ឯកឧត្តម គង់ សោភ័ណ្ឌ៖ «ដើម្បីឲ្យវិស័យអប់រំមានភាពល្អប្រសើរទៅបានគឺត្រូវយកចិត្តទុកដាក់ ពង្រឹងគុណភាពវិស័យអប់រំ យុវជន និងកីឡា វិទ្យាសាស្រ្ត និងបច្ចេកវិទ្យា»
ឯកឧត្តម គង់ សោភ័ណ្ឌ បានគូសបញ្ជាក់ថា«ដើម្បីឲ្យវិស័យអប់រំ ដែលជាវិស័យអាទិភាពទី១ មានភាពល្អប្រសើរទៅបាន គឺត្រូវយកចិត្តទុកដាក់ ពង្រឹងគុណភាពវិស័យអប់រំ យុវជន និងកីឡា វិទ្យាសាស្រ្ត និងបច្ចេកវិទ្យា ហើយដែលត្រូវបានកំណត់ជាមុំទី១ នៃបញ្ចកោណទី១ ពាក់ព័ន្ធនឹងការអភិវឌ្ឍធនធានមនុស្ស។ ដោយសារចំណុចនេះហើយទើប សម្តេចបវរធិបតី ហ៊ុន ម៉ាណែត លើកឡើងឲ្យបង្កើត «ស្តង់ដាសាលារៀនគំរូ» និងដាក់ឲ្យមានការប្រឡងប្រណាំង «សាលារៀនគំរូ» ចាប់ពីឆ្នាំ សិក្សា២០២៣-២០២៤នេះតទៅ។ នេះហើយគឺជាចំណុចពិសេសរបស់សន្និបាតអប់រំនាពេល នេះ ព្រោះ ភារកិច្ចលោក លោកស្រី នាយក នាយិកា ជាអ្នកគ្រប់គ្រង និងដឹកនាំអនុវត្តស្តង់ដាសាលារៀនគំរូផ្ទាល់»។
ការគូសបញ្ជាក់របស់ឯកឧត្តម គង់ សោភ័ណ្ឌ អភិបាល នៃគណៈអភិបាល ខេត្តកណ្តាលនារសៀលថ្ងៃទី១ ខែមីនា ឆ្នាំ២០២៤ ក្នុងពិធីបិទសន្និបាតបូកសរុបលទ្ធផលការងារអប់រំ យុវជន និងកីឡា ខេត្តកណ្តាល ឆ្នាំ២០២២-២០២៣ និងលើកទិសដៅការងារ ២០២៣-២០២៤ នៅសាលាគរុកោសល្យ និងវិក្រឹតការ ខេត្តកណ្តាល។
នាឳកាសអញ្ជើញជាអធិបតី ឯកឧត្តម គង់ សោភ័ណ្ឌ បានគូសបញ្ជាក់បន្តថា រាជរដ្ឋាភិបាលកម្ពុជា ក៏ដូចជារដ្ឋបាលខេត្តកណ្តាល សូមកោតសសើរចំពោះការយកចិត្តទុកដាក់ ក្នុងការអនុវត្តវិធានការលើក កម្ពស់គុណភាព និងភាពឆ្លើយតបរបស់សេវាអប់រំ ជាពិសេសកំណែទម្រង់ការប្រឡងសញ្ញាបត្រមធ្យមសិក្សាទុតិយភូមិ និងការប្រឡងគ្រប់ប្រភេទ ការលើកកម្ពស់វិជ្ជាជីវៈគ្រូបង្រៀន ការអភិវឌ្ឍសមត្ថភាព និងការលើកទឹកចិត្តបុគ្គលិក ព្រមទាំងការបង្កើនប្រសិទ្ធភាព និងភាពស័ក្តិសិទ្ធិក្នុងការគ្រប់គ្រងសេវាអប់រំ ពិសេសមន្ទីរអប់រំ យុវជន និងកីឡាខេត្ត បានយកចិត្តទុកដាក់អនុវត្តតាមផែនការយុទ្ធសាស្ត្ររបស់រាជរដ្ឋាភិបាល និងក្រសួងអប់រំ យុវជន និងកីឡា ក៏ដូចជា រដ្ឋបាលខេត្ត។
ជាមួយនេះ ឯកឧត្តមអភិបាលខេត្តបានបន្តថា សន្និបាតរយៈពេល ២ថ្ងៃកន្លងមកនេះ បើកឱ្យសមាជិកសមាជិកាប្រើប្រាស់បញ្ញាញាណ ស្មារតី ដើម្បីពិភាក្សាផ្លាស់ប្តូរបទពិសោធន៍ និងបញ្ចេញមតិយោបល់ព្រមទាំងបានផ្តល់ព័ត៌មានជាក់ លាក់ និយាយពិត និយាយត្រង់ឈានទៅរកការរីកចម្រើនសម្រេចបានលទ្ធផលផ្កាផ្លែគួរជាទីមោទនៈ។គោលដៅនៃការពង្រឹង និងពង្រីកវិស័យអប់រំទាំងបរិមាណ និងគុណភាពគឺជាបរិបទមួយឆ្លើយតបទៅ នឹងសំណូមពរចាំបាច់នៃការអភិវឌ្ឍន៍សង្គមជាតិ។
គួរជម្រាបថា បន្ទាប់ពីលោក ចេង សំអ៊ុល ប្រធានមន្ទីរអប់រំ យុវជន និងកីឡាខេត្តកណ្ដាលបបានឡើងអាននូវរបាយការណ៍រួចមក ឯកឧត្តម គង់ សោភ័ណ្ឌ ក៏បានថ្លែងប្រកាសបិទអង្គសន្និបាតរយៈពេល០២ថ្ងៃ និងបានកោតសរសើរ និងវាយតម្លៃខ្ពស់ចំពោះសមិទ្ធផលរបស់វិស័យអប់រំ យុវជន និងកីឡាខេត្តកណ្ដាល ដែលបានអនុវត្តកន្លងមក មន្ទីរ និងដៃគូអភិវឌ្ឍន៍រួមគ្នាសម្រេចកិច្ចការធំៗគួរឱ្យកត់សម្គាល់ដូចជា បន្តបង្កើនការចូលរៀនប្រកបដោយសមធម៌នៅគ្រប់កម្រិត ជាពិសេសការអប់រំមូលដ្ឋានរយៈពេល៩ឆ្នាំ តាមរយៈការបង្កលក្ខណៈសម្បត្តិអនុគ្រោះនានាដើម្បីឱ្យកូនចៅប្រជាពលរដ្ឋដែលជួបការលំបាកមានលទ្ធភាពចូលសិក្សា ការពង្រឹង និងពង្រីកអភិបាលកិច្ចគ្រឹះ ស្ថានសិក្សាសាធារណៈ ការដោះស្រាយតម្រូវការបន្ទាន់ ភ្លាមៗ និងការបង្កើនអាហារូបករណ៍សម្រាប់សិស្សក្រីក្រ។
ទន្ទឹមនោះ ឯកឧត្តមអភិបាលខេត្តកណ្ដាលបានអំពាវនាវដល់លោក លោកស្រី នាយក នាយិកា លោកគ្រូ អ្នកគ្រូទាំងអស់ ក្នុងខេត្តកណ្តាល មេត្តាយកចិត្តទុកដាក់ជំរុញសាលារៀនរបស់ខេត្តកណ្តាលដែលមាន៤៧សាលាឲ្យក្លាយជា សាលារៀនគំរូ ទើបទទួលកិត្តិយសខេត្តយើង កិត្តិយសក្រុង-ស្រុកយើង កិត្តិយសសាលារៀនយើង កិត្តិយស ប្រជាជនយើង បានល្បីរន្ទឺពេញផ្ទៃប្រទេស និងជាពិសេសសូមរដ្ឋបាលក្រុង-ស្រុក អាជ្ញាធរមូលដ្ឋាន ជួយចូលរួម និងជំរុញឲ្យសាលារៀនយើងឲ្យក្លាយជាសាលាគំរូ ៕
