ប៉ូលិសឃាត់ខ្លួនមុខសញ្ញារក្សាទុកគ្រឿងញៀនខុសច្បាប់បាន២នាក់នៅស្រុកសង្កែ
កាលពីវេលាម៉ោង២១៖៣០នាទី ថ្ងៃទី១៨ ខែតុលា ឆ្នាំ២០២៣ នៅចំណុចក្រុមទី៣ ភូមិបេង ឃុំអន្លង់វិល ស្រុកសង្កែ ខេត្តបាត់ដំបង កកម្លាំងផ្នែកប្រឆាំងគ្រឿងញៀនបានសហការជាមួយកម្លាំងប៉ុស្តិ៍នគរបាលរដ្ឋបាល នៃអធិការដ្ឋាននគរបាលស្រុកសង្កែដឹកនាំដោយលោកវរសេនីយ៍ទោ យុត តុងហូ អអធិការនគរបាលស្រុកបានចុះល្បាតក្នុងភូមិសាស្ត្រ បង្ក្រាបបានករណី រក្សាទុកដោយខុសច្បាប់នូវសារធាតុញៀន ១ករណី ក្នុងបទល្មើសជាក់ស្តែង។
ក្នុងកិច្ចប្រតិបត្តិការនេះ សមត្ថកិច្ចឃាត់ខ្លួនជនសង្ស័យ២នាក់៖ ១- ឈ្មោះ អ៊ន សាវឌ្ឍ ភេទប្រុស អាយុ ៣៦ឆ្នាំ មានទីលំនៅភូមិឈើទាល ឃុំឈើទាល ស្រុកបាណន់ ខេត្តបាត់ដំបង និង២- ឈ្មោះ ផន រំដោះ ភេទប្រុស អាយុ ១៦ឆ្នាំ មានទីលំនៅភូមិខ្វាវកើត ឃុំខ្វាវកើត ស្រុកស្វាយចេក ខេត្តបន្ទាយមានជ័យ ។ រួមជាមួយវត្ថុតាងចាប់យកបានរួមមាន៖ ថ្នាំញៀនប្រភេទមេតំហ្វេតាមីន (ម៉ាទឹកកក ICE) ២ថង់ ទម្ងន់ ០,៦៦ក្រាម, សម្ភារៈកែច្នៃសម្រាប់ប្រើប្រាស់ថ្នាំញៀនមួយចំនួន, ទូរសព្ទ័ដៃ៣គ្រឿង, ប្រាក់ខ្មែរ៨០,០០០រៀល, ម៉ូតូ១គ្រឿង ម៉ាកហុងដាឌ្រីម ពណ៌ក្រហម សេរីឆ្នាំ២០១៨ ពាក់ស្លាកលេខ បាត់ដំបង បាត់ដំបង 1AC-5514 ។
បច្ចុប្បន្នកម្លាំងអធិការដ្ឋាននគរបាលស្រុកសង្កែ កំពុងកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់វិធានការតាមនីតិវិធីច្បាប់៕