ខ្លាចប្រជាពលរដ្ឋក្នុងមូលដ្ឋានបាត់បង់ទ្រព្យសម្បត្តិ, កម្លាំងនគរបាលខេត្តព្រៃវែងចុះល្បាតការពារសន្តិសុខ និងណែនាំដល់ប្រជាពលរដ្ឋ 

ដើម្បីសុខសវត្ថិភាពប្រជាពលរដ្ឋនិងខ្លាចប្រជាពលរដ្ឋបាត់បង់ទ្រព្យសម្បតិ្តក្នុងមូលដ្ឋាន នៅព្រឹកថ្ងៃសៅ ទី២១ ខែតុលា ឆ្នាំ២០២៣នេះកម្លាំងនគរបាល នៃអធិការដ្ឋាននគរបាលក្រុង-ស្រុក ក្នុងខេត្តព្រៃវែង ល្បាតការពារសន្តិសុខ សណ្ដាប់ធ្នាប់តាមមូលដ្ឋាន និងចុះធ្វើការណែនាំដល់ប្រជាពលរដ្ឋ ពិសេសប្រជាកសិករ ដែលទុកម៉ូតូ និងយានជំនិះផ្សេងៗរបស់ខ្លួនចោល ដោយខ្វះការប្រុងប្រយ័ត្ន ។

គួរបញ្ជាក់ថា ខណៈចុះល្បាតការពារសន្តិសុខ សណ្ដាប់ធ្នាប់ តាមមូលដ្ឋាន កម្លាំងនគរបាលខេត្តព្រៃវែង បានប្រទះឃើញម៉ូតូ និងយានជំនិះផ្សេងៗរបស់ប្រជាពលរដ្ឋ បានចតទុកចោលជាច្រើនហូរហែ តាមវាលស្រែ ភ្លឺស្រែ និងនៅតាមដងផ្លូវក្បែរនឹងដីស្រែរបស់ពួកគាត់ ដោយមួយចំនួនមានការធ្វេសប្រហែស ខ្វះការប្រុងប្រយ័ត្ន ទើបកម្លាំងនគរបាល ចុះធ្វើការណែនាំដល់បងប្អូនប្រជាពលរដ្ឋ សូមបង្កើនការប្រុងប្រយ័ត្ន កុំបីមានការធ្វេសប្រហែសឡើយ ចំពោះការទុកដាក់យានជំនិះ ឧបករណ៍គ្រឿងម៉ាស៊ីនសម្រាប់ប្រើប្រាស់ក្នុងវិស័យកសិកម្ម និងទ្រព្យសម្បត្តិផ្សេងៗរបស់ពួកគាត់៕