ក្រុមប៉ូលិសក្រុងតាខ្មៅចាប់បានទាំងចោរនិងអ្នកទិញរបស់ចោរចំនួន៥នាក់យកញាត់គុក

(កណ្ដាល)៖ ដោយអនុវត្តតាមបទបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាលខេត្តកណ្តាល នៅព្រឹកថ្ងៃទី០៣ ខែមករា ឆ្នាំ២០២៥ កម្លាំងនគរបាលនៃអធិការដ្ឋាននគរបាលក្រុងតាខ្មៅ ដឹកនាំបញ្ជាដោយលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ ផ្នែកនគរបាលព្រហ្មទណ្ឌក្រុងតាខ្មៅ សហការជាមួយ ប៉ុស្តិ៍នគរបាលរដ្ឋបាលតាខ្មៅ ក្រោយទទួលបណ្តឹងពី ប្រជាពលរដ្ឋ អំពីករណីចោរតែងលួចកាច់កុងទ័រទឹករបស់ពួកគាត់ នគរបាលក្រុងតាខ្មៅចុះស្រាវជ្រាវឆែកកាមេរ៉ាសុវត្ថិភាពក្បែរកន្លែងកើតហេតុ កំណត់មុខសញ្ញាជនសង្ស័យបាន ទើបឈានដល់ការចុះបង្ក្រាបឃាត់ខ្លួនជនសង្ស័យបានចំនួន០៥នាក់ ក្នុងនោះម្នាក់ពាក់ព័ន្ធអំពើរចោរកម្ម ម្នាក់ទៀតពាក់ព័ន្ធអំពើរទទួលផលចោរកម្ម និង ៣នាក់ទៀតជាអ្នកសមគំនិតក្នុងអំពើលួចនិងប្រើប្រាស់ខុសច្បាប់នូវសារធាតុញៀន។

បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលក្រុងតាខ្មៅ ដើម្បីកសាងសំណុំរឿងចាប់បញ្ជូនទៅតុលាការចាត់ការតាមនីតិវិធី។

បើតាមលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅបានប្រាប់ឲ្យអង្គភាព The Mirror News ដឹងនៅព្រឹកនេះថា ពិតជាមានការចាប់ឃាត់ខ្លួនក្រុមចោរនិងអ្នកទទួលផលចោរកម្មចំនួន៥នាក់មែន ហើយក្រុមជនសង្ស័យត្រូវបានបញ្ជូនទៅលើអស់ហើយគឺយកដាក់គុកតែម្ដង៕