ស្នងការខេត្តកំពង់ចាម លោក ហេង វុទ្ធី អញ្ជើញបេីកការដ្ឋានស្ថាបនាកែលំអផ្លូវលំចំនួន១ខ្សែ តភ្ជាប់ពីភូមិអារក្សត្នោត ឃុំអារក្សត្នោត ទៅភូមិទួលសំបួរ
លោកឧត្ដមសេនីយ៍ទោ ហេង វុទ្ធី បានសម្ដែងការអបអរសាទយ៉ាងក្រៃលែងជាមួយបងប្អូនប្រជាពលរដ្ឋរស់នៅក្នុងឃុំអារក្សត្នោត និងឃុំទួលសំបួរ ស្រុកស្ទឹងត្រង់ ដែលទទួលបានការស្ថាបនាផ្លូវលំចំនួន៣ខ្សែ ដែលជាអំណោយដ៏ថ្លៃថ្លារបស់ ឯកឧត្តម ហ៊ុន ម៉ានិត អនុប្រធានទី១ថ្នាក់កណ្ដាលចុះជួយខេត្តកំពង់ចាម និងជាប្រធានក្រុមការងារចុះជួយស្រុកស្ទឹងត្រង់។
ការសម្ដែងការអបអរសាទររបស់លោកឧត្ដមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម និងជាសមាជិកអចិន្ត្រៃយ៍នៃគណៈកម្មាធិការគណបក្សខេត្ត អនុប្រធានក្រុមការងារថ្នាក់កណ្តាលចុះជួយស្រុកស្ទឹងត្រង់ និងជាប្រធានគណៈកម្មាធិការ ខ២៧ នៅព្រឹកថ្ងៃសៅរ៍ ទី០២ ខែកញ្ញា ឆ្នាំ២០២៣នេះ ក្នុងឱកាសដឹកនាំលោក-លោកស្រី ក្រុមការងារចុះជួយឃុំអារក្សត្នោត និងឃុំទួលសំបួរ ចូលរួមក្នុងពិធីបេីកការដ្ឋានស្ថាបនាកែលំអផ្លូវលំចំនួន១ខ្សែ តភ្ជាប់ពីភូមិអារក្សត្នោត ឃុំអារក្សត្នោត ទៅភូមិទួលសំបួរ ឃុំទួលសំបួរ ស្រុកស្ទឹងត្រង់ ដែលមានប្រវែង ៤២០០ម៉ែត្រ គ្រោងចំណាយអស់ថវិកាប្រមាណជាង ៤០លានរៀល ។
ជាមួយនោះ លោកឧត្ដមសេនីយ៍ទោ ហេង វុទ្ធីនិងសហការី ក៏បានបន្ដចុះត្រួតពិនិត្យផ្លូវលំមួយខ្សែទៀត ដែលបច្ចុប្បន្នជាផ្លូវទាល់ ដោយត្រូវស្ថាបនាតភ្ជាប់ ដេីម្បីជួយសម្រួលដល់ការធ្វេីដំណេីររបស់បងប្អូនប្រជាពលរដ្ឋក្នុងភូមិ ស្ថិតនៅក្នុងភូមិទួលសំបួរ ឃុំទួលសំបួរ ស្រុកស្ទឹងត្រង់ ដែលត្រូវចំណាយថវិកាអស់ប្រមាណជាង ជិត២០លានរៀល។
លោកឧត្ដមសេនីយ៍ទោស្នងការនិងសហការី ក៏បានបន្ដចុះត្រួតពិនិត្យការសាងសងផ្លូវលំមួយខ្សែទៀត ដែលបានសាងសង់រួចរាល់ជាស្ថាពរ មានប្រវែង ៣៣៧ម៉ែត្រ ស្ថិតនៅភូមិស្រែអំពៅ ឃុំទួលសំបួរ ស្រុកស្ទឹងត្រង់ ដែលជាអំណោយដ៏ថ្លៃថ្លារបស់ ឯកឧត្ដម ហ៊ុន ម៉ានិត ចំណាយអស់ថវិកាចំនួន ១៦លានរៀល។
ជាមួយការស្ថាបនាផ្លូវលំទាំងបីខ្សែនេះ អស់ថវិកាចំនួន ៧៦លានរៀល៕
