រដ្ឋមន្ត្រី ឈាង រ៉ា បន្តធ្វើបឋកថាស្តីពីភាពជាអ្នកដឹកនាំ និងនវានុវត្តន៍ ជូនដល់មន្រ្តីក្រោមឱវាទក្រសួងសុខាភិបាល « វគ្គទី៣»

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នៅថ្ងៃអង្គារ ទី២៤ ខែតុលា ឆ្នាំ២០២៣ចាប់ពីវេលាម៉ោង២:០០នាទីរសៀល បានដឹកនាំបន្ត នៃវគ្គបណ្តុះបណ្តាលស្តីពី «ភាពជាអ្នកដឹកនាំ និងនវានុវត្តន៍» វគ្គទី៣ ដល់មន្រ្តីក្រោមឱវាទក្រសួងសុខាភិបាល ក្នុងការអនុវត្តយុទ្ធសាស្រ្តអាទិភាពមួយក្នុងចំណោមអាទិភាព៣ បានដាក់ចេញដើម្បីគាំទ្រកំណែទម្រង់ និងអនុវត្តយុទ្ធសាស្រ្តបញ្ចកោណ របស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា។

ក្នុងសប្តាហ៍នេះ គោលបំណងនៃមេរៀនទាំងពីរគឺសំដៅឆ្លុះបញ្ចាំងក្នុងការប្រើប្រាស់ និងបង្កើតសមត្ថភាពស្វែងយល់ពីភាពខុសគ្នាសំខាន់ៗ និងរបៀបបង្កើតរវាងការគិតប្រកបដោយយុទ្ធសាស្រ្ត និងការរៀបចំផែនការប្រកបដោយយុទ្ធសាស្រ្តនៅក្នុងស្ថាប័នរបស់ខ្លួនដើម្បីទទួលបានលទ្ធផល និងការអភិវឌ្ឍឈានទៅមុខ។ ថែមទាំងស្វែងយល់ពីមូលហេតុដែលការសម្របខ្លួន និងភាពរហ័សរហួន របស់អ្នកដឹកនាំ គឺជាចំណុចសំខាន់ ដើម្បីយល់ដឹងអំពីសកម្មភាពគន្លឹះនានាដែលចាំបាច់សម្រាប់ការធ្វើឱ្យប្រសើរឡើងនូវភាពជាអ្នកដឹកនាំបែបសម្របខ្លួន និងឆ្លើយតបទាន់ពេលវេលា។

វគ្គបណ្តុះបណ្តាលនេះ ត្រូវបានរៀបចំឡើងរៀងរាល់រសៀលថ្ងៃអង្គារ តាមប្រព័ន្ធវីដេអូសន្និសីទដែលមានសមាសភាពចូលរួមសរុបចំនួន ១,៨២៧នាក់ ដោយសប្តាហ៍នេះមានការចូលរួមបន្ថែមពី គ្រប់ប្រធានការិយាល័យថ្នាក់កណ្តាល រហូតដល់រដ្ឋលេខាធិការក្រសួងសុខាភិបាល និងប្រធានអង្គភាពថ្នាក់ក្រោមជាតិ ចាប់ពីប្រធានមណ្ឌលសុខភាព រហូតដល់ប្រធានមន្ទីរសុខាភិបាលរាជធានី-ខេត្ត៕