធារណៈជន ទាំងអស់ឱ្យបានជ្រាបថា ដើម្បីរក្សាបាននូវសន្តិសុខ សុវត្តិភាព សណ្តាប់ធ្នាប់ របៀបរៀបរយសាធារណៈ សោភ័ណ្ឌភាព អនាម័យបរិស្ថាន និងការកកស្ទះចរាចរណ៍ ក៏ដូចជារក្សាបាននូវប្រពៃណីជាតិ និងសេចក្ដីថ្លៃថ្នូរដ៏ផូរផង់របស់ជាតិយើង សូមអនុវត្តដូចខាងក្រោម ៖

*ទី១~ចូលរួមដាក់ទង់ជាតិ និងសម្អាតអនាម័យនៅតាមផ្ទះ ជៀសវាងការចោលសំរាមពាសវាលពាសកាល។

*ទី២~ចូលរួមបង្ការទប់ស្កាត់គ្រោះអគ្គិភ័យ ដោយប្រុងប្រយ័ត្ន និងម្ចាស់ការខ្ពស់ចំពោះភ្លើងទៀន ធូប ភ្លើង ចង្ក្រាន និងចរន្តអគ្គិសនី ដើម្បីរក្សាបានទ្រព្យសម្បត្តិ អាយុជីវិត ផ្ទាល់ខ្លួន និងអ្នកដទៃ។

*ទី៣~ចូលរួមលេងល្បែងប្រជាប្រិយខ្មែរគ្រប់ប្រភេទនៅតាមទីវត្តអារ៉ាម និងនៅតាមទីតាំងដែលអាជ្ញាធរស្រុក ត្រូវគោរពច្បាប់ចរាចរណ៍ផ្លូវគោក និងមិនត្រូវបើកបរក្នុងស្ថានភាពស្រវឹង ដើម្បីជៀសវាងគ្រោះថ្នាក់ផ្សេងៗ ហាមដាច់ខាតចំពោះការលេងល្បែងស៊ីសង ការប្រើគ្រឿងផ្ទុះគ្រប់ប្រភេទនៅក្នុងស្រុកខ្សាច់កណ្តាល ដើម្បី រក្សានូវសេចក្តីថ្លៃថ្នូ និងសន្តិសុខសណ្តាប់ធ្នាប់សាធារណៈ។

ជាមួយគ្នានោះ លោក ចេង ឌីណា អភិបាលស្រុកខ្សាច់កណ្តាលបាន «ដាក់បទបញ្ជាឲ្យកងកម្លាំងអធិការដ្ឋាននគរបាលស្រុក មូលដ្ឋានកងរាជអាវុធហត្ថស្រុក មន្ត្រីរាជការ គ្រប់លំដាប់ថ្នាក់ អាជ្ញាធរឃុំគ្រប់ឃុំ ត្រូវសហការអនុវត្ត និងផ្សព្វផ្សាយឱ្យបានទូលំទូលាយ និងមានប្រសិទ្ធភាព ព្រម ទាំងចាត់វិធានការផ្លូវច្បាប់ចំពោះអ្នកមិនគោរពតាមខ្លឹមសារណែនាំខាងលើ ដែលបង្ករឱ្យប៉ះពាល់ដល់ប្រពៃណី សេចក្តី ថ្លៃថ្នូរបស់សង្គម ក៏ដូចជាសន្តិសុខ សុវត្ថិភាព និងសណ្តាប់ធ្នាប់របៀបរៀបរយសាធារណៈក្នុងស្រុកខ្សាច់កណ្តាល ខេត្ត កណ្តាល»៕ដោយ៖ ការីនិពន្ធ