ប៉ូលិសក្រសួងមហាផ្ទៃដេញតាមចាប់ក្រុមចោរលួចកាច់កម៉ូតូបាន២នាក់ភ្លាមៗនៅខណ្ឌទួលគោក

កម្លាំងសមត្ថកិច្ចនគរបាលការិយាល័យ​ព្រហ្មទណ្ឌកម្រិតធ្ងន់ក្រសួងមហាផ្ទៃបានចុះល្បាតតាមផ្លូវ​លេខ២៦១ កែងផ្លូវលេខ២០៤​ ក្នុងសង្កាត់ទឹកល្អក់ទី៣ ខណ្ឌទួលគោក រាជធានី​ភ្នំពេញ ខណៈប្រទះឃើញក្រុមចោរ២នាក់បានកំពុងលួចកាច់កម៉ូតូរបស់ប្រជាពលរដ្ឋ ក៏ដេញតាមបង្ក្រាប់ចាប់ឃាត់ខ្លួនបាន ភ្លាមៗកាលពីវេលាម៉ោង​១៩និង០៥នាទី ថ្ងៃទី០៤ ខែកញ្ញា ឆ្នាំ២០២៣​ នៅចំណុចផ្លូវលេខ២៦៥កែងផ្លូវលេខ១៥០​ ក្នុងសង្កាត់ទឹកល្អក់ទី២។​

ជនសង្ស័យបានទាំង០២នាក់រួមមាន៖ ទី១.ឈ្មោះ​ ម៉ៅ​ រតនះ ភេទប្រុស អាយុ៣១ឆ្នាំ ជនជាតិខ្មែរ មុខរបរធ្វេីសំណង់ ទីកន្លែងស្នាក់នៅផ្ទះមិនពិតប្រាកដ ជាអ្នកចុះកាច់កម៉ូតូ។ និងទី២.ឈ្មោះ​ ហៀង​ លីហ័ង ភេទប្រុស អាយុ ២២ឆ្នាំ ជនជាតិខ្មែរ មុខរបរមិនពិតប្រាកដ ទីកន្លែងស្នាក់នៅភូមិរកាធំ ឃុំបែកចាន​ ស្រុកអង្គស្នួល​ ខេត្តកណ្តាល ជាអ្នកបេីក។

ចំពោះសម្ភារៈដកហូតបាន រួមមាន៖១.​ម៉ូតូហុងដា​ ឃ្លីក ពណ៌ស ពាក់ស្លាក​លេខ​ ភ្នំពេញ​ 1HL-6412 ជារបស់ជន​រងគ្រោះ។ និង២.​ម៉ូតូហុងដា​ឌ្រីម ពណ៌ខ្មៅ ពាក់ស្លាក​លេខ​ ភ្នំពេញ​ 1KC-6034 ជារបស់ជនសង្ស័យ។

បច្ចុប្បន្ន​ កម្លាំងជំនាញបាននាំជនសង្ស័យខាងលេី មកនាយកដ្ឋាននគរបាលព្រហ្មទណ្ឌ​ ដេីម្បីធ្វេីការសាកសួរ​ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី៕