ឧបនាយករដ្ឋមន្ត្រី កើត រិទ្ធ៖ «អំណឹះនេះតទៅត្រីណាស្អុយត្រូវដកត្រីនោះចេញ»

ឯកឧត្តមឧបនាយករដ្ឋមន្រ្តី កើត រិទ្ធ បានលើកឡើងនៅថ្ងៃទី២៧ ខែមីនា ឆ្នាំ២០២៤នេះ ដោយជំរុញឲ្យអ្នកពាក់ព័ន្ធក្នុងវិស័យយុត្តិធម៌ពង្រឹងវិន័យដើម្បីដកបណ្ដាសាដែលគេតែងមុសាលើអង្គចៅក្រមថា «ត្រីមួយកន្ត្រកស្អុយមួយស្អុយទាំងអស់» ដោយពីអំណឹះនេះតទៅត្រីណាស្អុយត្រូវដកត្រីនោះចេញ។

ការលើកឡើងរបស់ឯកឧត្តមឧបនាយករដ្ឋមន្រ្តី កើត រិទ្ធ រដ្ឋមន្ត្រីក្រសួងយុត្តិធម៌យ៉ាងដូច្នេះគឺជាការឯកភាពជាមួយការលើកឡើងរបស់ប្រធានតុលាការកំពូលឯកឧត្តម ជីវ កេង ដែលចូលរួមក្នុងឱកាសក្រសួងយុត្តិធម៌បើកមហាសន្និបាតបូកសរុបលទ្ធផលការងារវិស័យយុត្តិធម៌ទូទាំងប្រទេសឆ្នាំ២០២៣។ 

នៅក្នុងជំហរម៉ឺងម៉ាត់ឯកឧត្តមបានសង្កត់ធ្ងន់ថា មិនអនុញ្ញាតឲ្យត្រីមួយដែលស្អុយមកសម្អុយត្រីមួយកន្ត្រកទេ ដើម្បីសម្រេចទិសដៅផ្ដល់សេវាយុត្តិធម៌ឲ្យបានល្អប្រសើរ គុណភាពនិងកាន់តែសុក្រឹត្យ ក្នុងគោលបំណងឲ្យប្រជាពលរដ្ឋមានជំនឿទុកចិត្តមកលើប្រព័ន្ធយុត្តិធម៌៕