ពូជនរងគ្រោះថ្លែងអំណរគុណសាលាដំបូងខេត្តសៀមរាបដែលបានជួយសម្របសម្រួលផ្តល់សំណងជំងឺចិត្តជូនក្មួយរបស់គាតរងគ្រោះដោយសារគ្រោះថ្នាក់ចរាចរណ៍
លោក អៀម សុធា ម្ចាស់គណនីហ្វេសប៊ុកឈ្មោះ ភោគ ឡាយ ត្រូវជាពូបង្កើតរបស់ជនរងគ្រោះដោយសារគ្រោះថ្នាក់ចរាចរណ៍ ឈ្មោះ ភុំ កុលាប បានសូមថ្លែងអំណរគុណដល់សាលាដំបូងខេត្តសៀមរាប ដែលបានសម្របសម្រួលផ្តល់សំណងជំងឺចិត្តជូនភាគីរងគ្រោះដោយសារគ្រោះថ្នាក់ចរាចរណ៍មួយដែលបានកើតឡើងកាលពីថ្ងៃទី២៧ ខែវិច្ឆិកា ឆ្នាំ២០២៣ នៅមុខសណ្ឋាគារហូរវើដ ភូមិកសិកម្ម សង្កាត់ស្រង៉ែ ក្រុងសៀមរាប ខេត្តសៀមរាប។
ប្រភពបានឲ្យដឹងថា ភាគីទាំងពីរបានព្រមស្តាប់ហេតុផល និងទទួលយកការសម្រុះសម្រួលរបស់ចៅក្រម ហើយទទួលបានសំណង ភាពយុត្តិធម៌ និងមានការស្ងប់ចិត្តពីភាគី។
ភាគីខាងលើ បានថ្លែងអំណរគុណយ៉ាងខ្លាំងជូនចំពោះសាលាដំបូងខេត្តសៀមរាប និងថ្នាក់ដឹកនាំ មន្ត្រីរាជការទាំងអស់ ជួបតែសេចក្តីសុខ សេចក្តីចម្រើន និងសម្រេចគ្រប់កិច្ចការងារទាំងអស់។
គួរបញ្ជាក់ផងដែរថា ការពន្លឿនដោះស្រាយរកយុត្តិធម៌ជូនគូភាគីក្នុងករណីបទល្មើសចរាចរណ៍ គឺជារឿងអាទិភាពមួយនៅក្នុងដំណើរការនៃការអនុវត្តយុទ្ធនាការដែលបានដាក់ចេញដោយក្រសួងយុត្តិធម៌៕
