សហគ្រាសធុនតូចផលិតបារីជេឃីងគឺមានច្បាប់អនុញ្ញាតត្រឹមត្រូវ
បន្ទាប់ពីមានបណ្ដាញសារព័ត៌មានមួយចំនួនបានចុះផ្សាយថា «មានរោងចក្រផលិតបារីអត់ច្បាដែលមានទីតាំងស្ថិតនៅ ភូមិកំពុងទួល ឃុំកំពុងទួល ស្រុកកណ្ដាលស្ទឹង ខេត្តកណ្ដាល» លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល នៅព្រឹកថ្ងៃទី២៨ ខែកុម្ភៈ ឆ្នាំ២០២៤ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្ដាល ដឹកនាំដោយលោកឧត្តមសេនីយ៍ត្រី លី សុជាតិ ស្នងការរងទទួលផែនការងារនគរបាលប្រឆាំងបទល្មើសសេដ្ឋកិច្ច បានសហការជាមួយកម្លាំងគណៈបញ្ជាការឯកភាពស្រុកកណ្ដាលស្ទឹង ដឹកនាំដោយលោក ភិន ស៊ុនឡេង អភិបាលរងស្រុក ដែលមានសមាសភាពចូលរួមពីលោក ជា រដ្ឋមុនី នាយការិយាល័យសេដ្ឋកិច្ច អភិវឌ្ឍន៍ស្រុក, លោកវរសេនីយ៍ឯក វ៉ែន សារិ នាយការិយាល័យប្រឆាំងបទល្មើសសេដ្ឋកិច្ច, លោកវរសេនីយ៍ទោ ស៊ឹម គឹមស៊ុន អធិការរងស្រុកកណ្ដាលស្ទឹង, លោកវរសេនីយ៍ត្រី ទូច ភារម្យ នាយប៉ុស្តិ៍រដ្ឋបាលអន្លង់រមៀត, លោក ឃន ថាវង់ ជំទប់ទី១ ឃុំកំពង់ទួល, លោក ជួប វុទ្ធី មេភូមិកំពង់ទួល ដើម្បីធ្វើការចុះត្រួតពិនិត្យជាក់ស្ដែងទីតាំងសហគ្រាសធុនតូចផលិតបារីជេឃីង ស្ថិតនៅភូមិកំពង់ទួល ឃុំអន្លង់រមៀត ស្រុកណ្ដាលស្ទឹង ខេត្តកណ្ដាល។ នេះបើតាមប្រភពដែលបណ្ដាញសារព័ត៌មាន The Mirror News ទទួលបាននៅថ្ងៃទី២៨ ខែកុម្ភៈ ឆ្នាំ២០២៤នេះ។
ប្រភពព័ត៌មានបានឲ្យដឹងថា ក្រោយការចុះត្រួតពិនិត្យ ជាលទ្ធផលបានបង្ហាញឲ្យឃើញថា *សហគ្រាសធុនតូចផលិតបារីជេឃីងបានកំពុងផលិតបារីមួយមុខម៉ាក ONLY YOU, *មានម៉ាស៉ីន ម៉ូលដើមបារី ចំនួន០២គ្រឿង, *ម៉ាស៉ីន ច្រកវិចខ្ចប់បារី ចំនួន០៣គ្រឿង, *ឃ្លាំងស្ដុកថ្នាំជក់០១, *បារីផលិតរួចម៉ាក ONLY YOU ចំនួន ២៥០ប៊ិច, *ឯកសារវិញ្ញាបនបត្របញ្ជាក់ចុះឈ្មោះក្នុងបញ្ជីពាណិជ្ជកម្មលេខ 27584669 ចុះថ្ងៃទី១៧ ខែវិច្ឆិកា ឆ្នាំ២០១៦ របស់ក្រសួងពាណិជ្ជកម្ម, *បណ្ណពន្ធប៉ាតង់ឆ្នាំ២០២៣ របស់អគ្គនាយកដ្ឋានពន្ធដារលេខ 23021799246 ចុះថ្ងៃទី១៧ ខែកុម្ភៈ ឆ្នាំ២០២៣*វិញ្ញាបនបត្រអនុញ្ញាតដំណើរការសហគ្រាសលេខ 0801/171 ចុះថ្ងៃទី០៤ ខែកក្កដា ឆ្នាំ២០២៣ របស់មន្ទីរឧស្សាហ៍កម្មខេត្តកណ្ដាល។, *វិញ្ញាបនបត្រចុះបញ្ជីម៉ាកលេខKH/73776/19 (ម៉ាកONLY YOU) កំពុងដំណើរការ,*វិញ្ញាបនបត្រចុះបញ្ជីម៉ាក លេខKH/72638/19 (ម៉ាកGE ZHOUBA) មិនដំណើរការ, *វិញ្ញាបនបត្រចុះបញ្ជីម៉ាក លេខKH/74015/19 (ម៉ាកAPOLO) មិនដំណើរការ។
ប្រភពខាងលើបញ្ជាក់ថា ម្ចាស់សហគ្រាស មានឈ្មោះ ជាង សៅជុន ភេទប្រុស អាយុ៥២ឆ្នាំ ជនជាតិចិន សញ្ជាតិខ្មែរ មានទីលំនៅ ភូមិសំបួរ សង្កាត់ដង្កោ ខណ្ឌដង្កោ រាជធានីភំ្នពេញ។
ប្រភពច្បាស់ការបានបញ្ជាក់ទៀតថា បន្ទាប់ពីក្រុមការងារបានចុះត្រួតពិនិត្យយ៉ាងយកចិត្តទុកដាក់រួចរាល់មកគឺថាសហគ្រាសផលិតបារីខាងលើ មានច្បាប់អនុញ្ញាតត្រឹមត្រូវ៕
