លោក គួច ចំរើន ណែនាំកីឡាករនៃស្នងការដ្ឋាននគរបាលខេត្តកណ្ដាលទាំងអស់ត្រូវគោរពឱ្យបាននូវវិន័យ ក្រមសីលធម៌ក្នុងការប្រកួត និងស្ដាប់តាមការណែនាំរបស់គ្រូបង្ហាត់

កណ្ដាល៖ លោក គួច ចំរើន បានគូសបញ្ជាក់ថា ដើម្បីទទួលបានចំណាប់ថ្នាក់ល្អ នោះកីឡាករទាំងអស់ត្រូវគោរពឱ្យបាននូវវិន័យ ក្រមសីលធម៌ក្នុងការប្រកួត និងស្ដាប់តាមការណែនាំរបស់គ្រូបង្ហាត់ ពិសេសជាងនេះទៀត កីឡាបាល់ទះនេះ ដើម្បីទទួលបានជ័យជំនះ នោះយើងត្រូវប្រើប្រាស់កម្លាំងជាក្រុម ដោយសហការគ្នាក្នុងការប្រកួត មិនត្រូវគិតថាខ្លួនឯងអ្នកខ្លាំង អ្នកល្អ ហើយលេងម្នាក់ឯងទទួលបានជោគជ័យឡើង។ កត្តាសាមគ្គីភាពជាក្រុម ទើបធ្វើឱ្យយើងទាំងអស់គ្នាទទួលបាននូវលទ្ធផលល្អក្នុងការប្រកួត។

ការគូសបញ្ជាក់របស់លោក គួច ចំរើន អភិបាលនៃគណៈអភិបាលខេត្តកណ្ដាល នាព្រឹកថ្ងៃទី០៧ ខែធ្នូ ឆ្នាំ២០២៤ ក្នុងឱកាសដែលលោកបានអញ្ជើញទស្សនាការហ្វឹកហាត់ និងសំណេះសំណាលជាមួយកីឡាករបាល់ទះ នៃស្នងការដ្ឋាននគរបាលខេត្តកណ្ដាល នៅក្លឹបបាល់ទះស្នងការដ្ឋាននគរបាលខេត្តកណ្ដាល ក្នុងក្រុងតាខ្មៅ

លោកអភិបាលខេត្តបានជំរុញលើកទឹកចិត្តដល់ក្រុមកីឡាបាល់ទះ នៃស្នងការដ្ឋាននគរបាលខេត្តកណ្ដាល ពង្រឹងសមត្ថភាពហ្វឹកហាត់ គោរពវិន័យ និងស្ដាប់តាមការណែនាំរបស់គ្រូបង្ហាត់ ដើម្បីទទួលបានចំណាត់ថ្នាក់ល្អនាឱកាសប្រកួតបាល់ទះជ្រើសរើសជើងឯក ពានរង្វាន់សម្ដេចក្រឡាហោម ស ខេង ឆ្នាំ២០២៤ ខាងមុខនេះ។

លោកបន្តគូសបញ្ជាក់ថា កីឡាគឺបង្កើននូវសាមគ្គីភាព ឯកភាពគ្នា មានទំនាក់ទំនងល្អរវាងគ្នានឹងគ្នា ពិសេសធ្វើឱ្យយើងមានសុខភាពល្អ កីឡាតែងតែមានអ្នកឈ្នះ និងអ្នកចាញ់ ប៉ុន្តែយើងបានបង្កើននូវមិត្តភាព និងសាមគ្គីភាព ជាមួយគ្នាបានល្អ។

លោកអភិបាលបានជូនពរដល់កីឡាករបាល់ទះ នៃស្នងការដ្ឋាននគរបាលខេត្តកណ្ដាលឱ្យទទួលបានចំណាត់ថ្នាក់ល្អ ក្នុងការប្រកួតបាល់ទះជ្រើសរើសជើងឯក ពានរង្វាន់សម្ដេចក្រឡាហោម ស ខេង ឆ្នាំ២០២៤ ខាងមុខនេះ។

បើតាមលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលបានលើកឡើងថា ការប្រកួតបាល់ទះជ្រើសរើសជើងឯក ពានរង្វាន់សម្ដេចក្រឡាហោម ស ខេង ឆ្នាំ២០២៤ នឹងត្រូវធ្វើការប្រកួតចាប់ពីថ្ងៃទី០៩ ដល់ថ្ងៃទី២៣ ខែធ្នូ ឆ្នាំ២០២៤ មានចំនួន ៦ពូល ហើយសម្រាប់ក្រុមបាល់ទះ នៃស្នងការដ្ឋាននគរបាលខេត្តកណ្ដាល ស្ថិតនៅពូលB ដោយប្រកួតដំបូងរបស់ក្រុមបាល់ទះនៃស្នងការដ្ឋាននគរបាលខេត្តកណ្ដាល នៅថ្ងៃទី១០ ខែធ្នូ ដែលត្រូវជួបជាមួយក្រុមបញ្ជាការដ្ឋានអង្គរក្ស A៕