ឯកឧត្ដម ហង្ស ពុទ្ធា៖ ទិដ្ឋភាពទូទៅនៃការបោះឆ្នោតជ្រើសតាំងសមាជិកព្រឹទ្ធសភាមានសណ្តាប់ធ្នាប់ សន្តិសុខសុវត្ថិភាពល្អ

អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ឯកឧត្ដម ហង្ស ពុទ្ធា បានបញ្ជាក់ប្រាប់ក្រុមអ្នកសារព័ត៌មានថា ដំណើរការបោះឆ្នោតជ្រើសតាំង សមាជិកព្រឹទ្ធសភា នីតិកាលទី៥ ឆ្នាំ២០២៤ បានចាប់ពីម៉ោង៧ព្រឹក ការិយាល័យនៅទូទាំង ប្រទេស បានបើកដំណើរការព្រមគ្នាទាំង ៣៣ការិយាល័យ នៅគ្រប់៨មណ្ឌលតែម្តង នៅព្រឹកថ្ងៃទី២៥ ខែកុម្ភៈ ឆ្នាំ២០២៤នេះ។

ឯកឧត្ដមបានដឹងឱ្យថា អង្គបោះឆ្នោតដែលជាសមាជិកសភា និងសមាជិកក្រុមប្រឹក្សាឃុំ សង្កាត់ បានអញ្ជើញមកមុនដើម្បីតម្រង់ ជួរដើម្បីត្រៀមលក្ខណៈឆ្ពោះទៅរកការបោះឆ្នោត។

អ្នកនាំពាក្យ គ.ជ.ប បានបន្តថា ការបោះឆ្នោតនេះក្រោមការឃ្លាំ មើលពីអ្នកសង្កេតការណ៍ជាតិប្រមាណ ៧៦០នាក់ និងអន្តរជាតិ ៣០នាក់ ក្នុងនោះក៏មានភ្ញៀវពិសេស ៣នាក់ផងដែរ។ ភ្នាក់ងារ គណបក្សនយោបាយចំនួន ២២៨នាក់ បានដាក់គ្រប់ ការិយាល័យ ទាំង៣៣។ អ្នកយកព័ត៌មានជាតិ ចំនួន ៣០៦នាក់ បានធ្វើការសង្កេត មើល។ អ្នកព័ត៌មានអន្តរជាតិមានចំនួន ២៥នាក់ តាមឃ្លាំមើលដំណើរ ប្រព្រឹត្តទៅនៃការបោះឆ្នោតនេះ។

ឯកឧត្ដមបានបញ្ជាក់ថា មួយម៉ោងដំបូងឃើញថា យ៉ាង ហោចក៏ មានការិយាល័យបោះឆ្នោតចំនួន២បានបិទ និងបានរាប់រួច ហើយ ដែរ គឺនៅខាងមណ្ឌលគីរី និងកែប។

ឯកឧត្ដម ហង្ស ពុទ្ធា បានបញ្ជាក់ថា នៅការិយាល័យបោះឆ្នោត នៃវិទ្យាល័យព្រះស៊ីសុវត្ថិ គឺមានអង្គបោះឆ្នោតចំនួន ៩១១នាក់ ចេញចែកជា ២ការិយាល័យ។

ឯកឧត្ដមបានបន្ថែមថា សម្រាប់ទិដ្ឋភាពទូទៅមានសណ្តាប់ធ្នាប់ សន្តិសុខ សុវត្ថិភាពល្អ និងមានកិច្ចសហការល្អរវាងអាជ្ញាធរ ដែនដី គណៈអចិន្ត្រៃយ៍សន្តិសុខសម្រាប់ការបោះឆ្នោត ព្រមទាំងមន្ត្រី គ.ជ.ប និងតំណាងគណបក្សនយោបាយ ក៏មានវត្តមានផង ដែរ។ ការ ប្រព្រឹត្តទៅដោយរលូន។

ឯកឧត្ដមសង្ឃឹមថា រហូតដល់ចប់ការ បោះឆ្នោតនេះក៏នឹងប្រព្រឹត្តទៅដោយល្អប្រសើរ៕