កងរាជអាវុធហត្ថលើផ្ទៃប្រទេសចេញសេចក្តីប្រកាសព័ត៌មាន អំពីការស្រាវជ្រាវទៅលើករណីរថយន្តស៊ីរ៉ែនពាក់ស្លាកលេខ ខេមរភូមិន្ទ 02 2-1871

(ភ្នំពេ)៖ នៅព្រឹកថ្ងៃចន្ទទី១៣ ខែមករា ឆ្នាំ ២០២៥នេះ លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស សូមគោរពជម្រាបជូនសាធារណជន និងអ្នកសារព័ត៌មាន អំពីការស្រាវជ្រាវរបស់កងរាជអាវុធហត្ថ ទៅ លើករណីរថយន្តស៊ីរ៉ែនពាក់ស្លាកលេខ ខេមរភូមិន្ទ 02 2-1871 ដូចខាងក្រោម៖

១- តាមសេចក្តីរាយការណ៍របស់លោក ឧត្តមសេនីយ៍ ឯក រ័ត្ន ស្រឹង មេបញ្ជាការរង កងរាជអាវុធហត្ថលើផ្ទៃប្រទេស,មេបញ្ជាការកងរាជអាវុធហត្ថរាជធានីភ្នំពេញ៖ អនុវត្តតាម បទបញ្ជាយ៉ាងម៉ឺងម៉ាត់របស់ នាយឧត្តម សេនីយ៍ អគ្គមេបញ្ជាការរងនៃកងយោធ ពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស កម្លាំងជំនាញបានស្រាវជ្រាវ និងចុះទៅដល់ទីតាំងលំនៅឋានរបស់បុគ្គលដែលពាក់ព័ន្ធនឹងរថយន្តស៊ីរ៉ែនអូសក្បួននោះ ហើយ បានកោះអញ្ជើញបុគ្គលពាក់ព័ន្ធមកបញ្ជា ការដ្ឋានកងរាជអាវុធហត្ថរាជធានីភ្នំពេញ ដើម្បីបំភ្លឺ។

២- ក្រោយពីបានស្តាប់ដំណើររឿង និងអង្គហេតុរួចមក កម្លាំងជំនាញកងរាជអាវុធហត្ថ បានអប់រំបុគ្គលដែលពាក់ព័ន្ធឱ្យយល់ដឹង អំពីការប្រើប្រាស់ភ្លើងសញ្ញាពិសេស សូរស័ព្ទពិសេស សិទ្ធិអាទិភាពធ្វើចរាចរណ៍ក្នុងព្រះរាជាណាចក្រកម្ពុជា និងបានធ្វើកិច្ចសន្យា កុំឱ្យប្រព្រឹត្តទង្វើ បែបនោះតទៀត ជាពិសេសត្រូវចូលរួមគោរពច្បាប់ លិខិតបទដ្ឋានគតិយុត្តនានា។

៣- ចំពោះម្ចាស់រថយន្តស៊ីរ៉ែនពាក់ស្លាកលេខ ខេមរភូមិន្ទ 02 2-1871 បានប្រគល់ជូន អង្គភាពសាមី ដើម្បីចាត់វិធានការអនុវត្តទណ្ឌកម្មវិន័យកងទ័ព។

កងរាជអាវុធហត្ថ សូមថ្លែងអំណរគុណយ៉ាងជ្រាលជ្រៅចំពោះការចូលរួមផ្តល់មតិក្នុង ន័យស្ថាបនា និងការផ្តល់ព័ត៌មាន នាពេលកន្លងទៅ។

គួររំលឹកថា លោកនាយឧត្តមសេនីយ៍សៅ សុខា អគ្គមេបញ្ជាមការរងនៃកងយោធពលខេមរភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេសបានចេញបញ្ជាម៉ឺងម៉ាត់ហើយសមត្ថកិច្ចចាត់វិធានការយ៉ាងណាចាប់ឲ្យបានរថយន្តដែលបំពាក់ស៊ីរ៉ែន ដឹកនាំក្បួនស្ត្រីអ្នករកស៊ីអនឡាញទៅចូលរួមមង្គលការមួយ។ នេះជាអ្វីដែលជាការឆ្លើយតបទៅនឹងការរិះគន់ជាច្រើនអំពីការដែលរថយន្តបំពាក់ស៊ីរ៉ែនហើយនាំមុខស្ត្រីអ្នកលក់អនឡាញទៅចូលរួមមង្គលការមួយនោះ។

ឆ្លើយតបចំពោះអ្នករិះគន់ទៅលើស្ត្រីអ្នកលក់អនឡាញប្រើរថយន្តសេរ៉ែននាំមុខពេលចេញដំណើរទៅស៊ីការនោះ អ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អេង ហ៊ី បានឲ្យដឹងថា កងកម្លាំងរាជអាវុធហត្ថបាននិងកំពុងស្រាវជ្រាវរកមុខកញ្ញារូបស្រស់ម្នាក់ ដែលជាអ្នករកស៊ីអនឡាញជិះរថយន្តស៊េរីទំនើប ហើយអមដោយរថយន្តបំពាក់ផ្លាកលេខខេមរ ភូមិន្ទ (ខ.ម) និងបើកភ្លើងសារ៉ែនបើកនាំផ្លូវទៅស៊ីការគេកាលពីពេលថ្មីៗនេះហើយ។

រយៈពេលប៉ុន្មានថ្ងៃមកនេះ មានករណីភ្ញាក់ផ្អើលលើបណ្ដាញសង្គមអំពីនារីស្អាតជាអ្នកលក់អនឡាញបានជិះរថយន្តទំនើប ដោយមានរថយន្តផ្សេងបំពាក់ផ្លាកលេខខេមរភូមិន្ទ និងបើកភ្លើងសារ៉ែននាំផ្លូវទៅស៊ីការគេចែកចាយពេញបណ្តាញសង្គមហ្វេសប៊ុក ហើយមានការផ្ទុះការរិះគន់ផងនោះលោកឧត្តមសេនីយ៍ត្រី អេង ហ៊ី ថ្លែងថា កងកម្លាំងរាជអាវុធបានចុះស្រាវជ្រាវហើយ។ លោកក៏បានបកស្រាយអំពីផ្លាកលេខរថយន្តរបស់កងខេមរនភូមិន្ទមានលេខសម្គាល់របស់ខ្លួនទៅតាមបណ្តាអង្គភាពនីមួយៗដែរ ។

លោកឧត្តមសេនីយ៍ត្រីពន្យល់ថា ផ្លាកលេខខេមរភូមិន្ទនេះ គឺមាន ខ.ម០១ ខ.ម០២ និងលេខរៀងជាបន្ត បន្ទាប់ទៅ។ ក្នុងនោះសម្រាប់កងរាជអាវុធគឺ ខ.ម០៩។

លោកឧត្តមសេនីយ៍ត្រីថា ជាជំហានដំបូងសម្រាប់ករណីនេះ បើតាមឆែកឆេរ នៅក្នុងអង្គភាពនីមួយៗ គឺអត់មានផ្លាកលេខឡាន ដូចបំពាក់លើក្បួន រថយន្តរបស់ស្រ្តីលក់អនឡាញនេះទេ ប៉ុន្តែទោះបីជាយ៉ាងណាអ្នក ជំនាញរបស់កងរាជអាវុធនៅតែបន្តស្រាវជ្រាវ ។ លោក អេង ហ៊ី ក៏បញ្ជាក់ដែរចំពោះការគ្រប់គ្រងផ្លាកលេខ ខ.ម  គឺជាសមត្ថកិច្ចរបស់ក្រសួងការពាជាតិ។ លោកឧត្តមសេនីយ៍គូសបញ្ជាក់ថា «ចំពោះពាក់ព័ន្ធនឹងឡានពាក់ផ្លាកលេខខ.ម ហើយសារ៉ែន កម្លាំងកងរាជអាវុធយើង ក៏ឆែកឆេរត្រួតនពិនិត្យនៅក្នុងអង្គភាពរបស់អាវុធហត្ថគឺអត់មានទេ ផ្លាកលេខហ្នឹង ហើយកងរាជអាវុធហត្ថកំពុងតែធ្វើការងារបន្ត»។

គួរសូមបញ្ជាក់ថា សម្តេចតេជោ ហ៊ុន សែន អតីតនាយករដ្ឋមន្រ្តីកម្ពុជា និងបច្ចុប្បន្នជាប្រធានព្រឹទ្ធសភាកម្ពុជាធ្លាប់បានអះអាងនាពេលកន្លងមកថា ឥស្សរជនជាន់ខ្ពស់ដែលមានសិទ្ធិប្រើប្រាស់រថយន្តបើកភ្លើងសារ៉ែននេះ គឺមានតែព្រះមហាក្សត្រ ប្រធានព្រឹទ្ធសភា ប្រធានរដ្ឋសភា និងនាយករដ្ឋមន្រ្តី៕

អត្ថបទដែលជាប់ទាក់ទង