រដ្ឋមន្ដ្រី ប៉េង ពោធិ៍នា ដឹកនាំកិច្ចប្រជុំផ្សព្វផ្សាយគោលការណ៍ណែនាំស្តីពីការពិនិត្យនិងការអនុម័តលើបញ្ជីប៉ាន់តម្លៃ និងការរៀបចំលិខិតស្នើសុំថវិកា សម្រាប់គម្រោងផែនការឆ្នាំ

រដ្ឋមន្ត្រីក្រសួងសាធារណការ និងដឹកជញ្ជូន ឯកឧត្តម ប៉េង ពោធិ៍នា នារសៀលថ្ងៃសុក្រ ទី២០ ខែតុលា ឆ្នាំ២០២៣ នៅទីស្តីការក្រសួងបានអញ្ជើញដឹកនាំកិច្ចប្រជុំផ្សព្វផ្សាយគោលការណ៍ណែនាំ ស្តីពីការពិនិត្យនិងការអនុម័តលើបញ្ជីប៉ាន់តម្លៃ និងការរៀបចំលិខិតស្នើសុំថវិកា សម្រាប់គម្រោងផែនការឆ្នាំ ក្នុងការងារថែទាំ ជួសជុល សាងសង់ ហេដ្ឋារចនាសម្ព័ន្ធផ្លូវថ្នល់-ស្ពាន និងសំណង់សាធារណការ ដោយប្រើប្រាស់ថវិកាជាតិ ជំពូក៦១ និងជំពូក២១។

គោលការណ៍ណែនាំខាងលើត្រូវបានរៀបចំតាក់តែង ដើម្បីធ្វើឱ្យប្រសើរឡើង នូវការតាមដានរំហូរការពិនិត្យ និងអនុម័តលើបញ្ជីប៉ាន់តម្លៃ សំដៅកាត់បន្ថយពេលវេលានៃដំណើរការរដ្ឋបាល ព្រមទាំងបង្កើនប្រសិទ្ធភាព និងសង្គតិភាពការងារ។

កិច្ចប្រជុំខាងលើនេះ ក៏មានការចូលរួមពីលោកជំទាវ ឯកឧត្តម ថ្នាក់ដឹកនាំ និងមន្ត្រីពាក់ព័ន្ធផ្សេងទៀត៕