អធិការប៉ូលិសស្រុកសណ្ដាន់លេងវិធានការ «អារកស្វា បំភ័យមាន់» ខណៈអ្នកនាំពាក្យស្នងការដ្ឋាននគរបាលខេត្តកំពង់ធំថា នេះគឺជាការខុសឆ្គងរបស់សមត្ថកិច្ច!

(កំពង់ធំ)៖ ករណីប្រជាពលរដ្ឋនៅស្រុកសណ្ដាន់ចូលផ្ដល់មតិ (comment)នៅលើបណ្ដាញសង្គមស្នងការរដ្ឋាននគរបាលខេត្តកំពង់ធំ ហើយត្រូវបានលោកអធិការឲ្យធ្វើ«កិច្ចសន្យាផ្ដិតមេដៃ» ត្រូវបានប្រជាពលរដ្ឋរិះគន់ព្រោងព្រាតពេញបណ្ដាញសង្គម។ យ៉ាងណាក៏ដោយលោកអធិការស្រុកសន្ដាន់បានបំភ្លឺតបថា ព្រោះតែបុរសខាងលើនោះមិនបានបំពេញតាមលក្ខខណ្ឌនៃការស្នើសុំធ្វើសៀវភៅគ្រួសារ ទើបបណ្ដាលឱ្យយឺតយូរ។

សម្រាប់ប្រជាពលរដ្ឋនិងអ្នកវិភាគសង្គមមើលឃើញវិធានការរបស់លោកអធិការស្រុកសន្ដាន់ធ្វើឡើងនោះគឺជាវិធាននៃការ«អារក ស្វា បំភ័យមាន់» ដើម្បីកុំឲ្យជនដទៃទៀត ចេះតែផ្ដល់មតិរិះគន់ផ្ដេសផ្ដាសធ្វើឲ្យកម្លាំងនគរបាលនៅខេត្តកំពង់ធំអាប់មុខមាត់។

មជ្ឃដ្ឋានប្រជាពលរដ្ឋបានលើកឡើងថា តើកំហុសឆ្គងនោះគួរតែត្រូវធ្វើកិច្ចសន្យាផ្ដិតមេដៃដែរឬទេ? ហេតុអ្វីបានជាមិនប្រាប់សាមីជន អំពីចំណុចខ្វះខាតក្នុងការបំពេញលក្ខខណ្ឌ ត្រូវធ្វើអ្វីៗឲ្យបានច្បាស់លាស់? អ្វីទៅដែលហៅថា «សេវាសាធារណៈរបស់រដ្ឋត្រូវបម្រើប្រជាពលរដ្ឋនោះ»?

បើតាមអ្នកនាំពាក្យនៃស្នងការដ្ឋាននគរបាលខេត្តកំពង់ធំថា សូមជម្រាបជូនសាធារណៈជន អ្នកលេងបណ្តាញសង្គម ក៏ដូចជា Page ដែលបាន Comment  ឆ្លើយតបក្នុង Page ស្នងការដ្ឋាននគរបាលខេត្តកំពង់ធំ និងអ្នកដែលត្រូវបានលោ អធិការស្រុក អញ្ជើញ អ្នកComment សួរថា តើសៀវភៅគ្រួសារ និងសៀវភៅស្នាក់នៅ ធ្វើប៉ុន្មានថ្ងៃបានជាយូរដែរ ហើយពេលនោះ លោកអធិការ ក៏បានហៅឈ្មោះ សឿង សុភ័ក្រ ដែលជាអ្នក comment ក្នុងPage ស្នងការដ្ឋាននគរបាលខេត្ត មកធ្វើកិច្ចសន្យា អប់រំ ដើម្បីបញ្ឈប់ នូវពាក្សរសេរCommentខាងលើ «ដែលនេះគឺជាការខុសឆ្គងរបស់សមត្ថកិច្ចសម្រាប់បងប្អូនប្រជាពលរដ្ឋ»។

ក្នុងនាមអ្នកនាំពាក្យសូមធ្វើការអធ្យាស្រ័យនិងកែតម្រូវឡើងវិញ នូវការធ្វេសប្រហែសរបស់អធិការដ្ឋាននគរបាលស្រុកសណ្តាន់ ដែលបានអញ្ជើញឈ្មោះខាងលើមកធ្វើកិច្ចសន្យា គឺមិនមែនធ្វើកិច្ចសន្យាទេ គឺធ្វើការបំភ្លឺ ពាក់ព័ន្ធនិងការខ្វះឯកសាររបស់បុគ្គលនេះ។

ពាក់ព័ន្ធការបំភ្លឺខាងលើនេះ មជ្ឍដ្ឋានដាក់ចម្ងល់ថា តើអ្វីជាការបំភ្លឺនេះ មើលទៅហាក់ដូចជាប្រជាពលរដ្ឋមិនមានសមត្ថភាព ចំណេះដឹងនិងមិនយល់ដែលចំពោះអ្វីដែលហៅថា បំភ្លឺ និងអ្វីទៅជាកិច្ចសន្យា? មានទាំងផ្ដិតមេដៃនិងពាក្យ«កិច្ចសន្យា» ច្បាស់ក្រឡែតបែរជាអ្នកនាំពាក្យនៃស្នងការដ្ឋាននគរបាលខេត្តកំពង់ធំឆ្លើយថា «បំភ្លឺ» ទៅវិញ?

នៅលើបណ្ដាញសង្គមមានការរិះគន់យ៉ាងខ្លាំងចំពោះលោកស្នងការនគរបាលខេត្តកំពង់ធំ ឭក៏ដូចជាលោកអធិការនគរបាលស្រុកសណ្ដាន់នោះផងដែរ។ ប្រសិនបើនគរបាលបានកោះហៅបុរសខាងលើមកសួរនាំនិងគ្រាន់តែប្រាប់អំពីឯកសារខ្វះខាតយកមកបំពេញបន្ថែមនោះគេជឿថា មិនមានបញ្ហាអ្វីឡើយ។

តើធ្ងន់ណាស់ទៅឬ បើគ្រាន់តែប្រាប់ទៅប្រជាពលរដ្ឋថា ខ្វះឯកសារនេះឬនោះបន្ថែមទៀត ដើម្បីធ្វើសៀវភៅស្នាក់នៅឬបំពេញសំណុំឯកសារផ្សេងៗនោះ?។ យ៉ាងនេះហើយបានជាប្រជាពលរដ្ឋភាគច្រើនលើសលប់ហៅវិធានការរបស់អធិការនគរបាលស្រុកសណ្ដាន់ក៏ដូចជាស្នងការនគរ បាលខេត្តកំពង់ធំជាវិធានការ «អាករស្វា បន្លាចមាន់»៕