ចៅក្រមស៊ើបសួរសាលាដំបូងខេត្តព្រះសីហនុសម្រេចឃុំខ្លួនឈ្មោះ ដេវីដ ឆាណាយវ៉ា

ភ្នំពេញ៖​ ចៅក្រមស៊ើបសួរសាលាដំបូងខេត្តព្រះសីហនុបានសម្រេចឃុំខ្លួន ឈ្មោះ ដេវីដ ឆាណាយវ៉ា ជាបណ្តោះអាសន្ន ក្រោមការចោទប្រកាន់ចំនួន០២បទល្មើស៖ ទី១-បទឧក្រិដ្ឋជាអាទិ៍ និងទី២-បទបរិហាកេរ្តិ៍ជាសាធារណៈ។​

ការសម្រេចឃុំខ្លួននេះ ត្រូវបានធ្វើឡើងដោយ លោក ផាត់ ពៅ ចៅក្រមស៊ើបសួរ នៃសាលាដំបូងខេត្តព្រះសីហនុ កាលពីថ្ងៃទី០៣ ខែឧសភា ឆ្នាំ២០២៣ ដោយឃុំខ្លួនឈ្មោះ ដេវីដ ឆាណាយវ៉ា នៅពន្ធនាគារខេត្តព្រះសីហនុ។

នៅក្នុងដីកាបង្គាប់ឱ្យឃុំខ្លួន​ ចុះថ្ងៃទី​០៣​ ខែ​ ឧសភា​ ឆ្នាំ​២០២៣​ ដោយចៅក្រមស៊េីបសួរ​ បង្គាប់​០៣​ចំណុចគឺ
១-បញ្ជាឱ្យភ្នាក់ងារមានសមត្ថកិច្ច នៃកម្លាំងសាធារណៈ ធ្វើការនាំខ្លួនជនត្រូវចោទឈ្មោះ ដេវិដ ឆាណាយវ៉ា ហៅក្រៅ កូនមានវាសនា ភេទប្រុស អាយុ ៥១ឆ្នាំ ដែលកើតថ្ងៃទី០២ ខែកុម្ភៈ ឆ្នាំ១៩៧២ ជនជាតិខ្មែរ ទៅឃុំខ្លួននៅពន្ធនាគារខេត្តព្រះសីហនុ ដោយអនុវត្តឱ្យបានត្រឹមត្រូវតាមនីតិវិធីច្បាប់។

២-បង្គាប់ឱ្យប្រធានពន្ធនាគារខេត្តព្រះសីហនុ ទទួលយកជននេះនិងឃុំខ្លួនជន៍នេះរហូតដល់មានបញ្ជាថ្មីសម្រេចផ្សេងពីនេះ។

៣-បង្គាប់ឱ្យគ្រប់ភ្នាក់ងារ នៃកម្លាំងសាធារណៈទាំងអស់ នៅពេលត្រូវបានបង្ហាញដីកានេះត្រូវសហការអនុវត្ត ឱ្យបានល្អនៅក្នុងករណីចាំបាច់។

សូមបញ្ជាក់ថា​ ឈ្មោះ ដេវិដ​ ឆាណាយវ៉ា​ ជាជនត្រូវចោទត្រូវបានដាក់ឱ្យស្ថិតនៅក្រោមការពិនិត្យពីបទ៖​ ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទបរិហាកេរ្តិ៍ជាសាធារណៈប្រព្រឹត្តនៅចំណុចភូមិចំណោតរាម ឃុំចំណោតរាម ស្រុកព្រៃនប់ ខេត្តព្រះសីហនុ កាលពី អំឡុងខែមីនា ដល់ខែមេសា ឆ្នាំ២០២៣ បទល្មើសដែលមានចែងឱ្យផ្ដន្ទាទោសតាមបញ្ញត្តិមាត្រា៤៩៤​ មាត្រា៤៨៥ និង មាត្រា៣០៥ នៃក្រមព្រហ្មទណ្ឌ៕