លោក ហ៊ាង ប៊ុនថា ប្រធានសមាគមព័ត៌មានអនឡាញកម្ពុជានិងសមាជិក សមាជិកាទាំងអស់ផ្ញើថ្វាយព្រះពរព្រះពរសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្នុងឱកាសឆ្នាំថ្មី ឆ្នាំសកល២០២៥

(ភ្នំពេញ)៖ បពិត្រសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត!

ក្នុងឱកាសចូលឆ្នាំថ្មី ឆ្នាំសកល២០២៥ ទូលព្រះបង្គំខ្ញុំបាទ ហ៊ាង ប៊ុនថា ប្រធានសមាគមព័ត៌មានអនឡាញកម្ពុជា និងសមាជិក សមាជិកាទាំងអស់សូមព្រះបរមរាជានុញ្ញាតអភិវន្ទលំឱនកាយវាចាចិត្ត ក្រាបបង្គំសម្តែង ថ្វាយនូវមនោសញ្ចេតនារីករាយ និងកតញ្ញូតាធម៌ដ៏ជ្រាលជ្រៅបំផុតចំពោះព្រះគុណបំណាច់ដ៏ធំធេងក្នុងព្រះរាជកិច្ច បំពេញបេសកកម្មដ៏មហាបវរត្រចះត្រចង់ និងប្តូរផ្តាច់បម្រើឧត្តមប្រយោជន៍ជូន ជាតិ សាសនា ព្រះមហាក្សត្រ និង សូមក្រាបបង្គំថ្វាយនូវព្រះសព្វសាធុការពរជ័យបវរសួស្តី សិរីមង្គល មហាប្រសើរថ្វាយចំពោះ សម្តេចព្រះមហា ក្សត្រី ព្រះវររាជមាតាជាតិខ្មែរ។

ក្នុងវេលាប្រកបដោយសិរីមង្គលាភិរម្យដ៏ប្រពៃថ្លៃថ្លានេះ ទូលព្រះបង្គំយើងខ្ញុំទាំងអស់គ្នា សូមលើកហត្ថទាំងទ្វេប្រណមឧទ្ទិសបួងសួងដល់ព្រះគុណបុណ្យបារមីនៃវត្ថុស័ក្តិសិទ្ធិក្នុងលោក ទេវតាថែរក្សាព្រះមហាស្វេតច្ឆត្រ ព្រះ វិញ្ញាណក្ខន្ធអតីតព្រះមហាក្សត្រ និងព្រះមហាក្សត្រិយានីគ្រប់ព្រះអង្គសូមមេត្តាជួយប្រោះព្រំថ្វាយចំពោះ សម្តេច ព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមប្រកបដោយព្រះបញ្ញា ញាណភ្លឺថ្លា ព្រះកាយពលមាំមួន ព្រះសុខភាពល្អបរិបូរណ៍ និងមានព្រះជន្មាយុយឺនយូរ ដើម្បីគង់នៅប្រថាប់ជាម្លប់ ដ៏ត្រជាក់ត្រជំ និងបន្តព្រះរាជសកម្មភាពនានាលើវិស័យមនុស្សធម៌ និងសុខុមាលភាពសង្គម ដល់ប្រជានុរាស្ត្រ កូន ចៅ ចៅទួត របស់ព្រះអង្គបានសុខក្សេមក្សាន្តជានិរន្តរ។

សូមក្រាបថ្វាយបង្គំ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់ ព្រះមេត្តាទទួលនូវអភិវន្ទន៍កិច្ច និងកតញ្ញូតាធម៌ដ៏ខ្ពង់ខ្ពស់បំផុតពីទូលព្រះបង្គំយើងខ្ញុំទាំងអស់គ្នា៕