បាក់ច្រាំងទន្លេនៅស្រុកខ្សាច់កណ្តាលបណ្ដាលឲ្យធ្លាក់មនុស្សម្នាក់ រហូតបាត់ខ្លួន

(កណ្ដាល)៖ មានករណីបាត់ខ្លួនមនុស្សម្នាក់ដោយសារបាក់ច្រាំងទន្លេនៅចំណុចព្រែកតាបែន ឃុំស្វាយរមៀត ស្រុកខ្សាច់កណ្តាល ខេត្តកណ្តាល កាលពីវេលាម៉ោង៤ទាបភ្លឺឈានចូលថ្ងៃទី១១ ខែធ្នូ ឆ្នាំ២០២៤។ នេះបើតាមប្រភពដែលបណ្ដាញសារព័ត៌មាន The Mirror News ទទួលបាននៅថ្ងៃទី១១ ខែធ្នូ ឆ្នាំ២០២៤នេះ។

ប្រភពបន្តថា ជនរងគ្រោះដែលបាត់ខ្លួនឈ្មោះ សឿ សឹង ភេទប្រុស អាយុ២៥ឆ្នាំ ជនជាតិខ្មែរ មុខរបរកម្មករទូក មានស្រុកកំណើត នៅភូមិបារាយ ឃុំកំពង់ចាម ស្រុកសំបូរ ខេត្តក្រចេះ។

ប្រភពបានបន្តទៀតថា នៅមុនពេលកើតហេតុ មនុស្សចំនួន៤នាក់កំពុងសំរាកលើទូក។ លុះដល់បាក់ដីស្រាប់តែខ្ទាតជនរងគ្រោះខាងលើ ចូលក្នុងទឹកបណ្ដាលឱ្យបាត់ខ្លួនតែម្ដងទៅ ខណៈមនុស្ស៣នាក់ទៀត បានរួចផុតពីសេចក្ដីស្លាប់៕