កម្លាំងសមត្ថកិច្ចចាប់ឃាត់ខ្លួនមុខសញ្ញាចាស់ទេីបចេញពីពន្ធនាគារ ក្រោយបានធ្វេីសកម្មភាពឆក់ចំនួន២ដងទៀត
ភ្នំពេញ៖ មុខសញ្ញាចាស់ទេីបចេញពីពន្ធនាគារ និងបានធ្វេីសកម្មភាពឆក់ចំនួន០២ដង គឺឆក់ខ្សែក និងឆក់កាបូ ត្រូវបានកម្លាំងជំនាញ នៃនាយកដ្ឋាននគរបាលព្រហ្មទណ្ឌធ្វេីការឃាត់ខ្លួនបាន។ នេះបើតាមប្រភពដែលបណ្ដាញសារព័ត៌មាន The Mirror News ទទួលបាននៅថ្ងៃទី០២ ខែសីហា ឆ្នាំ២០២៣។
ប្រភពបន្តថា ករណីទី១ នៅថ្ងៃទី២៥ ខែកក្កដា ឆ្នាំ២០២៣ វេលាម៉ោង១០៖០០នាទី បានធ្វេីសកម្មភាពឆក់ខ្សែកពីបុរសម្នាក់កំពុងឈប់ម៉ូតូខ្ចប់គុយទាវ បានសម្រេច នៅចំណុចមុខហាងគុយទាវអង្គរជុំ ដែលស្ថិតនៅផ្លូវលេខ៥៩២ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។ បន្ទាប់ពីជនសង្ស័យ បានធ្វេីសកម្មភាពរួច ក៏បានយកខ្សែក ទៅលក់នៅតូប០១កន្លែង ក្នុងផ្សារឈូកមាស បានប្រាក់ចំនួន ៧៥០$។ និងករណីទី២នៅថ្ងៃទី២៧ ខែកក្កដា ឆ្នាំ២០២៣ វេលាម៉ោង២២:៣០នាទី បានធ្វេីសកម្មភាពឆក់កាបូបស្ពាយពីនារីរងគ្រោះកំពុងជិះម៉ូតូបានសម្រេចនៅចំណុចផ្លូវលេខ២៦៥កែងផ្លូវលេខ១៥០ ក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។ ចំពោះ សម្ភារៈក្នុងកាបូបមាន ទូរស័ព្ទម៉ាក អាយហ្វូន ១៣ ពណ៌ផ្កាឈូក និងបានយកទៅលក់បុរសម្នាក់ បានប្រាក់ចំនួន ៤៨០$។
ប្រភពបន្តទៀតថា ក្រោយពីទទួលបានបណ្តឹងពីជនរងគ្រោះ លោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋានទទួលផែន បានដឹកនាំកម្លាំងជំនាញការិយាល័យព្រហ្មទណ្ឌកម្រិតធ្ងន់ ដែលមានលោកវរសេនីយ៍ឯក ញ៉ែម វ៉ន ជានាយការិយាល័យ និងមានការចូលរួមសហការពីលោក វរសេនីយ៍ទោ ប៊ុត សុីម៉េង បានធ្វេីការស្រាវជ្រាវតាមរយះកាម៉េរ៉ាសុវត្ថិភាព ទេីបកំណត់មុខសញ្ញាបានរហូតឈានដល់ថ្ងៃទី២៩ ខែកក្កដា ឆ្នាំ២០២៣ វេលាម៉ោង២៣៖៤០នាទីត្រង់ចំណុចផ្លូវលេខ១៧២ សង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ ក៏បានប្រទះឃេីញជនសង្ស័យខាងលេី និងបានធ្វេីការឃាត់ខ្លួនជនសង្ស័យបានម្នាក់ឈ្មោះ សុវណ្ណ ឧត្តមរង្សី ហៅ តួ ភេទប្រុស អាយុ២៨ឆ្នាំ ជនជាតិខ្មែរ និងដកហូតបានម៉ូតូម៉ាក ហុងដាឃ្លីក ពណ៌ខ្មៅ ពាក់ស្លាកលេខ ភ្នំពេញ1KA-2583(មិនប្រក្រតី)។
ប្រភពបន្ថែមថា បន្ទាប់ពីកម្លាំងជំនាញបានធ្វេីការសាកសួរ ជនសង្ស័យខាងលេីរួចមក ជនសង្ស័យក៏បានសារភាពថាពិតជាបានធ្វេីសកម្មភាពឆក់ខ្សែក និងកាបូបពីជនរងគ្រោះទាំងពីរនាក់ពិតប្រាកដមែន។
កម្លាំងជំនាញបាននាំជនសង្ស័យខាងលេី ទៅចង្អុលបង្ហាញតូប ០១កន្លែង ក្នុងផ្សារឈូកមាស ដែលខ្លួនបានយកខ្សែក ទៅលក់ ដេីម្បីកម្លាំងជំនាញទៅដកហូតខ្សែក យកមកប្រគល់ជូនជនរងគ្រោះវិញ ប៉ុន្តែខ្សែរកខាងលេី ត្រូវបានម្ចាស់តូបរំលាយជាដុំលោហៈធាតុ ពណ៌លឿងបាត់ទៅហេីយ ប៉ុន្តែម្ចាស់តូបសូមប្រគល់ដុំលោហៈធាតុ ពណ៌លឿង ទម្ងន់ចំនួន០១តម្លឹង មកឲ្យសមត្ថកិច្ចដេីម្បីចាត់ការតាមនីតិវិធីច្បាប់។
បន្ទាប់ពីធ្វេីការដកហូតរួចមក កម្លាំងជំនាញនាយកដ្ឋាននគរបាលព្រហ្មទណ្ឌបានធ្វេីការប្រគល់ជូនដុំលោហៈធាតុ ពណ៌លឿង ទម្ងន់០១តំឡឹង ទៅឲ្យជនរងគ្រោះវិញ។
បច្ចុប្បន្នជនសង្ស័យ និងវត្ថុតាងខាងលេី ការិយាល័យកំពុងបញ្ជូនទៅអយ្យការអមសាលាដំបូងរាជធានីភ្នំពេញ ដេីម្បីចាត់ការតាមនីតិវិធី៕
