រដ្ឋមន្ត្រី កើត រិទ្ធ កោតសរសើរសមត្ថកិច្ចខេត្តកណ្ដាលពូកែចាប់ជនល្មើសដើម្បីផ្ដល់ភាពកក់ក្ដៅជូនប្រជាពលរដ្ឋ ខណៈខេត្តកណ្តាលគឺជាកន្លែងមួយដែលការអនុវត្តច្បាប់មានប្រសិទ្ធភាព
ឯកឧត្តម កើត រិទ្ធ បានថ្លែងកោតសរសើរដល់សមត្ថកិច្ចខេត្តកណ្ដាលដែលតែងតែបង្ក្រាបរាល់ជនល្មើសនិងបទល្មើសបានល្អប្រសើរនិងបានសហការជាមួយសាលាដំបូងនិងរាជអាជ្ញាអមសាលាដំបូងខេត្តក្នុងការដោះស្រាយរកយុត្តិធម៌ជូនប្រជាពលរដ្ឋបានល្អប្រសើរ។ឯកឧត្តមបន្តថា «ភាគច្រើនជនល្មើសឲ្យតែហ៊ានចូលដល់ដីខេត្តកណ្ដាល ហើយឲ្យតែឈ្លើយបន្តិច គឺថាចាប់ជាប់ទាំងអស់។ ខេត្តកណ្តាលគឺជាកន្លែងមួយដែលការអនុវត្តច្បាប់មានប្រសិទ្ធភាព។ជាពិសេសសមត្ថភាពរបស់សមត្ថកិច្ចនគរបាលយុត្តិធម៌របស់យើងដែលតែងតែរកឃើញនូវជនល្មើស និងធានាបាននូវភាពកក់ក្តៅរបស់ប្រជាពលរដ្ឋ»។ ជាក់ស្តែងករណីប្ដីសម្លាប់ប្រពន្ធ សម្លាញ់កូននៅស្រុកកណ្ដាលស្ទឹងដែលជាករណីថ្មីជាងគេ ហើយកម្លាំងសមត្ថកិច្ចយើងទៅដល់ប៉ោយប៉ែត ទៅដល់ខេត្តបន្ទាយមានជ័យដើម្បីស្រាវជ្រាវចាប់យកមកបានវិញ នេះគឺជាកម្រិតលេខប្រសិទ្ធភាពខ្ពស់ជាងមុន។
ការថ្លែងកោតសរសើររបស់ឯកឧត្តម កើត រិទ្ធ ឧបនាយករដ្ឋមន្រ្ដី រដ្ឋមន្រ្ដីក្រសួងយុត្តិធម៌ចំពោះសមត្ថកិច្ចខេត្តកណ្ដាល នាល្ងាចថ្ងៃទី១៦ ខែតុលា ឆ្នាំ២០២៣ ក្នុងពិធីប្រកាសចូលកាន់តំណែងឯកឧត្ដម ជឺ សុខ ជាប្រធានតុលាការខេត្តកណ្ដាល ជំនួសឯកឧត្តម ហុក វ៉ាន់ធីណា ដែលត្រូវផ្លាស់ទៅជាប្រធានតុលាការខេត្តសៀមរាបវិញ ក្រោយកាន់តំណែង នៅខត្តកណ្ដាលជាង ៩ឆ្នាំកន្លងមក។
នាឱកាសនោះ ឯកឧត្ដម កើត រិទ្ធ ក៏បានគូសបញ្ជាក់ថា ការតែងតាំង ផ្លាស់ប្តូរ និងផ្ទេរភារកិច្ចនេះ គឺជារឿងធម្មតាក្នុងគោលបំណងដើម្បីធានាឱ្យមានកិច្ចដំណើរការការងារកាន់តែមានភាពល្អប្រសើរ និងមានប្រសិទ្ធភាពខ្ពស់ សំដៅលើកកម្ពស់ការបម្រើសេវាយុត្តិធម៌ជូនប្រជាពលរដ្ឋ ប្រកបដោយភាពមិនលម្អៀង ភាពត្រឹមត្រូវ និងភាពយុត្តិធម៌។
ជាមួយនោះ ឯកឧត្តមរដ្ឋមន្ត្រីក្រសួងយុត្តិធម៌ ក៏បានក្រើនរំលឹកជាថ្មី ដល់ចៅក្រម ព្រះរាជអាជ្ញា មន្ត្រីតុលាការ និងមន្ត្រីរាជការទាំងអស់នៃសាលាដំបូងខេត្តកណ្តាល ពិសេសឯកឧត្តម ជឺ សុខ ដែលទើបតែងតាំងជាប្រធានសាលាដំបូងខេត្តកណ្តាលត្រូវមានសាមគ្គីភាពផ្ទៃក្នុង និងអាជ្ញាធរមានសមត្ថកិច្ចឲ្យបានល្អ ហើយត្រូវប្រកាន់ខ្ជាប់នូវភាពម៉ឺងម៉ាត់ក្នុងការអនុវត្តច្បាប់ និងគោរពឱ្យបានត្រឹមត្រូវតាមក្រមសីលធម៌វិជ្ជាជីវៈ ដើម្បីធានាឱ្យការផ្តល់សេវាយុត្តិធម៌ជូនប្រជាពលរដ្ឋឲ្យបាន លឿន ត្រឹមត្រូវ យុត្តិធម៌ និងមិនពុករលួយ និងដើម្បីលើកកម្ពស់អភិបាលកិច្ចល្អ កិត្តិយស និងសេចក្តីថ្លៃថ្នូររបស់អង្គចៅក្រមបន្ថែមទៀត។
ទន្ទឹមនោះ ឯកឧត្តមរដ្ឋមន្រ្តីបានគូសបញ្ជាក់ទៀតថា សម្រាប់នីតិកាលទី៧នេះ ការកែទម្រង់ច្បាប់ និងប្រព័ន្ធយុត្តិធម៌នៅតែជាការងារអាទិភាពមួយដ៏សំខាន់របស់រាជរដ្ឋាភិបាល ហើយការកែទម្រង់នេះគឺជាមុំមួយដ៏សំខាន់ក្នុងចំណោមមុំទាំង៥ របស់យុទ្ធសាស្របញ្ចកោណ-ដំណាក់កាលទី១ ក្នុងនោះការលើកកម្ពស់ និងពង្រឹងយុត្តិធម៌ គឺជាអាទិភាពសំខាន់១ ដែលក្នុងនោះក្រសួងយុត្តិធម៌បានរៀបចំផែនការ សម្រេចនូវផែនការអាទិភាពសំខាន់ៗចំនួន៣ រួមមាន៖
ទី១៖ ការបង្កើតយន្តការដោះស្រាយវិវាទក្រៅប្រព័ន្ធតុលាការ, ទី២៖ ការជំរុញ និងការពន្លឿនសំណុំរឿងក្តីនៅតាមតុលាការ,និងទី៣៖ ត្រួតពិនិត្យដោះស្រាយភាពមិនប្រក្រតីនៅតាមតុលាការ សំដៅជួយដោះស្រាយរកយុត្តិធម៌ជូនប្រជាពលរដ្ឋ និងលើកកម្ពស់តម្លាភាព សុច្ចរិតភាព និងភាពត្រឹមត្រូវក្នុងការអនុវត្តច្បាប់ និងចំណាត់ការរឿងក្តីដោយតុលាការ៕
