សម្តេច ហ៊ុន ម៉ាណែត ណែនាំក្រសួងធម្មកា និងក្រសួង-ស្ថាប័នពាក់ព័ន្ធសហការក្នុងការដាក់ចេញលក្ខណៈបច្ចេកទេស និងរចនាបថស្ដង់ដាសម្រាប់ការកសាងសំណង់ពាក់ព័ន្ធនឹងវិស័យសាសនាឱ្យបានត្រឹមត្រូវសម្រាប់ទុកជាកេរមរតកដ៏មានតម្លៃសម្រាប់កូនចៅខ្មែរជំនាន់ក្រោយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត បានណែនាំដល់ក្រសួងធម្មការនិងសាសនា និងក្រសួង-ស្ថាប័នពាក់ព័ន្ធសហការក្នុងការដាក់ចេញលក្ខណៈបច្ចេកទេស និងរចនាបថស្ដង់ដាសម្រាប់ការកសាងសំណង់ពាក់ព័ន្ធនឹងវិស័យសាសនា ដើម្បីធ្វើយ៉ាងណាឱ្យបានត្រឹមត្រូវសម្រាប់ទុកជាកេរមរតកដ៏មានតម្លៃសម្រាប់កូនចៅខ្មែរជំនាន់ក្រោយ។

ការណែនាំរបស់សម្ដេចធិបតីហ៊ុន ម៉ាណែត នាយករដ្ឋមន្ត្រីនៃកម្ពុជាក្នុងឳកាសអញ្ជើញជាអធិបតីសម្ពោធឆ្លង​ធម្មចេតិយទី១ តម្កល់ព្រះត្រៃបិដកចម្លាក់ថ្មម៉ាប១,១៧០ផ្ទាំង ផ្លូវបេតុង៩ខ្សែ និងសមិទ្ធផលនានាក្នុងមជ្ឈមណ្ឌលវប្បធម៌ព្រះពុទ្ធសាសនាកម្ពុជា ខេត្តកំពង់ស្ពឺ នាព្រឹកថ្ងៃទី៣០ ខែឧសភា ឆ្នាំ២០២៤។

សម្ដេចធិបតីក៏បានណែនាំដល់ក្រសួង-ស្ថាប័នពាក់ព័ន្ធ ពិសេសរដ្ឋបាលខេត្តកំពង់ស្ពឺត្រូវចូលរួមអភិវឌ្ឍន៍និងអភិរក្សបរិស្ថានធម្មជាតិ នៅមជ្ឈមណ្ឌលមជ្ឈមណ្ឌលព្រះពុទ្ធសាសនាកម្ពុជា ឱ្យកាន់តែល្អប្រសើរថែមទៀត ដូចជាការថែទាំនិងការដាំដើមឈើបន្ថែម ការអភិរក្សសត្វព្រៃជាដើម។

សម្ដេចធិបតីបានជំរុញឱ្យក្រសួង-ស្ថាប័នពាក់ព័ន្ធប្រើប្រាស់មជ្ឈមណ្ឌលវប្បធម៌ព្រះពុទ្ធសាសនាកម្ពុជាផ្ដល់ជាប្រយោជន៍ធំបំផុតសម្រាប់សេដ្ឋកិច្ច ជាពិសេសការទាក់ទាញភ្ញៀវទេសចរវប្បធម៌ ការអប់រំលើកកម្ពស់សីលធម៌សង្គម និងការប្រតិបត្តិធុរពុទ្ធសាសនា។

សម្ដេចធិបតីបានថ្លែងដូច្នេះថា ក្រៅពីការរួមគ្នាអភិរក្សនិងអភិវឌ្ឍន៍ យើងក៏ត្រូវរួមគ្នាបន្តថែរក្សាមជ្ឈមណ្ឌលនេះឱ្យមានបរិស្ថានល្អ បរិយាកាសរីកចម្រើន និងមានសុវត្ថិភាព ដើម្បីជាការទាក់ទាញភ្ញៀវទេសចរវប្បធម៌ ដើម្បីឱ្យទីកន្លែងនេះបានផ្ដល់ផលប្រយោជន៍ធំបំផុតសម្រាប់សេដ្ឋកិច្ច ជាពិសេសការទាក់ទាញភ្ញៀវទេសចរវប្បធម៌ ការអប់រំលើកកម្ពស់សីលធម៌សង្គម និងការប្រតិបត្តិធុរពុទ្ធសាសនា។

សម្ដេច ហ៊ុន ម៉ាណែត បានស្នើដល់មជ្ឈមណ្ឌលព្រះពុទ្ធសាសនាកម្ពុជាឱ្យសហការជាមួយក្រសួងធម្មការនិងសាសនា ដើម្បីប្រើប្រាស់ទីកន្លែងនេះជាកន្លែងពហុវិស័យក្នុងការបម្រើផលប្រយោជន៍ក្នុងវិស័យព្រះពុទ្ធសាសនា បូជនីយដ្ឋានទេសចរណ៍សាសនា និងជាកន្លែងបណ្ដុះគុណធម៌ សីលធម៌ សុជីវធម៌ និងបដិបត្តិសមាធិដល់យុវជននិងពុទ្ធបរិស័ទទាំងជាតិនិងអន្តរជាតិ។

សម្ដេចនាយករដ្ឋមន្ត្រីបានបន្តថា ទន្ទឹមនឹងការរីកចម្រើនលើគ្រប់វិស័យទាំងពុទ្ធចក្រ និងអាណាចក្រ ប្រជាជនកម្ពុជាគ្រប់រូបក៏ត្រូវមានកិច្ចការជាច្រើនទៀតដែលត្រូវចូលរួមអនុវត្ត ដើម្បីពង្រឹងវិស័យព្រះពុទ្ធសាសនាឱ្យកាន់តែប្រសើរថែមទៀត៕