កម្លាំងប៉ូលិសខេត្តកណ្ដាលបង្ក្រាបបានក្រុមចោរប្លន់ជាជនជាតិវៀតណាម២នាក់ក្នុងចំណោមបក្សពួក៤នាក់ នៅស្រុកកណ្ដាលស្ទឹង
កណ្ដាល៖ កម្លាំងសមត្ថកិច្ចនគរបាលខេត្តកណ្ដាល ក្រោមបទបញ្ជាយ៉ាងម៉ឺងម៉ាត់របស់លោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាលបានបង្ក្រាបក្រុមចោរប្លន់ជាជនជាតិវៀតណាមបាន២នាក់ ក្នុងចំណោមបក្សពួក៤នាក់ ពាក់ព័ន្ធករណីប្លន់រថយន្តពីប្រជាពលរដ្ឋខ្មែរកាលពីវេលាម៉ោង ១៨៖៣០នាទី ថ្ងៃទី២៧ ខែឧសភា ឆ្នាំ២០២៤ នៅចំណុចភូមិត្រពាំងវែង ឃុំ ត្រពាំងវែងស្រុក កណ្ដាលស្ទឹង ខេត្តកណ្ដាល។ នេះបើតាមប្រភពដែលបណ្ដាញសារព័ត៌មាន The Mirror News ទើបទទួលបាននៅថ្ងៃទី៣១ ខែឧសភា ឆ្នាំ២០២៤នេះ។
ប្រភពបានឲ្យដឹងថា ជនសង្ស័យ២នាក់ក្នុងចំណោមបក្សពួក៤នាក់៖ ទី១៖ ឈ្មោះ Nguyễn Thont Đồng ភេទប្រុស អាយុ២៣ឆ្នាំ ជនជាតិវៀតណាម និងទី២៖ ឈ្មោះ Li Jun Wei ភេទប្រុស អាយុ៣៩ឆ្នាំ ជនជាតិចិន។ ខណៈជនសង្ស័យ២នាក់ទៀតបានរត់គេចខ្លួននិងមិនស្គាល់អត្តសញ្ញាណ។
ប្រភពបន្តថា ជនរងគ្រោះឈ្មោះ យុង សុផាត ភេទប្រុស អាយុ៤៤ឆ្នាំ បច្ចុប្បន្នរស់នៅភូមិរកា សង្កាត់រកាខ្ពស់ ក្រុងតាខ្មៅ ខេត្តកណ្ដាល មានមុខរបររត់ឡានឈ្នួល។
បើតាមប្រភពបានឱ្យដឹងទៀតថា កាលថ្ងៃទី២៧ ខែឧសភា ឆ្នាំ២០២៤ វេលាម៉ោង០៨៖០០នាទី ជនរងគ្រោះបានបើករថយន្តចេញពីផ្ទះរបស់ខ្លួន យកទៅធ្វើនៅភ្នំពេញ និងទៅរកដឹកភ្ញៀវនៅមុខព្រលានយន្តហោះអន្តរជាតិភ្នំពេញ។ រហូតម៉ោង១០៖០០នាទី ក្រុមអ្នករត់តាក់ស៊ីដូចគ្នាបាននាំគ្នាលេងក្នុងគ្រុបឆាតថា មានជនជាតិចិនរកជួលរថយន្ត ពេលនោះជនរងគ្រោះបានឆាតទៅជនជាតិចិនខាងលើ រួចជនជាតិចិនបានដាក់ទីតាំងឱ្យជនរងគ្រោះទៅជួបម្តុំស្ពានអាកាសផ្សារដីហុយ។ លុះពេលទៅដល់ ជនរងគ្រោះបានជួបជនជាតិចិន ហើយជនរងគ្រោះ បានសួរជនជាតិចិនតាមរយៈទូរស័ព្ទបកប្រែភាសាថា ចង់ទៅណា ហើយជនជាតិចិនបានតបវិញថា ទៅច្រកព្រំដែនព្រែកចាក (ទៅវិញទៅមក) រួចជនរងគ្រោះបានទារថ្លៃដឹកទៅវិញទៅមកក្នុងតម្លៃ១៩០ដុល្លារ។
ប្រភពបន្តថា ខណៈនោះជនជាតិចិនបានតថ្លៃមកត្រឹម១៤០ដុល្លារ ហើយជនរងគ្រោះបានយល់ព្រម រួចក៏ដឹកជនជាតិចិននោះ ទៅច្រកព្រំដែនព្រែកចាក។ ពេលទៅដល់ ជនជាតិចិនខាងលើបានជួបនារីជនជាតិចិនដូចគ្នា។ ដោយឡែកជនរងគ្រោះ បានអង្គុយចាំនៅរថយន្ត។ ពេលហូបបាយរួចជនជាតិចិនបាននាំគ្នាដើរចូលកន្លែងអនឡាញនៅទីនោះបាត់ប្រហែលមួយម៉ោងទើបជនជាតិចិនដើរចេញមក និងនាំជនជាតិវៀតណាម៣នាក់ទៀត មកជាមួយតែពុំឃើញជនជាតិចិនស្រីនោះចេញមកទេ។ ពេលនោះជនរងគ្រោះ បានបើករថយន្តដឹកជនជាតិចិន និងជនជាតិវៀតណាម៣នាក់ទៀត ត្រឡប់មកភ្នំពេញវិញ ដោយបើករថយន្តតាមបណ្ដោយផ្លូវជាតិលេខ៣។ លុះដល់ចំណុចកើតហេតុ ជនជាតិវៀតណាមទាំង៣នាក់ បានព្រួតគ្នាវាយជនជាតិចិនតែម្តង។
ឃើញដូចនោះ ជនរងគ្រោះភ័យបានអែបរថយន្តចូលគៀន ហើយរត់ចុះពីរថយន្តតែពុំពន្លត់ម៉ាស៊ីនទេ ហើយជនរងគ្រោះបានដើរចូលទៅពន្លត់ម៉ាស៊ីនរថយន្តវិញ ក៏ត្រូវជនជាតិវៀតណាមចាប់ដៃ និងបានដណ្ដើមសោរថយន្តពីចង្កេះខោរបស់ជនរងគ្រោះ រួចបើករថយន្តគេចខ្លួន រហូតដល់ចំណុចឃុំគរគីធំ ស្រុកកៀនស្វាយ ទើបកម្លាំងនគរបាលស្រុកកៀនស្វាយ ឃាត់បានចំនួនពីរនាក់ ចំណែកជនជាតិវៀតណាម២នាក់ទៀត ចុះពីលើរថយន្តរួចគេចខ្លួនបាត់។
ប្រភពបន្តថា ជនសង្ស័យទាំង២នាក់ ត្រូវបានកម្លាំងអធិការដ្ឋាននគរបាលស្រុកកៀនស្វាយ ប្រគល់ជូនកម្លាំងផ្នែកជំនាញស្រុកកណ្ដាលស្ទឹង ដើម្បីធ្វើការសាកសួរ។ ក្រោយធ្វើការសាកសួររួច ជនសង្ស័យជនជាតិចិន បានឆ្លើយសារភាពថា ខ្លួនត្រូវបានមិត្តភ័ក្តិម្នាក់ទៀតឈ្មោះ Zhu bao ឱ្យទៅទទួលភ្ញៀវជនជាតិវៀតណាម៣នាក់ខាងលើ ពីច្រកព្រំដែនព្រែកចាក ដើម្បីទៅធ្វើការនៅច្រកព្រំដែនជ្រៃធំ។
ដោយឡែកជនជាតិវៀតណាម បានឆ្លើយសារភាពថា ខ្លួនត្រូវបានជនជាតិចិនលោះខ្លួន ចេញពីកន្លែងអនឡាញមួយកន្លែងនៅម្តុំច្រកព្រំដែនព្រែកចាក ដើម្បីទៅធ្វើការនៅកន្លែងផ្សេង ពេលជិះរថយន្តដល់ចំណុចកើតហេតុខាងលើបក្ខពួកខ្លួន០២នាក់ទៀត បានវាយមកលើជនជាតិចិន និងបានគំរាមឱ្យជូនខ្លួន និងបក្ខពួកត្រឡប់ទៅប្រទេសខ្លួនវិញ ទើបវាយជនរងគ្រោះដណ្តើមសោបើកគេចខ្លួន។
ពាក់ព័ន្ធករណីខាងលើនេះ បើតាមប្រភពដែលបណ្ដាញសារព័ត៌មាន The Mirror News ទើបទទួលបានថា ព្រះរាជអាជ្ញារងអមសាលាដំបូងខេត្តកណ្ដាល លោក អ៊ុំ សុភក្ដិ បានសម្រេចចោទប្រកាន់ជនបរទេសចំនួន២នាក់ ករណីប្លន់រថយន្តពីជនជាតិខ្មែរនៅស្រុកកណ្ដាលស្ទឹង។ ក្នុងសំណុំរឿងនេះត្រូវបានបញ្ជូនទៅចៅក្រម ស៊ើបសួររួចរាល់ហើយ ក្រោមបទ «លួចមានស្ថានទម្ងន់» តាមបញ្ញត្តិមាត្រា ៣៥៧ ក្រមព្រហ្មទណ្ឌ៕
