លោក ហ៊ាង ប៊ុនថា ប្រធានសមាគមព័ត៌មានអនឡាញកម្ពុជានិងសមាជិក សមាជិកាទាំងអស់ផ្ញើសារលិខិតថ្វាយព្រះពរព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសឆ្នាំថ្មី ឆ្នាំសកល២០២៥

(ភ្នំពេញ)៖ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត! ក្នុងឱកាសចូលឆ្នាំថ្មី ឆ្នាំសកល២០២៥ ទូលព្រះបង្គំខ្ញុំបាទ ហ៊ាង ប៊ុនថា ប្រធានសមាគមព័ត៌មានអនឡាញកម្ពុជា និងសមាជិក សមាជិកាទាំងអស់ សូមព្រះបរមរាជានុញ្ញាតអភិវន្ទលំឱនកាយវាចាចិត្ត ក្រាបបង្គំសម្តែង ថ្វាយ នូវមនោសញ្ចេតនារីករាយ និងកតញ្ញូតាធម៌ ដ៏ជ្រាលជ្រៅបំផុតចំពោះព្រះគុណបំណាច់ដ៏ធំធេងរបស់ព្រះអង្គ ក្នុងព្រះរាជកិច្ចបំពេញបេសកកម្មដ៏មហាបវរត្រចះត្រចង់ និងប្តូរផ្តាច់បម្រើឧត្តមប្រយោជន៍ជូនជាតិ មាតុភូមិ និងប្រជាជនកម្ពុជា។

ក្នុងវេលាប្រកបដោយសិរីមង្គលាភិរម្យដ៏ប្រពៃថ្លៃថ្លានេះ ទូលព្រះបង្គំយើងខ្ញុំទាំងអស់គ្នា សូមថ្វាយនូវព្រះសព្ទ សាធុការពរជ័យ បវរសួស្តី សិរីមង្គល វិបុលសុខ មហាប្រសើរគ្រប់ប្រការ និងសូមលើកហត្ថទាំងទ្វេ ប្រណមឧទ្ទិស បួងសួងដល់ព្រះគុណបុណ្យបារមីវត្ថុស័ក្តិសិទ្ធិក្នុងលោក ទេវតាថែរក្សាព្រះមហាស្វេតច្ឆត្រ ព្រះវិញ្ញាណក្ខន្ធអតីតព្រះ មហាក្សត្រ និងព្រះមហាក្សត្រិយានីគ្រប់ព្រះអង្គសូមមេត្តាជួយប្រោះព្រំថ្វាយចំពោះ ព្រះករុណាថ្លៃវិសេស ជា ទីគោរពសក្ការៈដ៏ខ្ពង់ខ្ពស់បំផុត សូមបានប្រកបដោយព្រះរាជបញ្ញាញាណភ្លឺថ្លា ព្រះរាជសុខភាពល្អបរិបូរណ៍ ព្រះរាជកាយពលមាំមួន និងព្រះរាជជន្មាយុយឺនយូរ ដើម្បីគង់នៅប្រថាប់ជាម្លប់ដ៏ត្រជាក់ត្រជំ និងអភិបាលក្នុងព្រះ បរមរាជសម្បត្តិជាយូរអង្វែងតរៀងទៅ។ ទូលព្រះបង្គំយើងខ្ញុំទាំងអស់គ្នា សូមសម្តែងនូវព្រះគុណូបការៈ ការប្តេជ្ញា ចិត្តដ៏មោះមុត និងស្វាមីភក្តិឥតងាករេ ដង្ហែតាមព្រះរាជកិច្ចដ៏ថ្លៃថ្លា ព្រះរាជបញ្ញាញាណដ៏ឧត្តុង្គឧត្តម របស់ ព្រះករុណាជាអម្ចាស់ជីវិតលើត្បូង ដើម្បីចូលរួមបំពេញបេសកកម្មដ៏មហាបវរត្រចះត្រចង់ និងប្តូរផ្តាច់បម្រើ ជាតិ សាសនា ព្រះមហាក្សត្រ។

សូមក្រាបថ្វាយបង្គំ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ទ្រង់ព្រះមេត្តាទទួលនូវគារវកិច្ចដ៏ខ្ពង់ខ្ពស់ និងគារវភក្ដីភាពដ៏ស្មោះស្ម័គ្របំផុតពីទូលព្រះបង្គំយើងខ្ញុំ ទាំងអស់គ្នា៕