Breaking News: ដកលោកស្នងការរងខេត្តកណ្ដាលសម្បូររឿងអាស្រូវ អុល ប៊ុណ្ណា ឱ្យមកជាមន្ត្រី

កណ្ដាល៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា កាលពីថ្ងៃទី០៤ ខែវិច្ឆិកា ឆ្នាំ២០២៤ បានចេញព្រះរាជក្រឹត្យត្រាស់បង្គាប់បន្ថយឋានន្តរស័ក្តិពី ឧត្តមសេនីយ៍ត្រី អុល ប៊ុណ្ណា នាយនគរបាលថ្នាក់ឧត្តមសេនីយ៍ ឱ្យមកនៅត្រឹមថ្នាក់ វរសេនីយ៍ឯក ក្របខ័ណ្ឌមន្ត្រីនគរបាលជាតិ នៃក្រសួងមហាផ្ទៃ។ នេះបើតាមព្រះរាជក្រឹត្យដែលបណ្ដាញសារព័ត៌មាន The Mirror News ទើបទទួលបាននៅព្រឹកថ្ងៃទី៩ ខែធ្នូ ឆ្នាំ២០២៤នេះ។

នៅក្នុងព្រះរាជក្រឹត្យ៖

មាត្រា១៖ បន្ថយឋានន្តរស័ក្តិ ពីឧត្តមសេនីយ៍ត្រី អុល ប៊ុណ្ណា អត្តលេខ ៦១៧៤៣ នាយនគរបាលថ្នាក់ ឧត្តមសេនីយ៍ ឱ្យមកនៅត្រឹមថ្នាក់ វរសេនីយ៍ឯក ក្របខ័ណ្ឌមន្ត្រីនគរបាលជាតិ នៃក្រសួងមហាផ្ទៃ។

មាត្រា២៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្ត ព្រះរាជក្រឹត្យនេះ ចាប់ពីថ្ងៃឡាយព្រះហស្ថលេខាតទៅ។

បើតាមប្រកាសស្តីពីការអនុវត្តវិន័យមន្ត្រីនគរបាលជាតិរបស់អគ្គស្នងការនៃអគ្គស្នងការដ្ឋាននគរបាលជាតិកាលពីថ្ងៃទី១១ ខែមេសា ឆ្នាំ២០២១ បានសម្រេច៖

ប្រការ១៖ ត្រូវបានអនុវត្តវិន័យក្រោមរូបភាព ព្រមានលើកទី១ ចំពោះឧត្តមសេនីយ៍ត្រី អុល ប៊ុណ្ណា អគ្គលេខ ៦១៧៤៣ ស្នងការរង នៃស្នងការដ្ឋាននគរបាលខេត្តកណ្តាល។ មូលហេតុ ល្មើសវិន័យរបស់កងកម្លាំងនគរបាលជាតិ។

ប្រការ២៖ សាមីខ្លួនដែលមានឈ្មោះក្នុងប្រការ១ ត្រូវកែប្រែនូវកំហុសឆ្គងឱ្យបានត្រឹមត្រូវ។ ក្នុងករណីនៅតែ ប្រព្រឹត្តផ្ទុយពីការណែនាំទៀតនោះ នឹងចាត់វិធានការតាមវិន័យរបស់កងកម្លាំងនគរបាលជាតិ។

បើយោងតាមប្រកាសស្តីពីការអនុវត្តទណ្ឌកម្មខាងវិន័យចំពោះមន្ត្រីនគរបាលជាតិកាលពីថ្ងៃទី២២ ខែតុលា ឆ្នាំ២០២៤ របស់អគ្គស្នងការនៃអគ្គស្នងការដ្ឋាននគរបាលជាតិបានសម្រេច៖

ប្រការ១៖ ត្រូវបានអនុវត្តទណ្ឌកម្មខាងវិន័យចំពោះ ឧត្តមសេនីយ៍ត្រី អុល ប៊ុណ្ណា អត្តលេខ ៦១៧៤៣ ស្នងការរង នៃស្នងការដ្ឋាននគរបាលខេត្តកណ្តាល ចំណុះអគ្គស្នងការដ្ឋាននគរបាលជាតិ តាមរូបភាព ដកហូតមុខតំណែង ឱ្យមកជាមន្ត្រី មូលហេតុ ល្មើសបទវិន័យនគរបាលជាតិកម្ពុជា។

ប្រការ២៖ បទប្បញ្ញត្តិទាំងឡាយណាដែលផ្ទុយនឹងប្រកាសនេះ ត្រូវទុកជានិរាករណ៍។

គួររំលឹកថា អតីតស្នងការរងនគរបាលខេត្តកណ្តាលលោក អុល ប៊ុណ្ណា ក៏ធ្លាប់ត្រូវបានឈ្មោះ ប៊ុន ចាន់សុទ្ធា ប្តឹងកាលពីថ្ងៃទី១៨ ខែមីនា ឆ្នាំ២០២២ ពីរឿងបំភាន់មន្ត្រីសុរិយោដី និងប្រើអំពើហិង្សា លើអ្នកកាន់កាប់អចលនវត្ថុដោយសុចរិត។ ហើយលោក សេង រិទ្ធី ព្រះរាជអាជ្ញារងនៃអយ្យការអមសាលាដំបូងខេត្តកណ្តាលក៏ធ្លាប់បានចេញដីកាកោះហៅឈ្មោះ អ៊ុល ប៊ុណ្ណា ភេទប្រុស អាយុ៤០ ឆ្នាំ ជនជាតិខ្មែរ សញ្ជាតិខ្មែរជា ជនសង្ស័យ ទីលំនៅ ភូមិព្រែកត្រែង សង្កាត់សិល្បៈ ក្រុងតាខ្មៅ ខេត្តកណ្តាលឲ្យចូលមកកាន់អយ្យការអមសាលាដំបូងខេត្តកណ្តាលនៅថ្ងៃទី២៦ ខែមេសា ឆ្នាំ២០២២ វេលាម៉ោង០៨៖៣០នាទីព្រឹកដើម្បីសាកសួរពីដំណើរ
រឿង បំភាន់មន្ត្រីសុរិយោដី និងប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត តាម ពាក្យបណ្តឹងរបស់ឈ្មោះ ប៊ុន ចាន់សុទ្ធា កាលពីថ្ងៃទី១៨ ខែមីនា ឆ្នាំ២០២២ផងដែរ។

បើតាមប្រភពច្បាស់ការណ៍មួយផ្សេងទៀតបានឲ្យដឹងថា ពាក់ព័ន្ធនឹងរឿងអតីស្នងការរងនគរបាលខេត្តកណ្តាល លោក អុល ប៊ុណ្ណា រូបនេះ ក៏កំពុងត្រូវបានជនរងគ្រោះប្ដឹងទាមទារយកលុយពីថ្លៃរត់ការចូលក្របខណ្ឌមកវិញទៅកាន់ស្នងការដ្ឋាននគរបាលខេត្តកណ្ដាល ហើយមន្ត្រីជំនាញស្នងការដ្ឋាននគរបាលខេត្តកណ្ដាលក៏បានបញ្ជូនពាក្យបណ្ដឹងខាងលើនេះទៅកាន់អយ្យការអមសាលដំបូងខេត្តកណ្ដាលរួចរាល់ហើយដែរ។

គួរជម្រាបថា លោក អុល ប៊ុណ្ណា គឺនៅបម្រើការជាមន្ត្រីនគរបាលនៃស្នងការដ្ឋាននគរបាលខេត្តកណ្តាលមិនមែនជាស្នងការរងនគរបាលខេត្តកណ្តាលទៀតទេ៕